Sesusi wapopila ovateheleli vae mo Peleya okuti “ovanyingi vatetekela mavekesaililwa iya vokuesaililwa mavakala ovatete.” (Mateusi 19:30) Apopi ononthengele-popia opo ahangunune onondaka ombo.

Ati: “Ouhamba wo keulu ukahi nga hekulu yeumbo wapita komuhuka opo akaovole ovaundapi vaundape mepia liae liomivinyu. Etyi velipakelamo novaundapi opo evefete ondenaliu ike monthiki, evetumu mepia liae. Etyi apita vali koola 9, avasi vali ovakuavo vepumphi popalasa, vehena ovilinga; iya evepopila okuti: ‘No onwe endei kepia liomivinyu, mandyimufete nawa.’ Ngotyo avaende. Aende vali koola 12, no koola 15 avasi vali ovaundapi ovakuavo. Okuhulila-ko, koola 17 avasi vali ovakuavo vetai, evepulu okuti: ‘Omokonda yatyi muakalela apa onthiki aiho tyihaundapa?’ Avemupopila okuti: ‘Omokonda nawike wetukonga.’ Evepopila okuti: ‘No onwe endei mepia liomivinyu.’” — Mateusi 20:1-7.

Ovateheleli va Sesusi, tyafuile etyi veiva onondaka “Ouhamba wo keulu” nonondaka “hekulu yeumbo,” avasoko ku Siovaa Huku. Ombimbiliya ilekesa nawa okuti hekulu yepia liomivinyu o Siovaa, iya epia olio lilekesa elongo lyo Isilayeli. (Salmo 80:8, 9; Isaías 5:3, 4) Vana ankho vekahi momphango Yovitumino ovo vaelekwa novaundapi vomepia liomivinyu. Mahi, Sesusi ankho kekahi nokupopia ova Isilayeli vo kohale. Ankho upopia onkhalelo yovanthu vo pomuvo wae.

Ngetyi ankho tyalingile ova Faliseu okulola Sesusi konthele yokulihenga, no nonkhalamutwe mbonongeleya ankho velilekesa ngatyina vatualako okuundapa unene movilinga vya Huku. Ankho vekahi nga vana vaundapa onthiki aiho, vakevelela okufetwa ondenaliu, ombongo ankho yatokala movilinga viavo.

Ovanakwa no nonkhalamutwe ononkhuavo mbonongeleya ankho vatala ova Sundeu vakuavo ngatyina vahaundapela unene Huku, nga vana vaundapa vala katutu mepia liomivinyu lya Huku. Monthengele-popia ya Sesusi, ovanthu ovo, ovovana vakongwa “koola 9” ine konyima vali, koola 12, no koola 15 iya okuhulilila-ko koola 17.

Ovalume novakai valandula Sesusi ankho vatalwa ngatyina “ovanthu vokuahinganwa.” (Suau 7:49) Ovilinga viovanthu ovo ankho okufwa vala ombisi nokulinga ovipuka ovikuavo. Konyima, menima 29 P.K., Huku “hekulu yepia liomivinyu” atumu Sesusi akonge ovanthu vomitima vieliola opo vemuundapele, mokukala ovalongwa va Kilisitu. Ankho ‘vokuahulilila’ Sesusi apopia, ovokuehika movola 17.

Pokumanuhula onthengele-popia yae, Sesusi apopi etyi tyaendele konthyulilo yonthiki oyo, ati: “Etyi kuanthikovela, hekulu yepia aihana omunthu wokufeta ovaundapi ati: ‘Ihana ovaundapi ovefete onombongo mbavo, himbikila ko vokuahulila ovitulila ko vokuatetekela.’ Etyi vokuahimbika koola 17 veya, kese wike apewa ondenaliu ike. Ngotyo, etyi vokuatetekelele veya, avasoko okuti hamwe mavapewa vali unene, mahi navo kese umwe apewa ondenaliu ike. Etyi veitambula, avahimbika okuñgoñga na hekulu yeumbo avati: ‘Ovanthu ava vaundapa vala oola ike, mahi ove wevefeta otyipuka tyike no onthue tuaundapa unene onthiki aiho momutenya watokota!’ Mahi omuhona akumbulula umwe puvo ati: ‘Panga liange, ame hikulingi natyike tyapenga. Ove kuetavelele ndyikufete ondenaliu ike? Tambula onombongo mbove oende. Ame nahanda okufeta ovaundapi ava vaundapa oola ike otyipuka tyike no ove. Okuti ame hipondola okulinga etyi nahanda novipuka viange muene? Ine ove walinga onkhi mokonda nevelinga nawa?’ Ngotyo, vana vahulilila mavakakala ova tete, iya ova tete mavakahulilila.” — Mateusi 20:8-16.

Ovalongwa tyafuile velipulile oityi onondaka mbahulilila monthengele-popia ya Sesusi mbuhangununa. Oñgeni ononkhalamutwe mbova Sundeu, vokusoka okuti ovo “ova tete” ankho “mavekesaililwa”? Iya oñgeni ovalongwa va Sesusi mavakala “ova tete”?

Ovalongwa va Sesusi, vana ova Faliseu na vakuavo vasoka okuti ovo “vahulilila,” ankho mavakakala “ova tete” kokupewa ondyambi. Nononkhia mba Sesusi, ova Isilayeli kokutyiwa ankho mavapolwa-ko iya Huku ankho mapake-ko elongo epe, “o Isilayeli ya Huku.” (Ova Galata 6:16; Mateusi 23:38) Suau Batisita ankho ukahi nokupopia ovanthu ovo etyi ati makuya omuvo ovanthu mavambatisalwa nononkhono mba Huku. Vana ‘vokuahulilila’ ankho mavatetekela okutambula ombatisimu oyo, avapewa elao liokukala onombangi mba Sesusi “alo kononthele mbokokule-kule mbohi.” (Ovilinga 1:5, 8; Mateusi 3:11) Mokonda ovalongwa ankho vanoñgonoka epiluluko olio enene Sesusi ankho ekahi nokupopia, tyafuile vaimbukile okuti ankho mavayalwa nononkhalamutwe mbonongeleya, vana vokuakala ‘ovasaililwa.’