Ginsidngan pa la ni Jesus an iya mga mamarati ha Perea nga “damu nga nahiuuna an mahiuurhi, ngan an nahiuurhi mahiuuna.” (Mateo 19:30) Ginpabug-atan niya ini pinaagi hin ilustrasyon mahitungod han mga trabahador ha usa nga urubasan:

“An Ginhadian han langit pariho hin tag-iya han urubasan nga ginawas hin temprano ha aga basi mamiling hin mga trabahador ha iya urubasan. Han nagkauyon hiya ngan an mga trabahador nga suholan hira hin usa ka denaryo an adlaw, ginpakadto niya hira ha urubasan. Paggawas utro niya han mga alas-9 ha aga, nakita niya an iba nga nagtitinindog ha merkado kay waray trabaho, ngan ginsidngan hira, ‘Pakadto liwat kamo ha urubasan, ngan susuholan ko kamo han angay ha iyo.’ Salit kinadto hira. Paggawas utro han tag-iya han mga alas-12 ha udto ngan han mga alas-3 ha kulop, amo gihapon an iya ginbuhat. Ha urhi, paggawas niya han mga alas-5 ha kulop nakita niya an iba nga nagtitinindog, ngan nagsiring hiya ha ira, ‘Kay ano nga nagtitinindog kamo dinhi ha bug-os nga adlaw nga waray gintatrabaho?’ Binaton hira, ‘Tungod kay waray nagpapatrabaho ha amon.’ Iya ginsidngan hira, ‘Pakadto liwat kamo ha urubasan.’”—Mateo 20:1-7.

An mga mamarati ni Jesus posible nga nakahunahuna kan Jehova nga Dios han hinbatian nira an mahitungod han “Ginhadian han langit” ngan “tag-iya han urubasan.” Iginpapakilala han Kasuratan hi Jehova sugad nga an tag-iya han urubasan, nga nagrirepresentar ha nasud han Israel. (Salmo 80:8, 9; Isaias 5:3, 4) Adton mga sakop han Balaud nga kasabotan iginpariho ha mga trabahador ha urubasan. Pero hi Jesus diri naghihisgot han naglabay. Iginhuhulagway niya an kahimtang ha iya panahon.

An mga lider han relihiyon, pariho han mga Pariseo nga nagsari kan Jesus hadto mahitungod han pagdiborsyo, padayon unta nga nag-aalagad ha Dios. Pariho hira hin bug-os-panahon nga mga trabahador nga naglalaom hin kompleto nga bayad, an suhol nga usa ka denaryo para han usa ka adlaw nga pagtrabaho.

Ginhuhunahuna han mga saserdote ngan han iba hini nga grupo nga an ordinaryo nga mga Judio gutiay la an nahihimo ha pag-alagad ha Dios, pariho ha mga trabahador nga waray magtrabaho ha bug-os nga adlaw ha urubasan han Dios. Ha ilustrasyon ni Jesus, hira an kalalakin-an nga ginpatrabaho ha “mga alas-9 ha aga” o mga alas-12 ha udto, ngan mga alas-3 ha kulop, ngan ha urhi mga alas-5 ha kulop.

An kalalakin-an ngan kababayin-an nga sumurunod ni Jesus gintatagad nga “ginpanhimaraot.” (Juan 7:49) Ha kadak-an han ira kinabuhi, parapangisda o trabahador hira. Katapos, han katrakdag han 29 C.E., “an tag-iya han urubasan” nagsugo kan Jesus nga tawagon inin ubos nga mga tawo basi magtrabaho para ha Dios sugad nga mga disipulo han Kristo. Hira an “nahiurhi” nga gin-unabi ni Jesus, an mga trabahador nga nagtikang han alas-5 ha kulop.

Ha pagtapos hini nga ilustrasyon, iginhulagway ni Jesus an nahitabo katapos han trabaho: “Han gab-i na, ginsidngan han tag-iya han urubasan an iya tinaporan, ‘Tawaga an mga trabahador ngan ihatag an ira suhol, tikang ha nahiurhi ngadto ha nahiuna.’ Pag-abot han mga trabahador nga nagtikang han mga alas-5 ha kulop, an tagsa ha ira nakakarawat hin usa ka denaryo. Salit pag-abot han mga nahiuna, naghunahuna hira nga makarawat hira hin sobra pa hito, pero usa ka denaryo liwat an ira nakarawat. Pakakarawat nira hito nagreklamo hira ha tag-iya han urubasan, ‘Ini nga mga nahiurhi usa la ka oras nga nagtrabaho pero an suhol ha ira imo iginpariho ha amon nga nagtrabaho ha bug-os nga adlaw ngan nag-antos hin sobra nga kapaso!’ Sugad nga baton ha usa ha ira hiya nagsiring, ‘Sangkay, waray ako pakasala ha imo. Diri ba nagkauyon kita ha suhol nga usa ka denaryo? Karawata an para ha imo ngan lakat. Karuyag ko hatagan ini nga nahiurhi hin pariho han imo nakarawat. Diri ba katungod ko nga buhaton an anoman nga karuyag ko ha akon mga panag-iya? O naaawa ka ba tungod kay maopay ako?’ Hini nga paagi an mga nahiuurhi mahiuuna, ngan an mga nahiuuna, mahiuurhi.”—Mateo 20:8-16.

Bangin nahipausa an mga disipulo ha nahitabo ha kataposan hito nga ilustrasyon ni Jesus. Paonan-o an Judio nga mga lider han relihiyon nga naghunahuna nga hira an “nahiuuna,” “mahiuurhi”? Ngan paonan-o an mga disipulo ni Jesus “mahiuuna”?

An mga disipulo ni Jesus nga ginhuhunahuna han mga Pariseo ngan han iba sugad nga “nahiuurhi,” amo an “mahiuuna” pagkarawat han bug-os nga suhol. Kamatay ni Jesus, an tunan-on nga Jerusalem isasalikway, ngan an Dios magpipili hin bag-o nga nasud, “an Israel han Dios.” (Galacia 6:16; Mateo 23:38) Gin-unabi ni Juan nga Parabaptis an sugad nga mga indibiduwal han naghisgot hiya mahitungod han tiarabot nga bawtismo pinaagi han baraan nga espiritu. Adton mga “nahiuurhi” amo an siyahan nga makarawat hito nga bawtismo ngan tatagan hin pribilehiyo nga magin mga saksi ni Jesus “tubtob ha pinakahirayo nga lugar ha tuna.” (Buhat 1:5, 8; Mateo 3:11) Tungod kay nasantop gud han mga disipulo ito nga daku nga pagbag-o nga gin-unabi ni Jesus, bangin nahunahuna nira nga maieksperyensyahan nira an duro nga kangalas han mga lider han relihiyon, nga “mahiuurhi.”