Kinde ma Yesu ku julubne giweko Perea ku yo pinyne i wotho migi ma gibecidho ko i Yerusalem, gikadhu kulo Yordan ceng’ini ku Yeriko. Gibewotho karacelo ku dhanu mange ma gibecidho bende i Kadhukuwijo mi oro 33 R.M.

Yesu utelo yo iwang’ julubne, ebedhulo woth kara etund con i adhura pi Kadhukuwijo. Re lworo ubenego julubne. Iwang’e, saa ma Lazaru utho man Yesu ubino yikere pi niai kud i Perea kara ecidh i Yahudi, Thoma uyero ni juwadi kumae: “Wan bende wacidhu kara wathou wakugi.” (Yohana 11:16, 47-53) Lworo ubenego julubne dre, pilembe kan ecidho i Yerusalem jucopo wok make.

Kara jukwenda kud gipoi apoya ku lembe ma biwok nwang’e, Yesu ucidho kugi ang’et nyanok, man ewacu igi kumae: “Nen, waidho malu Yerusalem; Wod dhanu de jubimie ni julam ma dongo ku jugorcik; man gibipoko lembe pare rac de ya etho, gibimie de ni Thekdhanumange ya gicaye, gifode de, man gigure: i ceng’ mir adege ke ebicer.”​—Matayo 20:18, 19.

Eni tie wang’ mir adege ma Yesu ubeyero pi tho man pi cer pare ni julubne. (Matayo 16:21; 17:22, 23) Re maeni ebeyero igi nia jubigure iwi yen mi can. Julub giwinje, re ginyang’ ungo nia ebemito yero ang’o. Nyo saa moko gibegeno nia Ker mir Israel ucidok kendo kakare iwi ng’om, pieno giparu nia gicopo nwang’u dwong’ ku yung karacelo ku Kristu i Kerne.

Ikind dhanu ma gibewotho kugi, min Yakobo giku Yohana, ma copo bedo Salome de nuti. Yesu umio nying’ moko ni jukwenda ario maeno, ma thelembe mi nying’ne tie “Wot morpolo” pilembe gibino dhanu ma kumgi cek pio pio. (Marko 3:17; Luka 9:54) Nwang’u iwang’e de gilar gicaku pidho i igi pidoic mi bedo ma kwong’a  i Ker pa Kristu. Meggi ung’eyo lembuno maber. Re kawoni ebino nikwayu pigi ibang’ Yesu; erum i the tiende man ekwaye nia etim lembe moko pi nyithinde. Yesu upenje kumae: “Iyenyo ang’o?” Ewacu kumae: “Dong’ ing’ol ya wota ario maeni gibin gijany, acel yo ku cingi ma yor acwic, acel ke yo ku cingi ma yor acam, i Ker peri.”​—Matayo 20:20, 21.

I andha, Yakobo giku Yohana re ma gioro meggi ibang’ Yesu. Pieno Yesu upenjogi kumae: “Wung’eyo gin ma wukwayu ngo. Wucopo madhu kikombe ma fodi nyanok abimadhu?” Gidwoko ire kumae: “Wacopo.” Nwang’u iwang’e nyanok, Yesu uai ukoro igi nia ebinwang’u lewic kud acidi. (Matayo 20:22) Re ubenen nia fodi asu ginyang’ ungo nia kikombe ma Yesu ubeweco pire, ubenyutho lembe maeno ma binwang’e.

Yesu uyero igi asu kumae: “Kikombe para wubimadhu andha: ento bedo yo ku cinga ma yor acwic, yo ku cinga ma yor acam de, en e para ngo ya ami; ento en e ni ju ma Vwa yiko igi.”​—Matayo 20:23.

Kinde ma jukwenda apar mange giwinjo pi kwac maeno pa Yakobo giku Yohana, kwinyo umakugi. Copere nia Yakobo giku Yohana re ma gigam giwodho wang’gi lee ikind jukwenda nindo moko ma gipiemiri nia ng’a ma dit nisagu. (Luka 9:46-48) Lembe maeno m’uwok unyutho nia jukwenda apar ario zoo gigam gitio ngo ku juk ma Yesu umio igi, nia ukwayu gibed ve awiya ma thindho. Fodi asu paru mi bedo ma kwong’a uthum ungo iwigi.

Yesu unwang’u nia ukwayu etwiny paru migi iwi thubiri m’uwok ikindgi. Elwong’o juapar ario karacelo man emio igi juk ku mer, ewacu kumae: “Wung’eyo nia ju ma gibimo wi Thekdhanumange girwodho i wigi; judongo migi de gidhiro wigi. Ento ebedo kumeno ngo i kindwu: ento ng’atu ma tek uyenyo edok dwong’ i kindwu, ebibedo jatim iwu; man ng’atu ma tek uyenyo ebed ma kwong’a i kindwu, ebibedo ni [jamiru mwu] ceke.”​—Marko 10:42-44.

Yesu unyutho igi lapor pare gire ma gicopo lubo. Eyero kumae: “Cil calu Wod dhanu bino ya jutim ire ngo, ento kara etim, emi kwo pare de ni gony mi dhanu dupa.” (Matayo 20:28) Pi oro adek kumeni, Yesu utimo ni jumange, man kawoni ebecitho athoa zoo pi dhanu! Julub de gicikiri nilubo lapor pa Kristu, niwacu ukwayu gibed ayika nitimo ni jumange kakare niyenyo nia jutim igi, man ubekwayu gibed ve awiya kakare niyenyo dito.