Yezu n’a ka kalandenw ye Pere mara cɛtigɛ worodugu fan fɛ ani u be tagara Zeruzalɛmu. U be Zurudɛn baji cɛtigɛra sisan, Zeriko gɛrɛfɛ. Mɔgɔ wɛrɛw be n’u ye, ani u fana be tagara saan 33 ka Tɛmɛnkan seli la.

Yezu be tagamana a ka kalandenw ɲɛfɛ. A b’a fɛ ka se joona sanni Tɛmɛnkan seli ka daminɛ. Nka, a ka kalandenw sirannin lo. Tuma min na Lazari tun sara ani Yezu tun be bɔra Pere ka taga Zude mara la, Toma y’a fɔ kalanden tɔɔw ye “k’u k’a to u be taga yen u bɛɛ ka sa ɲɔgɔn fɛ.” (Zan 11:16, 47-53). Siranya min be kalandenw na, o be faamu sabu farati b’a la ka taga Zeruzalɛmu.

Koo min bena u sɔrɔ Zeruzalɛmu, Yezu y’a ka cidenw labɛn o kama. A y’u weele dan na, k’a fɔ u ye ko: “Ayiwa, an be tagara Zeruzalɛmu. O yɔrɔ la, u bena Mɔgɔ Dencɛ don sarakalasebagaw kuntigi ni sariya karamɔgɔw bolo. U ben’a fɔ ko a ka kan ka faga. U ben’a don siya wɛrɛw bolo, olu bena yɛlɛ a ma, k’a bugɔ ni golokami ye, k’a gwengwen lɔgɔ kan. Nga tile sabanan loon a bena kunun.”—Matiyo 20:18, 19.

A siɲɛ sabanan lo ye nin ye Yezu b’a ka saya n’a sukununi koo fɔra a ka kalandenw ye (Matiyo 16:21; 17:22, 23). Nka, sisan a y’a fɔ k’u bena ale gwengwe yiri lo kan walisa k’a faga. U y’a lamɛn, nka u m’o kuma faamu. N’a sɔrɔ u b’a miirila ko a bena Israɛl ka masaya sigi kokura dugukolo kan. O la, olu bena bonya ni nɔɔrɔ sɔrɔ o masaya kɔnɔ ni Krista ye.

Salome fana tun be tagara n’u ye Zeruzalɛmu. A be komi ale lo tun ye ciden Zaki ni Zan bamuso ye. Yezu tun ye tɔgɔ dɔ la o ciden fila kan min kɔrɔ ko “mɔgɔ minw ka fari i n’a fɔ sanpɛrɛn.” N’a sɔrɔ, Yezu y’o tɔgɔ la u kan sabu u t’u ka koo bila ka suma (Mariki 3:17; Luka 9:54).  Kabi wagati damanin, o ciden fila tun b’a fɛ ka lɔyɔrɔba sɔrɔ Krista ka Masaya kɔnɔ. U bamuso tun b’o kala ma. A gwɛrɛla k’a kunbiri gwan Yezu kɔrɔ walisa k’a deli a deenw ye. Yezu y’a ɲininga ko: “E be mun le fɛ?” A y’a jaabi ko: “N’i sigira i ka masaya la tuma min na, a to n deen fila nunu ka sigi i kɔrɔ, mɔgɔ kelen i kinibolo fɛ, kelen i numanbolo fɛ.”—Matiyo 20:20, 21.

Siga t’a la, Zaki ni Zan lo y’a ɲini a fɛ a ka Yezu deli o koo la. A ma mɛɛn, Yezu tun y’a fɔ u ye ko mɔgɔw bena ale lamaloya ani k’a mafiɲɛya. O kama, a y’a fɔ u ye ko: “Aw be fɛɛn min daali, aw t’o lɔn. Tɔɔrɔ min bena ne sɔrɔ, aw be se k’o ɲɔgɔn muɲu wa?” U y’a fɔ ko: “An be se.” (Matiyo 20:22). A be komi u bele ma Yezu ka kuma kɔrɔ faamu.

Nka Yezu y’a fɔ u ye ko: “Aw kɔni bena o tɔɔrɔ muɲu. Nga ka sigi ne kinibolo, walima ne numanbolo fɛ, ne t’o latigɛbaga ye. N Faa y’o yɔrɔw labɛn minw ye, u bena di olu le ma.”—Matiyo 20:23.

Zaki ni Zan ye min ɲini Yezu fɛ, ciden tan tɔɔw y’o mɛn minkɛ, u dimina u kɔrɔ. Tuma min na cidenw tun be sɔsɔli kɛra walisa k’a lɔn min ye mɔgɔba ye u cɛma, n’a sɔrɔ Zaki ni Zan lo y’a to o sɔsɔli gwanna (Luka 9:46-48). A ka kɛ min o min ye, Zan ni Zaki ye min ɲini Yezu fɛ, o b’a yira ko ciden 12 nunu ma Yezu ka ladili sira tagama. U bele b’a fɛ ka lɔyɔrɔba sɔrɔ.

Komi kalanden tan nunu dimina Zaki ni Zan kɔrɔ, o kama, Yezu y’a latigɛ k’o koo ɲɛnabɔ. A ye ciden tan ni fila nunu bɛɛ weele ani ka ladili di u ma ni kanuya ye ko: “Aw b’a lɔn ko diɲɛ kɔnɔ, siya ɲamɔgɔw be kuntigiya kɛ tɔw kan, mɔgɔbabaw be fanga yira u la. A man kan ka kɛ ten aw cɛma. Ni mɔgɔ min b’a fɛ ka kɛ mɔgɔbaba ye aw cɛma, o tigi ka kan ka kɛ aw ka baaraden ye. Ni mɔgɔ min b’a fɛ ka kɛ ɲamɔgɔ ye aw cɛma, o ka kan ka kɛ aw bɛɛ ka jɔɔn ye.”—Mariki 10:42-44.

Yezu y’a yɛrɛ ka ɲɛyirali fɔ u ye walisa u k’ale ladegi. A ko: “Mɔgɔ Dencɛ ma na waasa mɔgɔw ka baara kɛ a ye. Nga, a nana ka mɔgɔw mako ɲa, ani k’a yɛrɛ nii di ka kɛ mɔgɔ bɛɛ nii kunmabɔ sara ye.” (Matiyo 20:28). A saan saba ɲɔgɔn ye nin ye, Yezu be tɔɔw mako ɲɛna ani a bele bena to k’o kɛ fɔɔ ka taga se a saya ma! Kalandenw ka ɲi k’a ladegi: u ka ɲi ka baara kɛ tɔɔw ye sanni k’a ɲini tɔɔw ka baara kɛ olu ye. U ka ɲi k’u yɛrɛ majigi i n’a fɔ denmisɛnw sanni k’a ɲini ka kɛ tɔɔw ɲɛmɔgɔ ye.