Ari Perea, Jesus enggau bala murid iya deka ngagai Jerusalem, sida nengah Sungai Jordan semak Jeriko. Orang bukai mega enggau sida laban deka ngintu Pengerami Paska ba taun 33 M.

Jesus bejalai dulu ari sida, laban iya deka tumu datai ba Jerusalem sebedau Pengerami Paska berengkah. Tang bala murid iya berasai takut. Sebedau tu, lebuh Lasarus mati lalu Jesus deka ngagai Judea, Thomas madah ngagai bala murid ke bukai: “Aram kitai mega mupuk, ngambika kitai sama mati enggau iya.” (John 11:16, 47-53) Nya alai nyawa sida dalam bahaya enti sida ngagai Jerusalem, lalu kitai ulih mereti kebuah sida berasai takut.

Ngambika ulih nyediaka sida ke penusah ke deka nyadi, Jesus mai bala rasul iya ke tisi lalu madahka ngagai sida: “Kitai benung mupuk ngagai Jerusalem. Anak Mensia deka diserahka ngagai bala tuai imam enggau ngagai bala penulis Adat. Sida deka ngasuh iya diukum bunuh. Udah nya, sida deka nyerahka iya ngagai orang bansa bukai. Iya deka dikelese, disipat, lalu dibunuh ba tiang. Tang ba hari ti ketiga, iya deka diidupka baru.”—Matthew 20:18, 19.

Tu kali ketiga Jesus madah ngagai bala murid iya pasal pemati enggau pengangkat iya ari mati. (Matthew 16:21; 17:22, 23) Tang baru kali tu iya madah, iya deka dipantang ba tiang. Bala murid Jesus ninga utai ke disebut iya, tang sida enda meretika jaku iya. Sida engka ngumbai Jesus deka mulaika baru perintah Israel ba maya nya, laban sida deka nerima basa enggau mulia merintah enggau Kristus ba dunya.

Maya nya, Salomi bisi enggau ba pejalai ngagai Jerusalem. Iya engka indai rasul James seduai John. Jesus meri nama “Anak Guntur” ngagai dua iku rasul nya laban seduai iya amat  ransing. (Mark 3:17; Luke 9:54) Dua iku rasul tu bisi juluk ati deka ngulihka penuduk ti tinggi ba Perintah Kristus, lalu Salomi nemu pengingin sida. Nya alai iya mansang ngagai Jesus lalu besugang, minta siti utai. Ku Jesus nanya: “Nama utai dipinta nuan?” Ku iya: “Awakka anak aku dua iku tu, duduk ba sepiak kanan enggau kiba nuan dalam Perintah nuan.”—Matthew 20:20, 21.

Kebendar iya, James enggau John ke minta utai nya. Tang Jesus baru udah madah, iya deka balat dikemaluka sereta diperinsa lebuh diukum bunuh. Nya alai Jesus madah ngagai seduai iya: “Seduai enda nemu utai ti dipinta diri. Kati seduai ulih ngirup ari mangkuk ti deka diirup aku?” Seduai nyaut: “Ulih.” (Matthew 20:22) Taja pia, sida engka agi enda meretika jaku Jesus.

Udah nya, Jesus madah ngagai sida: “Seduai endang deka ngirup ari mangkuk aku. Tang sapa ke duduk ba sepiak kanan enggau kiba aku, ukai aku ke nentuka nya. Apai aku udah nentuka sapa ke duduk ba dia.”—Matthew 20:23.

Pengudah sepuluh rasul ke bukai ninga utai ke dipinta James enggau John, sida amat ringat. Sebedau tu, lebuh bala rasul bekelikuh pasal sapa ke pemadu besai, James enggau John engka mayuh agi bejaku ari rasul ke bukai. (Luke 9:46-48) Tang enda ngira nama utai ke udah nyadi, 12 iku rasul tu enda nitihka jaku lalau Jesus pasal pemaruh ati. Sida agi keran deka penuduk ti tinggi.

Jesus deka mutarka penanggul ke nyadi ba entara bala rasul iya. Iya ngangauka 12 iku nya lalu meri jaku lalau enggau nelap: “Kita nemu, orang ke dikumbai pemerintah enggau bala tuai ke merintah orang bansa bukai bekuasa sereta nekan pengidup rayat sida. Tang kita enda tau baka nya. Barang sapa deka nyadi lebih agi ba bala kita, iya patut ngintu kita. Lalu barang sapa ke deka nyadi dulu ba bala kita, iya patut nyadi ulun kita.”—Mark 10:42-44.

Jesus meransang sida nitihka teladan iya. Ku iya: “Anak Mensia datai ukai minta diri diintu, tang iya datai laban deka ngintu orang bukai, lalu nyerahka nyawa diri nyadika tebus ke orang mayuh.” (Matthew 20:28) Udah kira-kira tiga taun Jesus bebendar ngintu orang bukai, nyentukka iya sanggup nyerahka nyawa iya ke mensia! Bala murid patut neladan Jesus. Sida patut ngintu orang bukai, ukai minta diri diintu. Sida mega patut baruh ati, ukai inginka penuduk ti tinggi.