Yesu ye alongoki andi basisidi e zunga ina kuna sude ya Pereia, basaukidi o Nkoko a Yodani una lukufi ye Yeriko kimana bakota muna Yerusaleme. Bena kumosi ye ndong’a wantu yizidi ku Nkinzi a Nduta ya mvu 33 wa tandu kieto.

Yesu ovitidi alongoki andi kuna ntwala, kadi ozolele kota mu mbanza vitala o nkinzi a Nduta wayantika. Kansi alongoki wonga bena wau. Kadi vitila Lazaro kafwa, Yesu muna Pereia kakala, i bosi kayenda kuna Yuda. Toma wavovesa akwandi alongoki vo: “Twenda mpe, kimana twafwa yandi.” (Yoane 11:16, 47-53) Dianu vo, wau bekwendanga ku Yerusaleme, mu vonza bena. Kuma kiasikila bena kiau mu mon’o wonga.

Muna kubakubika e ngindu mu mambu mekubabwila, Yesu onete alongoki andi vana fulu kia yau kaka, ubavovese vo: “Se tutomboka kuna Yerusaleme, o Mwan’a muntu oyekolwa vana moko ma nganga zambuta ye asoneki. Bekunzengela tumbu kia lufwa yo yekolwa vana moko ma esi zula bansakanena yo kunzwabula yo kumvondela vana nti; ofulwa muna lumbu kietatu.”—Matai 20:18, 19.

Eyayi i nkumbu a ntatu o Yesu kavovese alongoki andi mu kuma kia lufwa lwandi yo lufuluku. (Matai 16:21; 17:22, 23) Kansi tu, o nkumbu wau ovovele vo vana nti kevondelwa. Alongoki bawidi mana kavovele, kansi ke babakwidi mo ko. Nanga mu vingila bena e mvutulwis’a kintinu kia Isaele ova nza, kimana bamona o nkembo ye songwa o zitu muna kintinu kiaki ova nza kumosi yo Kristu.

O ngudi a Yakobo wa ntumwa yo Yoane, dilenda kala Salome, una mpe muna buka kia wantu bekwendanga ku Yerusaleme. Yesu wavana Yakobo yo Yoane e nkumbu ina ye nsasa vo, “Wan’a Mwandazi,” mu kuma kia fu kiau kia funga makasi. (Maku 3:17; Luka 9:54) Tuka kolo, yau awole bena yo luzolo lwa tambula fulu yatundalala muna Kintinu kia Kristu. O ngudi au otomene dio zaya. Owau, wizidi vovela wan’andi kwa Yesu, ofukamene, olombele vo kasongwa e dienga. Yesu unyuvuidi vo: “Adieyi ozolele?” Oyandi ku vo: “Yambula vo wan’ame awaya yau awole, bavuanda muna Kintinu kiaku, mosi kuna koko kwaku kwalunene, wankaka kuna koko kwalumonso.”—Matai 20:20, 21.

E ngindu zazi kwa Yakobo yo Yoane zitukidi. O Yesu wau kwandi kabasamunwini e mpasi ye nsoni kemweswa. Muna kuma kiaki, ubavovese vo: “Oyeno ke nuzeye dio ko dina nulombele. Nga nulenda nua e kopo dina inu’e?” Bamvutwidi vo: “Tulenda kweto.” (Matai 20:22) Yamu wau, ke babakwidi ko e nsasa diambu diadi.

Kansi, Yesu ubavutwidi vo: “Kieleka, nulenda kweno nua e kopo diame, kansi edi dia vuanda ku koko kwame kwalunene ye kwalumonso, ke diame ko diakunuvana dio, kadi dia awana kaka bakubikilwa dio kwa Se diame.”—Matai 20:23.

E ntumwa zankaka vava bawidi e diambu divangidi Yakobo yo Yoane, bafungidi makasi. Nga Yakobo yo Yoane bateka zayisa e ngindu zazi kwa alongoki ankaka vava batantananga kana nani muna yau osundidi e? (Luka 9:46-48) Ke dina kwandi mfunu ko, kadi dina divangamene disongele vo yau Kumi ye Zole ke balemvokele ko e longi bavewa kwa Yesu dia kuyikulula. Bakinu kaka yo luzolo lwa kala akwa tunda.

Yesu ozolele fokola e ntantani zazi ye kimpala zituese. Obokele yau Kumi ye Zole, ubavene longi kuna zola kwawonso. Ubavovese vo: “Nuzeye wo vo awana beyalanga e zula, bediatidilanga nkangu, e nene miau mpe bena ye wisa muna yau. Ke wau ko difwete kala vovo nwina; kansi konso ona ozolele kala nene vovo nwina, kafwete kala selo kieno, konso ona ozolele kala se ntu vovo nwina, kafwete kala se ntaudi kwa yeno awonso.”—Maku 10:42-44.

Yesu ubavovese vo bafwete tanginina e mbandu andi. Ovovele vo: “Mwan’a muntu, kayiza sadilwa ko, kansi kasadila kaka yo vana moyo andi se lukûlu lwa wantu ayingi.” (Matai 20:28) Se mvu ntatu miviokele kala, Yesu osamunaga e nsangu zambote muna wete dia wantu akaka. Otambulwila nkutu vo kafwa muna wete dia wantu awonso! Alongoki a Yesu bafwete tanginina e fu kia Kristu kia sadila akaka ke mu sadilwa ko. Bakala nze kingiana-ngiana, ke bavavi tunda ko.