Ka Yesu kod jopuonjrene dhi nyime gi wuodhgi mochomo Jerusalem ka gia Perea, ging’ado Aora Jordan machiegni gi Jeriko. Nitie jomamoko ma bende wuotho kodgi ka gidhi e sap Pasaka mar higa 33.

Yesu otelo to jopuonjrene luwe. Odwaro chopo e taon mar Jerusalem ka sawo mar Pasaka pok ochakore. Jopuonjrene to nigi luoro. E kinde motelo ne mano, kane Lazaro otho to Yesu ne chiegni wuok Perea mondo odhi Judea, Thoma nowacho ne jowetene niya: “Wan bende wadhiuru mondo watho kode.” (Johana 11:16, 47-53) Kuom mano, dhine Jerusalem nyalo keto ngimane kama rach. Omiyo, luoro ma jopuonjrene nigo winjore.

Yesu dwaro ikogi ne gima biro timorene. Omiyo, odhi gi jootene tenge kae to owachonegi kama: “Koro waidho nyaka Jerusalem, kendo Wuod dhano ibiro chiw e lwet jodong-jodolo gi jondiko. Gining’adne buch tho kendo ginichiwe e lwet ji moa e ogendni mamoko mondo gijare, gichwade, kendo ginege e yath; to e odiechieng’ mar adek ibiro chiere.”​—Mathayo 20:18, 19.

Koro ma e kinde mar adek ma owachoe ne jopuonjrene ni obiro tho kendo obiro chier. (Mathayo 16:21; 17:22, 23) Kata kamano, wang’ni to owachonegi ni ibiro nege e yath. Winjo to giwinje, kata kamano ng’eyo tiend gima owachono e ma otamogi. Nyalo bedo ni giparo ni loch mar pinyruodh Israel idhi duok kendo, mondo giyud duong’ kod luor e pinyruodh Kristo e piny.

Min joote ma gin Jakobo kod Johana bende en achiel kuom joma giwuothogo. Nenore ni en e ma nyinge en Salome. Yesu osemiyo joote ariyogo nying ma tiende ni “Yawuot Mor Polo.” Samoro omiyogi nyingno nikech chuny ma gin-go mar kawo okang’ mapiyo. (Mariko 3:17; Luka 9:54) Kuom kinde, joote ariyogi osebedo gi  gombo mar bedo gi duong’ e Pinyruodh Kristo. Nikech min-gi bende ong’eyo mano, odhi ir Yesu e lo yawuotego. Okulore e nyim Yesu kokwaye mondo otimne gimoro. Yesu penje niya: “Ang’o midwaro?” Odwoke kama: “Gol chik mondo yawuota ariyogi obed e Pinyruodhi, ng’at achiel e badi korachwich to machielo e badi koracham.”​—Mathayo 20:20, 21.

Adier en ni kwayono owuok kuom Jakobo kod Johana. Nikech Yesu eka oa wacho wach wich-kuot kod ajara midhi jarego, owachonegi niya: “Ok ung’eyo gima ukwayo. Be unyalo madho okombe ma achiegni madhoni?” Gidwoke kama: “Wanyalo.” (Mathayo 20:22) To nenore ni pod ok giwinj tiend gima Yesu wuoyoe.

Kata kamano, Yesu wachonegi niya: “Adier ubiro madho okombena, kata kamano an ok ema ami ji thuolo mar bet e bada korachwich kata koracham, to Wuora e ma miyo joma oseikonegi.”​—Mathayo 20:23.

Mirima mako joote mamoko apar bang’ fwenyo gima Jakobo kod Johana okwayono. Dibed ni Jakobo kod Johana e ma dwondgi osebedo ka winjore moloyo e kinde ma joote osebedo gi ywaruok e wach dwaro duong’? (Luka 9:46-48) Bed ni en kamano kata ooyo, kwayogino nyiso ni ji Apar Gariyogo duto pok otiyo gi puonj ma Yesu osemiyogi motelo ni gibed joma duokore piny. Pod gisiko gi gombogi mar dwaro duong’.

Yesu temo mondo otiek ywaruok ma jootego nigo gie sano. Oluongo ji Apar Gariyogo duto kae to orieyogi gi muolo kama: “Ung’eyo ni joma nenore ni locho e wi ogendni timore ruodhi e wigi kendo joma nigi duong’ tiyo gi teko e wigi. Mano ok e kaka onego obed e kindu; to ng’at ma dwaro bedo maduong’ e kindu nyaka bed jatiju, kendo ng’at ma dwaro bedo mokwongo e kindu nyaka bed misumba jomamoko duto.”​—Mariko 10:42-44.

Yesu wachonegi ni onego giluw ranyisine owuon. Oleronegi kama: “Wuod dhano nobiro, ok ni mondo ji otine, to mondo oti ne ji kendo mondo ochiw ngimane obed rawar ne ji mang’eny.” (Mathayo 20:28) Kuom higni ma dirom adek kama, Yesu osebedo ka timo gik ma konyo jomamoko. To obiro dhi nyime timo kamano nyaka e okang’ mar tho ne oganda dhano! Dwarore ni jopuonjrene bende obed gi chuny ma Kristo nigono mar gombo tiyo ne jomamoko, to ok ni gin e ma mondo otinegi. Kendo dwarore ni gibed joma duokore piny kar manyo migepe mag duong’.