Yesu ndi akusambira ŵaki angumbuka Msinji wa Yorodani kufupi ndi Yeriko. Pa nyengu iyi, atuwanga kumwera kwa Pereya ndipu alutanga ku Yerusalemu. Yiwu ŵenga so limoza ndi ŵanthu anyaki wo akanga ku phwandu la Pasika wa mu 33 C.E.

Pa nyengu iyi, Yesu wayendanga panthazi ndipu akusambira ŵaki azanga muvuli. Iyu wakhumbanga kuchifika ku Yerusalemu phwandu la Pasika lechendayambi. Kweni akusambira ŵaki achitanga mantha. Nyengu yinyaki Lazaro wati wafwa, Yesu we pafupi kutuwa ku Pereya kuluta ku Yudeya, Tomasi wangukambiya akusambira anyaki kuti: “Nasi tiyeni tiluti kuti tikafwiyi nayu limoza.” (Yohane 11:16, 47-53) Mwaviyo, penga pakuvwika kuti akusambira aku Yesu achiti mantha chifukwa kuluta ku Yerusalemu kwenga kuŵika umoyu wawu pangozi.

Yesu wakhumbanga kunozgekereska akutumika vinthu vo vatingi vimuchitikiyengi kunthazi. Mwaviyo, iyu wanguŵatole pamphepeti ndipu wanguŵakambiya kuti: “Sonu tiluta ku Yerusalemu ndipu Mwana wa munthu wamuperekeka ku ŵara ŵa asembi ndi alembi. Yiwu akumuyeruzga kuti wabayiki, ndipu akumupereka ku ŵanthu amitundu yinyaki kuti amunyozi ndi kumukwechuwa kweniso kuti amubayiyi pachimiti ndipu pa zuŵa lachitatu wazamuyuskika.”—Mateyu 20:18, 19.

Yaka, kenga kachitatu Yesu kukambiya akusambira ŵaki kuti iyu wazamubayika ndipu pavuli paki wazamuyuskika. (Mateyu 16:21; 17:22, 23) Kweni pa nyengu iyi, iyu wangukamba kuti ŵanthu azakumubayiya pachimiti chakutombozgekiyapu. Chinanga kuti yiwu anguvwisiya vo Yesu waŵakambiyanga, kweni anguziŵa cha vo iyu wang’anamuwanga. Panyaki yiwu alindizganga kuti ufumu wa Isirayeli uwezekiyengepu pacharu chapasi ndipu alindizganga kuzikondwa mu ufumu wenuwu limoza ndi Khristu.

Salomi yo watenere kuti wenga anyina aku Yakobe ndi Yohane, nayu wenga pa gulu la ŵanthu wo akanga ku Yerusalemu limoza ndi Yesu. Yesu wangupaska akutumika ŵenaŵa zina lo ling’anamuwa kuti “Ŵana a Limphezi,” chifukwa achitanga vinthu mwaliŵi kweniso  asweranga cha kufya mtima. (Mariko 3:17; Luka 9:54) Kwa nyengu yitali, akutumika ŵenaŵa akhumbanga kuzija ndi udindu wapachanya mu Ufumu waku Khristu. Ndipu anyinawu aziŵanga umampha venivi. Mwaviyo, yiwu angugwada po penga Yesu kuti apemphi vo ŵana ŵawu akhumbanga. Yesu wanguŵafumba kuti: “Mukhumba vinthu wuli?” Yiwu angumuka kuti: “Layizgani kuti mu Ufumu winu, ŵana ŵangu ŵaŵi yaŵa akaje, yumoza kujanja linu lamaryi, munyaki kujanja linu lamazge.”—Mateyu 20:20, 21.

Chinanga kuti ndi Salomi yo wangukamba mazu yanga, kweni Yakobe ndi Yohane ndiwu apemphanga Yesu. Pa nyengu iyi, ndipu Yesu wakamba ŵaka kuti wazamunyozeka kweniso azakumuchitiska soni. Mwaviyo, iyu wanguŵakambiya kuti: “Mutichiziŵa cha cho mupempha. Kumbi mungamwa kapu yo ini nde pafupi kumwa?” Yiwu angumuka kuti: “Hinya tingamwa.” (Mateyu 20:22) Chinanga kuti yiwu anguzomera, kweni anguziŵa cha vinthu vo vatingi viziŵachitikiyengi kunthazi.

Yesu wanguŵakambiya kuti: “Mumwengi nadi kapu yangu, kweni nkhwaku ini cha kusankha kuti uyu wajengi kujanja langu lamaryi, uyu kujanja langu lamazge, kweni Ada ndiwu aziŵa wo aŵanozge kuti aŵapaski.”—Mateyu 20:23.

Akutumika anyaki 10 ŵati ŵavwa vo Yakobe ndi Yohane angupempha, angukwiya ukongwa. Panyaki chenga chifukwa chakuti Yakobe ndi Yohane ndiwu alongoronga ukongwa pa nyengu yo akutumika apindananga kuti mura ukongwa ndi yani pakati pawu. (Luka 9:46-48) Chinanga kuti venga viyo, vo Yakobe ndi Yohane angupempha pa nyengu iyi, vingulongo kuti akutumika wosi 12 anguwugwiriskiya ntchitu cha ulongozgi wo Yesu wanguŵapaska wakuti atenere kuja akujiyuyuwa. Yiwu ŵenga ŵeche ndi mtima wakukhumba udindu.

Yesu wakhumbanga kumalisa nkhani yo yiwu apindananga pa nyengu iyi, kweniso wakhumbanga kuŵawovya kuti ajengi mwakukoliyana. Mwaviyo, Yesu wangudana akutumika wosi 12 ndipu mwachanju, wanguŵapaska ulongozgi wakuti: “Yimwi muziŵa kuti ŵanthu wo awoneka kuti awusa charu ichi achita ufumu pa ŵanthu ŵawu ndipu ŵanthu wo ŵe ndi mazaza akandirizga anyawu. Kweni yimwi mungachitanga viyo cha. Weyosi yo wakhumba kuja mura pakati pinu, waje mteŵeti winu, ndipu weyosi yo wakhumba kuja wakwamba pakati pinu, watenere kuja kapolu waku mosi.”—Mariko 10:42-44.

Yesu wangukambiya akusambira ŵaki kuti akhumbikanga kuchita vinthu nge po iyu wachitiyanga. Iyu wangukamba kuti: “Mwana wa munthu wakuza kuti ŵanthu amuteŵete cha, kweni kuziteŵete ndi kupereka umoyu waki sembi yakuwombole ŵanthu anandi.” (Mateyu 20:28) Kwa vyaka pafufupi vitatu, Yesu wateŵetiyanga ŵanthu anyaki. Ndipu iyu wanguchita so viyo mwakufwiya ŵanthu wosi. Akusambira aku Yesu nawu akhumbikanga kuja nge Khristu. Yiwu akhumbikanga kuja ndi mtima wakukhumba kuteŵete ŵanthu anyaki m’malu mwakuti ŵanthu anyaki ndiwu aŵateŵetiyengi. Yiwu akhumbikanga so kuja akujiyuyuwa m’malu mwa kuja ndi mtima wakukhumba udindu wapachanya.