Jesús chu xtamakgalhtawakgen titaxtumakgo kPerea xlakata nachankgo ksur chu patakutkgo kgalhtuchokgo Jordán lakatsu kJericó. Nialh lhuwa katsankgani xlakata nachankgo kJerusalén. Na kataʼankgo amakgapitsi latamanin xlakata natlawakgo Pascua xla kata 33.

Jesús kapulanima xtamakgalhtawakgen, sokg chaʼamputun kkachikin xlakata natlawa Pascua. Pero xtamakgalhtawakgen pekuankgo, xlakata nina makgas, akxni Lázaro nilh chu Jesús xʼamputun kJudea lata kPerea, Tomás xkawaninit amakgapitsin: «Na kaʼaw, xlakata akxtum nataniyaw Jesús» (Juan 11:16, 47-53). Wa xlakata, tuwa kitaxtu naʼankgo kJerusalén chu max wa xlakata pekuankgo xtamakgalhtawakgen Jesús.

Xlakata nakamakgtaya natayanikgo tuku nakalakgmin, Jesús alakatanu niku kalin chu kawani: «Amaw kJerusalén chu xKgawasa chixku namakamastakan kxmakankan xanapuxkun sacerdotes chu lakgtsokgkinanin. Xlakan natlawakgo pi namakgnikan chu namakamastakgo kxmakankan lakchixkuwin xalak atanu kachikinin xlakata nalikgalhkgamanankgo chu namakgsnokgkgo chu namawakakgo kkgantum kiwi; chu namalakastakwanikan xliʼakgtutu kilhtamaku» (Mateo 20:18, 19).

Uma kilhtamaku xlimakgtutu la Jesús kalitachuwinan pi amaka makgnikan chu pi nalakastakwanan (Mateo 16:21; 17:22, 23). Pero la uku kawani pi namawakakan kkgantum kiwi. Maski xtamakgalhtawakgen kgaxmatnimakgo, ni putum akgatekgskgo tuku Jesús wamputun. Max xlakata kgalhkgalhikgo pi katalakkaxtawilapa xtamapakgsin Israel chu lipaxuwaputunkgo lilanka chu takaknin kʼakgtum tamapakgsin kkatiyatni kxpaxtun Cristo.

Na anta kataʼan Salomé, xtsekan apóstol Santiago chu Juan. Xlakata nipara tsinu lakapuwankgo umakgolh apóstoles, Jesús kalimapakuwi tukuwani nema wamputun «xlakgkgawasan  jilina» (Marcos 3:17; Lucas 9:54). Lata makgasa xlakan makglhtinamputunkgo akgtum lu xlakaskinka putawilh kxTamapakgsin Cristo chu xtsekan katsi. Wa xlakata xla talakatsuwini Jesús chu lakgtatsokgosta xlakata wi tuku naskini xpalakata xlakgkgawasan. Chu Jesús kgalhskin: «¿Tuku lakaskina?». Xla kgalhtinan: «Kawanti pi umakgolh chatiy kilakgkgawasan napaxtutawilakgoyan, chatum kmimpakgastakat chu achatum kmimpakgxwiki anta kminTamapakgsin» (Mateo 20:20, 21).

Pero tuku skima Salomé, wa tuku lakaskinkgo Santiago chu Juan. Wa xlakata, Jesús, tiku aku lichuwinalh tuku xalimaxana ama titaxtu, kawani: «Wixin ni katsiyatit tuku skimpatit. ¿Tlan nalikgotnanatit copa tuku nialh makgas naklikgotnan?». Xlakan wanikgo: «Tlan naklikgotnanaw» (Mateo 20:22). Pero max xlakan ni akgatekgskgo tuku kilhchanima uma.

Maski chuna, Jesús kawani: «Xlikana pi na nalikgotnanatit, pero akit ni kilakgchan nakwan tiku nakimpaxtutawila kkimpakgastakat chu kkimpakgxwiki, wata wa natawilakgo tiku kinTlat chuna kalakkaxwilinikgonit» (Mateo 20:23).

Akxni amakgapitsi kgalhakaw apóstoles katsikgo tuku skinkgonit Santiago chu Juan, lu lisitsikgo. Max Santiago chu Juan wankgo tuku xlakaskinkgo akxni apóstoles lalimaʼakglhuwikgolh xlakata tiku tlakg xlakaskinka (Lucas 9:46-48). Maski ni katsiyaw, tuku lalh kinkamasiyaniyan pi xkgalhkutiykan ni xmakgantaxtimakgo tastakyaw nema kamaxkilh Jesús pi xlitaktujutkan xwanit. Chuntiya lakaskinkgo pi kakamalankika.

Wa xlakata Jesús lakpuwan nalakkaxtlawa uma tuku nitlan chu wilima taʼakglhuwit. Katasani kgalhkutiy xtamakgalhtawakgen chu kalimasiyani talakgalhaman akxni kastakyawa: «Wixin katsiyatit pi tiku kalilakgapaskan chuna la xmapakgsinanin kachikinin, kamapakgsikgo latamanin chuna la lakaskinkgo, chu tiku xlakaskinka litaxtukgo kapuxkunanikgo latamanin. Pero wixin nichuna militlawatkan. Putum tiku lanka litaxtuputun kmilakgstipankan, xlilat nakaskujnani amakgapitsin, chu putum tiku xapulana litaxtuputun kmilakgstipankan, xliskujnanit amakgapitsin» (Marcos 10:42-44).

La uku, Jesús kawani pi xlistalanitkan liʼakxilhtit nema xla kawilininit. Kawani: «Chuna la xKgawasa chixku ni milh xlakata naskujnanikan, wata milh xlakata nakaskujnani amakgapitsin chu xlakata namasta xlatamat chu nakalilakgmaxtu lhuwa latamanin» (Mateo 20:28). Max akgtututa kata la Jesús kaskujnima amakgapitsin chu asta nani xpalakata latamanin. Wa xlakata xtamakgalhtawakgen na xlikgalhitkan uma tayat. Talakaskin nakaskujnanikgo amakgapitsin chu nalikatsikgo la tiku tlakg xaʼaktsujku chu ni nalakpuwankgo pi nakamalankikan.