Jisas wantaim ol disaipel bilong em i pinisim raun bilong ol long hap saut bilong Perea i go olsem long Jerusalem, na ol i brukim wara Jordan klostu long taun Jeriko. Planti man i wokabaut wantaim ol i go long bung bilong Pasova bilong yia 33 C.E.

Jisas i wokabaut i go pas long ol disaipel bilong em, em i tingting long go long Jerusalem paslain long de bilong Pasova. Tasol ol disaipel i pret. Sampela wik bihain long Lasarus i dai na Jisas i laik go long Judia, Tomas i tokim ol narapela: “Yumi tu go na yumi ken i dai wantaim em.” (Jon 11:16, 47-53) Olsem na ol disaipel i pret long i go long Jerusalem.

Jisas i laik bai ol aposel i ken save long ol samting bai painim em, olsem na em i kisim ol i go long wanpela hap na em i tokim ol: “Nau yumi go antap long Jerusalem, na ol bai putim Pikinini bilong man long han bilong ol bikpris na ol saveman bilong Lo, na bai ol i kotim em na tok long em i mas i dai. Na ol bai putim em long han bilong ol man bilong ol arapela lain bai ol i ken tok bilas long em na wipim em na nilim em long pos. Na long namba 3 de bai em i kirap bek.”—Matyu 20:18, 19.

Dispela em namba 3 taim Jisas i bin tokim ol disaipel long em bai dai na kirap bek. (Matyu 16:21; 17:22, 23) Tasol long dispela taim em i tokim ol olsem ol birua bai kilim em i dai na hangamapim em long diwai pos. Ol i harim, tasol ol i no kliagut long tok bilong em. Ating ol i ting olsem Jisas bai kamapim gen kingdom bilong Israel, na ol i laik kisim biknem na namba insait long wanpela kingdom bilong Krais long graun.

Wanpela meri nem bilong em Salome, em mama bilong aposel Jems na Jon, em tu i wokabaut i go wantaim ol long Pasova. Jisas i bin givim nem long dispela tupela aposel olsem, “Ol Pikinini Bilong Klaut i Pairap,” ating Jisas i  bin kolim ol olsem, long wanem, bel bilong ol i save kirap kwik long kros. (Mak 3:17; Luk 9:54) Inap longtaim liklik, tupela i gat tingting long kisim biknem insait long Kingdom Bilong Krais. Na mama bilong tupela i save long dispela tingting bilong ol. Orait nau mama i laik helpim tupela, na em i kam long Jisas na i brukim skru long em, na i tok em i laik askim Jisas long wanpela samting. Jisas i tokim em: “Yu laikim wanem samting?” Na em i tok: “Yu mas tok olsem tupela pikinini man bilong mi i ken sindaun klostu long yu long Kingdom bilong yu, wanpela long han sut bilong yu na narapela long han kais bilong yu.”—Matyu 20:20, 21.

Jisas i save olsem tok meri i kamapim em tingting bilong Jems na Jon. Nau tasol Jisas i bin tokim ol olsem ol man bai mekim nogut long em na kilim em i dai, olsem na em i tok: “Yupela i no save long samting yupela i askim long en. Olsem wanem? Yupela inap dring long dispela kap nau bai mi dring long en?” Tupela i tok: “Mitupela inap.” (Matyu 20:22) Tasol ating tupela i no kliagut long dispela tok i makim wanem samting.

Tasol Jisas i tok: “Tru tumas yupela bai dring long kap bilong mi. Tasol husat bai sindaun long han sut o han kais bilong mi, em i no wok bilong mi long makim. Papa bilong mi bai makim husat bai sindaun long ol dispela sia.”—Matyu 20:23.

Taim 10-pela aposel i harim tok long samting Jems na Jon i askim Jisas long en, ol i kros. Ating bipo tu ol aposel i tok pait long husat i stap namba 1 na ating Jems na Jon i bin go pas long dispela tok pait. (Luk 9:46-48) Maski Jisas i bin givim tok long ol bilong stretim tingting bilong ol, samting nau tupela i askim Jisas long en i kamapim klia olsem 12-pela aposel i no bihainim tok bilong Jisas long pasin bilong daunim ol yet. Ol i strong yet long i stap nambawan.

Orait Jisas i laik stretim tok bilong tupela na em i laik stretim kros em dispela tok i bin kamapim. Olsem na em i singautim ol 12-pela aposel i kam, na long pasin laikim em i tokim ol: “Yupela i save olsem ol king i bosim ol kantri, ol i save strong tumas long bosim ol manmeri, na ol bikman bilong ol i save strong tumas long ol manmeri i mas bihainim olgeta tok bilong ol. Dispela i no ken stap olsem pasin bilong yupela. Nogat. Man i laik kamap bikman namel long yupela, em i mas stap wokman bilong yupela. Na man i laik stap fes namel long yupela, em i mas stap wokboi bilong olgeta.”—Mak 10:42-44.

Jisas i stap olsem gutpela piksa ol disaipel i mas bihainim. Em i tok: “Pikinini bilong man i no kam bilong ol man i mas helpim em, nogat, em i kam bilong helpim ol man na givim laip bilong em olsem pe bilong baim bek planti manmeri.” (Matyu 20:28) Insait long klostu 3-pela yia, Jisas i mekim wok bilong helpim ol narapela. Na nau em bai dai bilong helpim olgeta man! Ol disaipel i mas bihainim pasin bilong Jisas long mekim wok bilong helpim ol narapela, na ol i no ken ting long ol man i mekim wok bilong helpim ol. Na ol i mas stap olsem man i liklik, na ol i no ken stap olsem ol bikman bilong ol narapela.