Katapos magbiyahe ni Jesus ngan han iya mga disipulo ha sur ha Perea tipakadto ha Jerusalem, tinabok hira ha Salog Jordan hirani ha Jerico. An iba nagbiyahe kaupod nira para tumambong ha Paskua han 33 C.E.

Nag-uuna hi Jesus pagbaktas ha iya mga disipulo, determinado hiya nga makaabot ha syudad para ha Paskua. Pero nahahadlok an mga disipulo. Diri pa la maiha, han namatay hi Lasaro ngan han tikadto hi Jesus ha Judea tikang ha Perea, ginsidngan ni Tomas an iba: “Kadto liwat kita, bisan kita mamatay upod niya.” (Juan 11:16, 47-53) Salit peligroso an pagkadto ha Jerusalem, ngan natural la nga mahadlok an mga disipulo.

Basi maiandam an mga disipulo ha mahitatabo, iginbulag hira ni Jesus ha mga tawo ngan ginsidngan: “Tikadto kita ha Jerusalem, ngan an Anak han tawo itutubyan ha punoan nga mga saserdote ngan ha mga eskriba. Huhukman nira hiya hin kamatayon, ngan itutubyan hiya ha mga tawo han mga nasud basi himoon nga pataraw-an ngan latiguhon ngan igraysang ha kahoy, pero babanhawon hiya ha ikatulo ka adlaw.”—Mateo 20:18, 19.

Ini an ikatulo ka beses nga ginsumatan ni Jesus an iya mga disipulo mahitungod han iya kamatayon ngan pagkabanhaw. (Mateo 16:21; 17:22, 23) Pero hini nga higayon nagsiring hiya nga iraraysang hiya ha kahoy. Namati hira ha iya, pero waray nira masabti an iya karuyag sidngon. Posible nga naglalaom hira nga ipapahiuli dinhi ha tuna an ginhadian han Israel, ngan karuyag nira nga magkaada hin himaya ngan kadungganan upod han Kristo ha ginhadian dinhi ha tuna.

An nanay nira apostol Juan ngan Santiago, nga posible hi Salome, kaupod hadton mga nagbibiyahe. Inin duha nga apostol gintawag ni Jesus nga “mga Anak han Dalugdog,” sigurado nga tungod kay madagmit hira masina. (Marcos 3:17; Lucas 9:54) Maiha-iha na hira nga nag-iinambisyon nga magin prominente ha Ginhadian han Kristo. Ngan maaram hini an ira nanay. Salit dinaop an ira nanay kan Jesus, yinukbo ha iya atubangan, ngan nangaro hin pabor. Hi Jesus nagpakiana: “Ano an imo karuyag?” An nanay binaton: “Naghahangyo ako nga an akon duha nga anak makalingkod unta kaupod mo ha imo Ginhadian, an usa ha imo too ngan an usa ha imo wala.”—Mateo 20:20, 21.

An tinuod, ito nga hangyo tikang kan Santiago ngan Juan. Gin-unabi pa la ni Jesus an kaarawdan ngan kaalohan nga iya maieksperyensyahan, salit nagsiring hiya ha ira: “Diri kamo maaram han iyo gin-aaro. Makakainom ba kamo ha kopa nga akon iinuman?” Binaton hira: “Makakainom kami.” (Mateo 20:22) Pero, posible nga waray gud nira masabti kon ano an magigin epekto hini ha ira.

Bisan pa hito, ginsidngan hira ni Jesus: “Mainom gud kamo ha akon kopa, pero ini nga paglingkod ha akon too ngan wala diri ako an nagbubuot, kay para ito ha mga gin-andaman han akon Amay.”—Mateo 20:23.

Han hinbaroan han napulo nga apostol an ginhangyo nira Santiago ngan Juan, nasina hira. Posible ba nga hira Santiago ngan Juan an naniguro ha naglabay pa la nga diskusyon han mga apostol kon hin-o ha ira an gilalabawi? (Lucas 9:46-48) Anoman an nahitabo, ito nga paghangyo nagpapakita nga waray iaplikar han 12 nga apostol an sagdon ni Jesus nga gumawi hira sugad nga ubos. Naghihingyap la gihapon hira nga magin prominente.

Nagdesisyon hi Jesus nga tuhayon an nahitabo pa la nga diskusyon ngan an nagin problema tungod hito. Gintawag niya an 12 nga apostol ngan mahigugmaon nga ginsagdonan: “Maaram kamo nga an gintatagad nga mga magmarando han mga nasud nagpapakaagaron ha mga tawo ngan an mga prominente ha ira nagamit hin awtoridad ha ira. Diri kamo magin sugad hito, lugod an bisan hin-o nga karuyag magkaada daku nga awtoridad ha iyo kinahanglan magin surugoon niyo, ngan an bisan hin-o nga karuyag magin una ha iyo kinahanglan magin uripon han ngatanan.”—Marcos 10:42-44.

Naghatag hi Jesus hin ehemplo nga sadang nira subaron—an iya ehemplo. Hiya nagsaysay: “An Anak han tawo kinanhi, diri basi pagserbihan kondi basi magserbi ngan maghalad han iya kalag sugad nga lukat para ha damu nga tawo.” (Mateo 20:28) Ha sulod hin mga tulo ka tuig, nagserbi hi Jesus ha iba. Ngan bubuhaton niya ito tubtob nga mamatay hiya para ha katawohan! An mga disipulo kinahanglan may disposisyon nga pariho han Kristo nga naruruyag gud pagserbi imbes nga serbihan, ngan magin ubos imbes nga magkaada prominente nga katungdanan.