Jesusasa jupamp chika sarapkäna uka jaqenakasa Jericó markaruw puripjjäna, uka markajj Jerusalenat mä uru sarañankänwa. Jericó markanjja pä markaw utjäna, nayra uttʼayat markampi jichhak uttʼayat romano markampi. Mä markat mä markakamajj niya pä kilometrönwa. Jesusasa jaqenakasa uka thaknamwa sarasipkäna, ukhamaruw mayjasir pä juykhunakajj jaqenakan pasaskir istʼapjjäna. Jupanakat maynïrejj Bartimeo satänwa.

Jesusan uka cheqnam pasaskatap istʼasajja, Bartimeompi mayni juykhu jaqempejj akham sasaw jachʼat artʼapjjäna: “¡Tata, Davidan Yoqapa, nanakat khuyaptʼayasipjjeta!” sasa (Mateo 20:30). Uk istʼasasti jaqenakajj amuktʼapjjam sasaw uka juykhunakarojj toqenoqapjjäna. Ukampis jukʼamp jachʼatwa artʼapjjäna. Uk istʼasajja Jesusajj saytʼänwa, ukatjja irptanipjjañapatakiw ukankirinakar mayïna. Jupanakasti akham sasaw uka juykhu jaqer jawsanipjjäna: “¡Jan ajjsaramti! Sartam, jawstamwa” sasa (Marcos 10:49). Juykhu jaqesti wali kusisitaw patjja isip liwtasajj mäki saythapïna, Jesusan ukaruw sararakïna.

Jesusajj sarakïnwa: “¿Kunsa nayajj jumanakatak lurirista?” sasa. Jupanakasti sapjjarakïnwa: “Tata, uñjañwa munapjjta” sasa (Mateo 20:32, 33). Jesusasti jupanakat wal sinteqtʼasïna, ukatwa nayranakapat llamktʼäna, jupanakat maynirusti sarakïnwa: “Jichhajj sarjjam, Diosar confiyatam laykojj walikëjjtawa” sasa (Marcos 10:52). Uka juykhu jaqenakajj uñj-jjapjjänwa, Diosar jachʼañchañ qalltapjjarakïna. Uk uñjasajj jaqenakajj Diosar jachʼañchapjjarakïnwa. Ukatjja juykhupkäna uka jaqenakajj Jesusaruw arkapjjäna.

Jesusajj Jericó marknam pasaskäna ukhajja, walja jaqenakaw jupampi chika sarasipkarakïna. Taqeniw juykhu jaqenakar waliptayir Jesusarojj uñjañ munapjjäna. Jaqenakajj walpunwa Jesusarojj uksat aksat nuktʼapjjäna, ukatwa yaqhepajj Jesusar jan uñjirjamäpkänti. Zaqueo sutini chachasa janiw Jesusar uñjirjamäkänti, jupajj Jericó markana, uka jakʼankir markanakana impuesto cobrapkäna ukanakan jilïripänwa. Zaqueojj walpun Jesusar uñjañ munäna, ukampis jiskʼa jaqëtap laykojj janiw uñjirjamäkänti. Ukatwa jupajj nayra toqer tʼijusin mä higos arbolar mistüna. Uka patjjatjja Zaqueojj Jesusarojj sumwa uñjäna. Jesusajj uka cheqar purïna ukhajja, alayaruw uñtäna, Zaqueor uñjasasti sarakïnwa: “Zaqueo, jankʼak saraqanim, jichhürojj utaman quedasëjja” sasa (Lucas 19:5). Ukatwa jupajj saraqasajj utapar jankʼak saräna, ukhamat Jesusar sum katoqañataki.

Uk uñjasasti jaqenakajj Jesusat jan wal parlapjjäna. Mä jucharar jaqen utapar saratapajj janiw walïkiti sasaw sapjjäna. Zaqueojj jaqenakar  impuesto cobrasinwa engañompi wal qollqechasirïna.

Jesusajj Zaqueon utapar mantäna ukhajja jaqenakajj akham sapjjänwa: “Jupajj alojasiñatakiw mä jucharar jaqen utapar manti” sasa. Ukampis Jesusajja, juchanakapat arrepentisispawa sasaw amuyäna, ukajj ukhamapuniw phoqasïna. Zaqueojj saytʼasisinwa Jesusar akham säna: “Tata, nayajj chikatpachwa utjirinakajat pobrenakar churaskta. Khitirutejj nayajj kʼarimp kʼarimpi lunthatkta ukarojja, pusi ukhampwa kuttʼayaskta” sasa (Lucas 19:7, 8).

Ukhamatwa Zaqueojj taqe chuyma arrepentisitap uñachtʼayaskäna. Impuesto cobrkasajja, kawkir judionakarus qollqe kʼarimp apaqäna qhawqsa apaqäna ukwa amuytʼaspachäna, ukatwa pusi ukhampwa jupanakarojj kuttʼayä sasin sispachäna. Ukajj Diosan Leyipan maykäna ukat sipansa jukʼampïnwa (Éxodo 22:1; Levítico 6:2-5). Ukatjja Zaqueojj utjirinakapat pobrenakar chikatpach churañwa arsurakïna.

Jesusajj Zaqueor arrepentisitap uñjasajja, wal kusisïna. Ukatwa akham säna: “Salvacionajj jichhüruw aka utar purini, jupasti Abrahanan wawaparakiwa. Jaqen Yoqapajj chhaqatanakar thaqeri, jupanakar salviriw juti” sasa (Lucas 19:9, 10).

Jesusajj uka nayrakiw herencia tukuntir waynat parlkasajj ‘chhaqatanakat’ parläna (Lucas 15:11-24). Jichhajja Zaqueotwa parläna, jupajj chhaqatäkaspas ukhamänwa, ukampis jikjjatatäjjänwa. Religión pʼeqtʼirinakasa arkirinakapasa inas Zaqueo chachjam jaqenakamp chikachasitapat Jesusat jan wal parlapjjchïna. Ukhamäkipansa Jesusajj Abrahanan chhaqat wawanakapar thaqaskakïnwa, yanaptʼaskakirakïnwa.