Yésu ni bet ba nke ni nye, ba mpam i Yérikô, tison i i yé bebee le liké li hilo hiada ni Yérusalem. Di yé le di kal le tison i Yérikô i gwé bipes biba, nlômbi tison ni tison mondo i Rôma. Nlômbi tison i yé haa ni tison mondo i Rôma bebee le kilôméta yada ni pes. Kiki Yésu ni limut li nyodi i pes tison yada inyu ke i pes i tison ipe, bôt ba njagi iba ba ba yé ki ndim ba nok liyôgbe. Wada jôl jé le Bartiméô.

Ngéda ba nok le Yésu a yé tagbe, Bartiméô ni solôñ yé ba kahal lond le: “A Nwet, kon bés ngoo, a Man David!” (Matéô 20:30) Ndi, ngim bôt ikété limut i mbam bo i kalak bo le ba mom nwee, ndi to hala, bôt bana bo iba ba nke ni bisu i lond ni ngui. Ngéda a nok minlondok nwap, Yésu a ntelep. A kal bôt ba yé ni nye le ba sébél bôt ba yé lond. Banigil ba nkôôge bôt ba njagi bebee, ba kal wada wap le: “Bana makénd! Telep, a yé i sébél we.” (Markô 10:49) Ni ngandak maséé, mut ndim a nlep mbot yé a pala telep, a ke yak Yésu.

Yésu a mbat bo le: “Kii ni ngwés le me bôñôl bé?” Bôt ba ndim bo iba ba nsoohe nye le: “A Nwet, boñ le mis més ma yibla.” (Matéô 20:32, 33) Ni ngandak konangoo Yésu a ntihba mis map, a kal wada ipôla yap le: “Kenek. Hémle yoñ i mélés kon woñ.” (Markô 10:52) Bôt ba ndim bo iba ba mbôdôl tehna, ibabé pééna ba mbôdôl ti Djob lipém. Kiki litén li ntehe jam li ntagbe yak jo li mbôdôl ti Djob lipém. I bôt ba bak ndim ba mbôdôl noñ Yésu.

Kiki Yésu a yé tagbe i Yérikô, limut likeñi li nkéña nye. Hiki mut a nsômbôl tehe mut a mbuubaha bôt ba ndim. Ngandak bôt i yé ipañ Yésu kayéle bape ba nla bé to tehe nye, wada wap a yé Sakiô. Nyen a yé nkena bakottas ba Yérikô ni mambai ma yé bebee. Inyule a yé kidik, a nla bé tehe jam li yé tagbe. Jon Sakiô a ñôt ngwéé, a bôk bisu, a bet i e sikômôr (tén e faigé yada) i i yé njel Yésu a yé kil. Mu ngii e, Sakiô a ntibil tehe mam momasôna ma yé tagbe. Ngéda Yésu a ntehe Sakiô i ngii e, a nkal nye le: “A Sakiô, pala sôs inyule i len ini, m’a ba nkén woñ.” (Lukas 19:5) Ni Sakiô a sôs, a hoo ke ndap inyu leege bañga nkén wé.

Ngéda bôt ba ntehe jam li yé tagbe, ba mbôdôl huñbe ba kalak le: “A neebe le mut nu a yé mboñbéba a leege nye i ndap yé.” Ndi, Yésu a nyimbe le Sakiô a yé bebee i hiel ñem. Sakiô a ga wéha bé Yésu nyuu. A nkal  Yésu le: “A Nwet, nun-ki! M’a kap nkus wem i ñem, me ti diyeyeba pes yada; yak hiki yom me bi kadal mut ni malôga, m’a timbhe nye yo ngélé ina.”​—Lukas 19:7, 8.

Kinje loñge njel Sakiô a ngwélél inyu unda le a nhiel toi ñem. A nla gwélél bikaat gwé bi bakottas inyu yi moni a bi yôñôl hiki man Lôk Yuda, a mbôn ki le a ga timbhe bo nwo ngélé ina. Hala a nlel jam mbén Djob i mbat. (Manyodi 22:1; Lôk Lévi 6:2-5) Sakiô a mbôn ki le a ga kap nkus wé ngélé iba a ti diyeyeba pes yada.

Mu kii Yésu a yé maséé i tehe le Sakiô a nhiel toi ñem, a nkal nye le: “I len ini, tohi i njôp munu i ndap ini, inyule yak nye a yé man Abraham. Inyule Man mut a bi lo inyu yéñ ni tohol ba ba bi nimil.”​—Lukas 19:9, 10.

Ndék ngéda i bisu, Yésu a bi gwélél hihéga hi man nimlaga inyu yigye jam li mpémél ba ba nke haa ni Yéhôva. (Lukas 15:11-24) Nano a gwé ndémbél i mut nu a bi nimil toi, i mbus a nhiel ñem. Baéga bibase ni bet ba nit bo ba ñôm Yésu nsohi inyule a ntôñ bôt kiki Sakiô. Ndi hala a nsôña bé Yésu i ke ni bisu i yéñ ni i hôla minimlak mi bon ba Abraham.