Zezi nin be nga be nin i be su kɔ Zerizalɛmun’n, be juli Zeriko. Sɛ sran kun o Zeriko lɛ naan i waan ɔ́ kɔ́ Zerizalɛmun’n, ɔ́ dí cɛn ba kun atin’n nun. Zeriko klɔ’m be ti nɲɔn. Ɔ le klɔ uflɛ mɔ Rɔmunfuɛ’m be wa kplannin’n, kpɛkun ɔ le klɔ laa’n. Be nɲɔn’n be afiɛn tra kilo kun nin sin. Zezi nin sran kpanngban be fin Zeriko nɲɔn sɔ’m be nun kun nun be fiteli. Kɛ bé wá mántan Zeriko kunfuɛ’n, aɲinsifuɛ nɲɔn mɔ be srɛsrɛ like’n be tili be ngan. Be nun kun suan Baatime.

Kɛ Baatime nin i wiengu’n be tili i kɛ Zezi su sin’n, be kpannin kɛ: “E Min, Davidi Wa, si e aunnvuɛ!” (Matie 20:30) Sran nga be o lɛ’n, be kpannin be su. Be seli be kɛ be muan be nuan. Sanngɛ blɛ li yɛ be wa kpannin kekle kpa-ɔ. Kɛ Zezi tili be kpanlɛ’n, ɔ jrannin. Ɔ seli be nga be nin i be su kɔ’n kɛ be ko flɛ be nga be su kpan’n. Yɛ be ɔli-ɔ. Be ko seli sran sɔ’m be nun kun kɛ: “Gua ɔ wla ase! Jaso, i waan a bla.” (Marki 10:49) I wun m’ɔ blibli i’n ti’n, ɔ toli i tralɛ’n guɛli i lɔ, ɔ jasoli waka! Kpɛkun ɔ ɔli Zezi wun lɔ.

Zezi seli i kɛ: “?Ngue yɛ a kunndɛ kɛ n yo n man wɔ-ɔ?” Aɲinsifuɛ nɲɔn’n be srɛli i kɛ: “E Min, yo maan e ɲinma’m be tike.” (Matie 20:32, 33) Be yoli Zezi i annvɔ naan w’a kan be ɲinma mun. Kpɛkun ɔ seli be nun kun kɛ: “Kɔ, Ɲanmiɛn mɔ a lafi i su’n ti’n, w’a yo juejue.” (Marki 10:52) Aɲinsifuɛ nɲɔn’n be wunnin ase. I sɔ’n ti’n, be manmannin Ɲanmiɛn. Kpɛkun be ka lɛ suli Zezi su. Kɛ sran nga be o lɛ’n be wunnin sa ng’ɔ juli’n, be manmannin Ɲanmiɛn wie.

Kɛ Zezi sín Zeriko’n nun kɔ́’n, sran kpanngban kpa be su i su. Afin be kwlaa be kunndɛ kɛ bé wún sran ng’ɔ yoli aɲinsifuɛ’m be juejue’n. Ɔ maan be mian Zezi fii. Sran wie’m be kwlá wunmɛn i bɔbɔ. Sran sɔ’m be nun kun yɛle Zase. Ɔ ti Zeriko asa’n su lapo defuɛ’m be kwlaa be su kpɛn. Bian sɔ’n ti tika, i sɔ’n ti’n ɔ kwlá wunman like nga be su yo’n. Ɔ maan Zase fali atin mɔ Zezi wá sín su’n su. Ɔ wanndi dunnin sran’m be ɲrun mmua ko fuli sikomɔɔ waka (blo figie) kun su. Kɛ ɔ o waka sɔ’n su lɔ’n, ɔ wun like kwlaa. Kɛ Zezi juli lɛ’n, ɔ niannin nglo naan w’a se i kɛ: “Zase, jra ndɛndɛ. Afin ɔ fata kɛ n sike ɔ awlo lɔ andɛ.” (Liki 19:5) Kɛ ɔ tili ndɛ sɔ’n, ɔ jrali ndɛndɛ. Ɔ wanndi ɔli i awlo ko siesieli lɔ naan w’a kwla sɔ Zezi nun klanman.

Sran’m be kwlaa nga be wunnin i sɔ’n, be ijɔli be konviabo. Be waan Zase ti sa tɛ yofuɛ dan naan i sɔ’n ti’n, ɔ timan su kɛ Zezi sike i awlo lɔ. Afin kɛ Zase dédé sran’m be lapo’n, ɔ dili sran’m be ndrunmun lele ɔ kacili sikafuɛ.

Kɛ Zezi wluli Zase i awlo lɔ’n, sran’m be seli kɛ: “Bian m’ɔ ti sa tɛ yofuɛ’n, i awlo lɔ yɛ ɔ ko sikeli-ɔ.” Sanngɛ Zezi liɛ’n, ɔ wunnin kɛ Zase kwla kaci i akunndan’n. Zezi i ndɛ yoli fɛ. Afin Zase jaso jrannin, yɛ ɔ seli i kɛ: “Nian! Ń má bú min  sa nun ninnge’m be nun nɲɔn. Ń fɛ́ i bue ń mán yalɛfuɛ mun. Kpɛkun sran kwlaa nga n deli i like wue kekle su’n, ń yí i wunsu kpɛ nnan ń mɛ́n i.”​—Liki 19:7, 8.

Like nga Zase yoli’n kle kɛ w’a kaci i akunndan’n sakpa! Atrɛkpa’n, sɛ ɔ niɛn i fluwa’m be nun’n, ɔ́ sí sika nga Zuifu wie’m be mɛnnin i’n, i nuan sɛsɛsɛ. Zase waan ɔ́ fá sika sɔ’n i wunsu kpɛ nnan ɔ́ mán be tinuntinun. Ngalɛ’n tra nga Ɲanmiɛn i mmla’n waan be yo’n bɔbɔ. (Ezipti Lɔ Tulɛ 22:1; Saun Yolɛ 6:2-5) Asa ekun’n, Zase tali nda kɛ ɔ́ bú i sa nun ninnge’m be nun nɲɔn. Kpɛkun ɔ́ fɛ́ i bue ɔ́ mán yalɛfuɛ mun.

Like nga Zase waan ɔ́ yó’n, yoli Zezi i fɛ kpa. Afin Zase kleli kɛ ɔ kunndɛ kɛ ɔ́ káci sakpa. Ɔ maan Zezi seli i kɛ: “Andɛ’n, Ɲanmiɛn w’a de bian nga nin i awlofuɛ mun. Afin ɔ ti Abraamun i wa wie. Afin Sran wa’n bali be nga b’a mlin’n be kunndɛlɛ naan ɔ́ dé be.”​—Liki 19:9, 10.

Zezi kannin be nga be yacili Zoova i sulɛ’n be ndɛ i osu nin-a cɛman. Blɛ sɔ’n nun’n, ɔ kannin ba ng’ɔ mlinnin’n i ndɛ ɲanndra nun. (Liki 15:11-24) Zase ti kɛ ba sɔ’n sa. Afin ɔ ti kɛ ɔ mlinnin yɛ be wunnin i ekun sa. Atrɛkpa’n, kɛ mɔ be nga be ti kɛ Zase sa’n be ndɛ lo Zezi ti’n, Zuifu’m be Ɲanmiɛn sulɛ wafa’m be su kpɛnngbɛn mun nin sran nga be su be su’n, be kan Zezi i wun ndɛ tɛtɛ. Sanngɛ i sɔ’n w’a bubumɛn i sa sin kaan sa. W’a yaciman Abraamun i mma nga be mlinnin’n be kunndɛlɛ.