Yesu na baendeele pamo nankwe basukile bafika mu Yeriko. Ukufuma mu Yeriko ukufika ku Yerusalemu baleendapo ubushiku bumo. Kwali imisumba ibili iya Yeriko. Ukufuma mu musumba wa kale uwa Yeriko ukufika ku musumba upya uwa bena Roma pali amakilomita 1.6. Ilyo Yesu na bantu abo aali nabo balefuma mu musumba wa Yeriko no kuya mu musumba ubiye, abaume babili impofu balyumfwile icongo. Umo pali aba aali ni Bartimeo.

Ilyo Bartimeo no mubiye baumfwile ukuti ni Yesu uwalepita, batendeke ukubilikisha abati: “Tubeleleniko uluse, mwe Shikulu, Mwana Davidi!” (Mateo 20:30) Bamo abali mwi bumba balikalipiile ishi impofu ukuti shileke ukubilikisha, lelo e lyo shacililemo ukubilikisha. Ilyo Yesu aumfwile, aliminine. Aebele abo ali nabo ukuti bete uwalebilikisha. Awe baile kuli aba bakalombalomba no kweba umo abati: “Shipa, ima, alekwita.” (Marko 10:49) Impofu yapoosele ica kufwala ca iko kabili mu kwangufyanya yaile kuli Yesu ninshi naitemwa.

Yesu aipwishe impofu ati: “Cinshi ico mulefwaya ukuti imucitile?” Impofu shayaswike ashiti: “Mwe Shikulu, shibuleni amenso yesu.” (Mateo 20:32, 33) Yesu alyumfwile uluse kabili ashikumishe pa menso kabili nalimo aebele imo ati: “Kabiye, icitetekelo cobe cakuposha.” (Marko 10:52) Ishi impofu shibili ishalelombalomba shatendeke ukumona kabili shalilumbenye Lesa. Ilyo abantu bamwene icacitike, nabo balilumbenye Lesa. Lyena aba abaume abo Yesu ashibwile amenso batendeke ukumukonka.

Kwali abantu abengi abalekonka Yesu ilyo alepita mu Yeriko. Bonse balefwaya ukumona uwashibwile amenso ya mpofu shibili. Abantu baletitikisha Yesu konse konse, kanshi bamo balifililwe no kumumona. Na Sakeo uwali umukalamba wa bakasonkesha wa misonko mu Yeriko monse, tamumwene. Apo ali umwipi, talemona ifyalecitika. E ico Sakeo abutukiile ku ntanshi no kunina ku muti wa mukunyu pa kuti amumone, pantu ali no kupita mu nshila ilya ine. Ilyo ali ku muti, Sakeo alitendeke ukumona ifyalecitika. Ilyo Yesu afikile mupepi, aloleshe ku muti no kweba Sakeo ati: ‘Sakeo, ika bwangu, pantu lelo ndeikala ku ng’anda ku mobe.’ (Luka 19:5) Sakeo alikiile no kuya ku ng’anda bwangu bwangu pa kuti apokelele umweni wakwe uwacindama.

Ilyo abantu bamwene ifyacitiike, batampile ukuilishanya. Bamwene kwati Yesu alilufyenye ukuya ku muntu uo balemona ukuti mubembu. Sakeo aali sana ne cuma pa mulandu wa kuti alecenjesha abantu pa kubasonkesha indalama ishingi.

 Ilyo Yesu aingile mu ng’anda ya kwa Sakeo, abantu batendeke ukuilishanya abati: “Ku muntu umubembu e ko ele ku kwikala.” Lelo Yesu alimwene ukuti Sakeo kuti alapila. Na cine, Sakeo alilapiile pantu aliminine no kweba Yesu ati: “Moneni! Mwe Shikulu, hafu wa fyo nakwata, ndepeela abapiina, na conse ico napokele mu bucenjeshi ku muntu onse ndebweseshapo imiku 4.”—Luka 19:7, 8.

Ifyo Sakeo acitile filanga fye ukuti alilapiile ukufuma pa nshi ya mutima. Alipendele indalama sha misonko isho apokele ku baYuda, kabili alilapile ukuti isho abaliliile, alabweseshapo imiku 4. Acitile ifyacilile na pa fyo ifunde lya kwa Lesa lyalandile. (Ukufuma 22:1; Ubwina Lebi 6:2-5) E lyo kabili Sakeo alilaile ukuti alapeela hafu wa fyo akwata ku bapiina.

Yesu alitemenwe ifyo Sakeo acitile, pantu fyalangile ukuti alilapiile. E ico amwebele ati: “Ipusukilo liishile mu ng’anda ino lelo, pantu no yu muntu na o mwana wa kwa Abrahamu. Pantu Umwana wa muntu aishile ku kufwaya no kupususha abaluba.”—Luka 19:9, 10.

Pa nshita imo ilyo Yesu alelanda sana pa fyo ‘abaluba’ baali, alishimike icilangililo ca mwana uwalubile. (Luka 15:11-24) Lelo pali iyi inshita, alandile pa muntu uwali fye ngo waluba, lelo uwasangilwe. Bashimapepo na bantu babo baleilishanya pali Yesu kabili balemusuusha pali filya abikile amano ku bantu abaali nga Sakeo. Na lyo line, Yesu alitwalilile ukufwaya no kubwesha abana ba kwa Abrahamu abalubile.