Yésus a bôte be ne dulu a nye ba kui e Jéricho; éyoñ ô ne tison éte, wo wulu ngumba môs asu na ô kui Jérusalem. Jéricho a ne tison é bili bifase bibaé, nnôma tison é tele bebé kiliméta jia a étun ya mfefé tison. Nté Yésus a jama bôt a kôlô vôma wua ya tison éte na a ke tison évok, mindindim mibaé mia wô’ô abui zô’é bôte ba bo. Wua ya be be a ne jôé na Bar-Timée.

Éyoñe ba wô’ô na Yésus nye a lôt, Bar-Timée a môt ba nye be ne ndim ba taté na ba yôtan e yôb été na: “A Tat, mone David, ko bia éngôngô.” (Matthieu 20:30) Nde bôte béziñ be ne ékôane bôt été ba bame be a jô be na be tabe bivô, ve bôte bebaé bete ba dañe beta yôtan. Éyoñe Yésus a wô’ô metyiñe map nde a tebe. A jô beyé’é ba tôñe nye na be zu be be nye. Nde beyé’é ba ke yene wua ya mindindim mite mibaé a jô nye na: “Volô’ô nlem: kôlô’ô si, a loene wo.” (Marc 10:49) A meva’a mese môt a wua éyé jé, a tebe tetele, a ke mfa’a Yésus a loene nye.

Yésus ve sili nye na: “Mia kômbô na me bo mia jé?” Bese bebaane ba yalan a jô na: “A ñye’ele bo’o na e mise mangan me yen.” (Matthieu 20:32, 33, Mfefé Nkôñelan) Yésus ve ko be éngôngo a nambe mise map; a jô wua y’été na: “Kelek, mbunane wôé ô nyiiya wo.” (Marc 10:52, Mfefé Nkôñelan) Minzezak mibaé mia to ndim mia taté na mia yen, a mia yiane fe lu’u Zambe. Éyoñe bôt ba yen jame da te boban, be’ fe ba ve Zambe duma. Bôte ba too ndim ba taté na ba tôñe Yésus.

Beta nsamba bôt a ne a Yésus nté a tulane Jéricho. Môt ase a kômbô yene môt a te saé mindindim. Bôte ba bômane nye mimfa’a mise aval é ne na, bevo’o ba kate kui na be yene nye. Zachée a ne môte wua y’été. A jôé benyoñe taxe ya Jéricho a mefefel. Mbôl a n’étun, a kate yene jam da lôtan. Nde a bume mbil a ke bet élé sycomore (nge élé figuier murier) é tele njoñ, vôme Yésus a zu lôt. E yôbe wôé, a ne ngule ya yene mam mese mvo’é mvo’é. Éyoñe Yésus a kui vôm ate, a yene na Zachée a bete élé yôp, nde a jô nye na: “A Zachée sise’ si avô; amu me ayiane tabe nda jôé den.” (Luc 19:5) Ane Zachée a ji’a sis a ke nda jé na a nyoñe beta nneñ wé a mevak.

Éyoñe bôt ba yene jam ete, ba taté na ba kobô menyiñ. Be lôô na é nji bo mvaé na, Yésus a ke tabe e be môt ba yen ane mbo abé. Zachée a te kui na a ful akume dé a ékotekote mboon; a wube moné éyoñ a nyoñe taxe.

Nté Yésus a nyiine be Zachée, bôt ba kobô menyiñ be jô’ô na: “E nne a kômeya ke tabe e be mbo abé.” Ve, e mise me Yésus, Zachée a ne  môt a ne ngule ya jôban. A nalé a zu fe boban. Zachée ve tebe tetele a jô Yésus na: “Tame yen, A Nti, ma ve bingôngole bi bôt éfase jia ya akume dam, a nge me nga nyoñe jôme be môt nalé a too te yian, ma bulane nye je biôme binyin.”​—Luc 19:7, 8, Mfefé Nkôñelan.

A ne fo’o mbamba zene Zachée a liti na a jôban! A ne ngule ya yem abime moné a te nyoñ mo Bejuif amu a bili mintili mié, a kane fe ngana na a ye bulane be tañe te biyoñ binyin. Nalé a dañ abim atiñe Zambe da sili. (Nkôlan 22:1; Lévitique 6:2-5) A fe na, Zachée a ve anyu dé na, a ye ve minzôzoé éfase jia ya akume dé.

Yésus a wô’ô mvaé ya yene na Zachée a jôbane fo’o, nde a jô nye na: “E den émiene nyô, ényiñ é soya asu e nda nyô, amu nyôna a ne fe e mone Abraham. Amu Mona môt a nga zu jeñ a nyii jôm é nga jañ.”​—Luc 19:9, 10, Mfefé Mkôñelan.

Yésus a ndôme belane nkana mon a nga jañ na, a ngôné été bôte ba te lume Yéhôva mvuse be tele. (Luc 15:11-24) Éyoñe ji, a te yene môt émien a tele aval été éte, môt a too ane môt a te jañ, ve ba te su’ulane yene nye. Betebe ôsu ya ñyebe a beyé’é bap be ne komekane Yésus amu a subu bôte be ne ane Zachée bebé. Ve, Yésus a ke ôsu a jeñ a nyii fe avale bone b’Abraham ete.