Iesu bona ia ida idia laolao taudia be Ieriko dekenai idia ginidae, idia be Ierusalema amo dina tamona idia laolao. Ieriko hanuana ena kahana be rua, hanua gunana be 1.6 kilomita bamona Roma edia taoni matamata amo. Iesu bona hutuma be unai hanua ta amo ma ta dekenai idia lao neganai, matakepulu noinoi taudia rua be edia regena idia kamonai. Idia ta ena ladana be Batimeo.

Batimeo bona ena bamona idia kamonai Iesu ia raka hanaia neganai, idia boiboi: “Lohiabada, Davida ena Natuna e, ai oi hebogahisi henia!” (Mataio 20:30) Hutuma huanai haida ese idia hamaorodia do idia boiboi lasi, to idia ruaosi idia boiboi badabada. Iesu be unai ia kamonai bona ia gini. Ia ida idia gini taudia ia hamaoroa idia boiboi taudia do idia boiria. Vadaeni noinoi taudia dekenai idia lao bona idia ta idia hamaoroa: “Oi gari lasi! Oi toreisi, ia ese oi ia boiria noho.” (Mareko 10:49) Unai matakepulu tauna be ena dabua ia negea, ia toreisi haraga, bona Iesu dekenai ia lao.

Iesu ia henanadai: “Umui ura umui totona dahaka do lau karaia?” Idia ruaosi idia gwau: “Lohiabada e, mani emai matana oi kehoa.” (Mataio 20:32, 33) Iesu ese ia hebogahisi henidia, bena edia matana ia daua toho, bona idia ta dekenai ia gwau: “Oi lao. Emu abidadama ese oi ia hanamoa vadaeni.” (Mareko 10:52) Maoromaoro unai matakepulu noinoi taudia idia itaia diba, bona Dirava idia hanamoa. Unai idia itaia taudia ese Dirava idia hanamoa danu. Guna ia matakepulu tauna be Iesu murinai ia raka matamaia.

Iesu be hutuma bada herea ida Ieriko hanuana ia hanaia. Taunimanima ibounai idia ura matakepulu tauna ia hanamoa tauna idia itaia. Idia be hutuma dainai, haida be Iesu idia itaia diba lasi. Idia ta be Sakaio. Ia be Ieriko bona ena badina tanodia edia takisi gogoa tauna. Ia be tau kwadogina dainai, ia vara noho gauna ia itaia diba lasi. Unai dainai ia heau lao bona Iesu ia raka dalana badinai ia tubu sikamoa auna dekenai ia daekau. Unuseni amo Sakaio be gau ibounai ia itaia namonamo diba. Iesu ia mai kahirakahira neganai, au dekenai Sakaio ia itaia, ia gwau: “Sakaio e, oi diho haraga, badina hari dina lau be emu ruma dekenai do lau noho.” (Luka 19:5) Sakaio ia diho haraga bena ena ruma dekenai ia heau lao gau ia hegaegaelaia totona.

Taunimanima be unai idia itaia neganai, idia maumau. Idia laloa Iesu be unai bamona kara dika tauna ena ruma dekenai ia lao be maoro lasi. Sakaio be taga tauna ai ia lao badina koikoi dalanai takisi moni ia abia.

 Iesu be Sakaio ena ruma lalonai ia vareai neganai, taunimanima idia maumau, idia gwau: “Ia be kara dika tauna ena ruma dekenai ia lao bona ia noho.” To Iesu ia diba Sakaio ia helalo-kerehai diba. Bona Iesu ia lalohisihisi lasi. Sakaio ia gini tore bona Iesu ia hamaoroa: “Lohiabada e, egu kohu ena kahana be ogogami taudia dekenai do lau henia bona koikoi dalanai ta amo lau abia moni be nega 4 do lau henia lou.”​—Luka 19:7, 8.

Unai amo Sakaio be ena helalo-kerehai momokani toana ia hahedinaraia! Ia torea diho takisi ena rekodi bukana amo ia itaia diba Iuda taudia idauidau amo moni hida ia abia, bona ia gwauhamata nega 4 do ia henia giroa. Unai be Dirava ena taravatu ese ia gwauraia maka ia hanaia momokani. (Esodo 22:1; Levitiko 6:2-5) Danu, Sakaio ia gwauhamata ena kohu kahana be ogogami taudia dekenai do ia henia.

Iesu be Sakaio ena helalo-kerehai karana dekenai ia moale bona ia hamaoroa: “Hari dina Dirava ese inai tauna bona iena ruma bese ia hamauria, badina ia danu be Aberahamo ena natuna ta. Badina taunimanima ena Natuna be boio taudia tahua bona hamauria totona ia mai.”​—Luka 19:9, 10.

Vanegai, Iesu ese boio merona ena parabole amo “ia boio” tauna ia herevalaia. (Luka 15:11-24) Iesu ese idia dekenai ia hahedinaraia ia boio tauna be hari idia davaria. Iesu be Sakaio bamona taudia ia durua dainai, tomadiho gunalaia taudia bona edia murinai idia raka taudia ese idia maumauraia bona gwauraia dika diba. To Iesu ese Aberahamo ena boio natudia ia tahua bona boiridia noho.