Jesus sereta sida ke enggau iya datai ba Jeriko, sida patut bejalai sehari da agi ngambika ulih datai ba Jerusalem. Jeriko bisi dua iti nengeri, siti nengeri ke lama lalu siti da agi nengeri ti baru ke digaga maya jeman Rome. Nengeri ke baru nya kira-kira 1.6km ari nengeri ke lama. Lebuh Jesus sereta sida ke enggau iya mupuk ari nengeri siti ngagai nengeri siti, bisi dua iku lelaki ke buta minta sedekah ba tisi jalai. Penatai sida ulih didinga dua iku lelaki ke buta nya. Siku ari sida benama Bartimius.

Pengudah nya, Bartimius enggau kaban iya ngangau enggau nyawa ti inggar: “Kasihka kami, Tuan, Anak David!” (Matthew 20:30) Sekeda orang ngerara ngasuh seduai iya badu agi ragak, tang seduai iya majak ngangau enggau nyawa ti inggar. Jesus ngetu lebuh ninga orang begau lalu Jesus ngasuh orang ke enggau iya ngiga sapa orang ke benung ngangauka iya. Pengudah sida tetemuka dua iku lelaki ke buta nya, lalu madah ngagai siku ari seduai iya: “Anang takut! Angkat nuan, iya ngangauka nuan.” (Mark 10:49) Ketegal gagit ati, lelaki ke buta nya lalu muai gari luar iya, engkejuk angkat lalu mansang ngagai Jesus.

Jesus nanya: “Seduai deka aku ngereja nama ke seduai?” Ku sida nyaut iya: “Tuan, awakka kami duai ulih meda.” (Matthew 20:32, 33) Jesus berasai sinu, lalu negu mata seduai iya. Udah nya, Jesus madah ngagai siku ari seduai iya: “Mupuk nuan. Pengarap nuan udah ngeraika nuan.” (Mark 10:52) Nya alai, dua iku lelaki ke buta nya digeraika. Seduai iya lalu meri mulia ngagai Petara. Orang bukai ke meda utai ke nyadi mega muji Petara. Berengkah ari nya, seduai iya nitihka Jesus.

Mayuh orang nitihka Jesus maya iya bejalai nengah Jeriko. Semua orang deka meda Jesus laban iya udah ngeraika dua iku lelaki ke buta. Mayuh orang begelumu ngelingi Jesus lalu sekeda orang enda ulih meda iya. Nya meh utai ke nyadi ba Sakius. Iya ketuai bala pengumpul chukai ba Jeriko sereta enggau endur ke semak dia. Ketegal iya pandak, iya enda ulih meda utai ke benung nyadi. Nya alai, iya belanda dulu ari orang mayuh lalu niki pun kayu ara (tauka, pun kayu ara mulberry) ba jalai ke ditengah Jesus. Ari nya, Sakius ulih meda semua utai ke nyadi enggau terang. Lebuh Jesus nyauka datai ba endur nya, iya tepedaka Sakius ba atas pun kayu. Nyadi iya madah: “Sakius, jampat nurun. Seharitu aku patut diau ba rumah nuan.” (Luke 19:5) Sakius beguai nurun ari pun kayu lalu pulai ke rumah laban iya deka nyambut temuai iya ti istimewa, iya nya Jesus.

Taja pia, orang mayuh mut-mut meda utai ke udah nyadi. Sida ngasaika Jesus enda patut diau ba rumah orang ke dikumbai sida bedosa. Tu ketegal, Sakius mayuh nipu duit orang lebuh iya ngumpul chukai.

 Lebuh Jesus ngagai rumah Sakius, orang mayuh madahka: “Iya diau ba rumah orang ke bedosa.” Tang, Jesus nemu Sakius deka nesal ati. Lalu nya endang amat nyadi. Laban Sakius madah ngagai Jesus: “Tuan, aku deka meri setengah ari reta aku ngagai orang ke seranta, lalu duit orang ke diambi aku enggau chara nipu deka dipulaika aku ngagai sida empat kali lipat.”—Luke 19:7, 8.

Utai ke digaga Sakius kena nunjukka diri bebendar nesal ati nya amat manah! Iya ulih ngira ari rikut digaga iya kena nemu penyampau duit ti udah diterima iya ari orang bukai, lalu Sakius besemaya deka meri ganti rugi empat kali lipat ari duit ke diterima iya. Iya ke amat, utai ke digaga Sakius ngelui ari utai ke dipinta Adat Petara. (Pemansut 22:1; Adat Lewi 6:2-5) Nambahka nya, Sakius besemaya deka meri setengah ari reta iya ngagai orang ke miskin.

Jesus gaga ati meda Sakius nesal ati, nya alai Jesus madah: “Seharitu, Petara udah nyelamatka lelaki tu enggau ruang bilik iya, laban iya mega peturun Abraham. Laban Anak Mensia datai deka ngiga lalu nyelamatka orang ke tesat.”—Luke 19:9, 10.

Sebedau tu, Jesus kala nyebut jaku sempama pasal anak ke lenyau. (Luke 15:11-24) Tang diatu Jesus nunjukka teladan Sakius ti baka anak ke udah lenyau tang diatu pulai baru. Bala tuai pengarap enggau nembiak sida engka mut-mut pasal Jesus sereta ngutuk iya, laban iya ibuhka orang ke baka Sakius. Taja pia, Jesus enda ngetu ngiga sereta nulung bala anak Abraham ke udah lenyau ngambika sida pulai baru ngagai Jehovah.