Nakasangpeten ni Jesus ken dagiti kakaduana a nagdaliasat idiay Jerico, nga agarup maysa nga aldaw a pagnaen manipud Jerusalem. Ti Jerico ket dua a siudad, ti immun-una a siudad ket agarup 1.6 a kilometro ti kaadayona iti barbaro a siudad nga impasdek dagiti Romano. Bayat a pumampanaw ni Jesus ken dagiti tattao iti maysa kadagitoy a siudad a mapan iti sabali, nangngeg ti dua a bulsek a lumablabas ni Jesus ken dagiti tattao. Bartimeo ti nagan ti maysa kadakuada.

Idi nangngegna a lumablabas ni Jesus, impukkaw ni Bartimeo ken ti kaduana: “Apo, kaasiannakami, Anak ni David!” (Mateo 20:30) Imbaga dagiti tattao nga agulimekda, ngem impigpigsada pay ti nagpukkaw. Idi nangngeg ni Jesus dayta, nagsardeng. Imbagana nga ayabanda dagiti agpukpukkaw. Inayabanda ida, ket kinunada iti maysa kadakuada: “Papigsaem ti pakinakemmo! Tumakderka ta ay-ayabannaka.” (Marcos 10:49) Gapu iti ragsakna, inikkat ni Bartimeo ti makinruar a badona, timmakder a dagus, sa napan ken Jesus.

Dinamag ni Jesus: “Ania ti kayatyo nga aramidek?” Kinuna dagiti bulsek: “Apo, makakitakami koma.” (Mateo 20:​32, 33) Naasian ni Jesus isu a sinagidna dagiti matada ket kinunana iti maysa kadakuada: “Inkan. Pinaimbagnaka ti pammatim.” (Marcos 10:52) Nakakita dagiti dua a bulsek, ket sigurado nga indaydayawda ti Dios. Idi nakita dagiti tattao ti napasamak, indaydayawda met ti Dios. Simmurot ken Jesus dagiti dati a bulsek a lallaki.

Adu a tattao ti sumursurot ken Jesus idi lumabas idiay Jerico. Kayat a makita dagiti tattao daydiay nangpaimbag kadagiti bulsek a lallaki. Adu a tattao ti naguummong iti ayan ni Jesus isu a saan a makita ti dadduma. Maysa ni Zakeo kadakuada. Ni Zakeo ti pangulo dagiti agsingsingir iti buis idiay Jerico ken iti aglawlawna. Gapu ta pandek, saanna a makita ti mapaspasamak. Isu nga immun-una ni Zakeo ket immuli iti kayo ti sikomoro (wenno, mulberry fig) nga adda iti mapagnaan ni Jesus. Manipud iti dayta, makitan ni Zakeo ti amin a mapasamak. Idi nakadanon ni Jesus iti batog ni Zakeo nga immuli iti kayo, kinunana: “Zakeo, darasem ti umulog ta umayak ita idiay balaymo.” (Lucas 19:5) Immulog ni Zakeo ket nagdardaras a nagawid tapno sangailienna ti mabigbigbig a bisitana.

Idi nakita dagiti tattao ti mapaspasamak, nagtanabutobda. Kunada a saan nga umiso a ti mangsangaili ken Jesus ket maysa a lalaki a matmatanda a managbasol. Nagbalin a nabaknang ni Zakeo gapu iti panagkikilna iti kuarta bayat nga agkolkolekta iti buis.

Idi simrek ni Jesus iti balay ni Zakeo, nagreklamo dagiti tattao: “Napan nagdagus iti balay ti maysa a managbasol.” Ngem makita ni Jesus a mabalin nga agbabawi ni Zakeo. Saan a napaay ni Jesus. Timmakder ni Zakeo ket kinunana: “Apo,  itedko kadagiti napanglaw ti kagudua dagiti sanikuak, ket isublik iti mamimpat ti aniaman a kinikilko iti asinoman.”​—Lucas 19:​7, 8.

Nagsayaat ketdin ta pinaneknekan ni Zakeo a pudno ti panagbabawina! Makuentana manipud iti rekordna kadagiti buis no mano ti naawatna kadagiti nagduduma a Judio, ket inkarina nga isubli ti mamimpat a daras dayta. Nalablabes pay dayta ngem iti kalikaguman ti linteg ti Dios. (Exodo 22:1; Levitico 6:​2-5) Kasta met, inkari ni Zakeo nga itedna kadagiti napanglaw ti kagudua ti amin a sanikuana.

Naragsakan ni Jesus iti panangipakita ni Zakeo iti panagbabawina. Kinunana: “Ita nga aldaw, dimteng ti pannakaisalakan iti daytoy a balay, ta isu ket anak met ni Abraham. Ta immay ti Anak ti tao tapno sapulen ken isalakanna ti napukaw.”​—Lucas 19:​9, 10.

Nabiit pay nga imbaga ni Jesus ti kasasaad “ti napukaw” iti ilustrasionna maipapan iti napukaw nga anak. (Lucas 15:​11-24) Ngem ita, impakitana ti pudpudno a pagarigan ti maysa a kasla napukawen ngem nasarakan. Mabalin nga agreklamo dagiti lider ti relihion ken dagiti pasurotda iti inaramid ni Jesus ken babalawenda ti pannakilangenna iti kas ken Zakeo. Nupay kasta, intultuloy ni Jesus a sapulen ken isubli dagiti napukaw nga annak ni Abraham.