Yesũ na ala angĩ maĩ kyalonĩ vamwe nake nĩmavikie Yeliko. Ndũa ĩsu yaĩ ũasa wa mũendo wa mũthenya ũmwe kuma Yelusaleme. Yeliko yaĩ na ndũa ilĩ. Ĩla ngũũ yaĩ ũasa wa maili ĩmwe kuma vala ve ĩla nzaũ yaakĩtwe ĩvindanĩ ya Alomi. Yesũ vamwe na ĩkomano yĩla waĩ nayo makĩlanĩlĩtye maumĩte ndũa ĩmwe maendete ĩla ĩngĩ na andũ elĩ ilalinda meew’a andũ mailonzany’a. Ũmwe woo eetawa Valitimeo.

Yĩla Valitimeo na mũnyanyae meewie Yesũ avĩtĩte nĩmambĩĩe kwĩtana na wasya mũnene mayasya: “Mwĩaĩi, twĩw’ĩe tei, Mwana wa Ndaviti!” (Mathayo 20:30) Amwe ala maĩ ĩkomanonĩ nĩmamakanisye maimea mavindye, ĩndĩ aũme asu me elĩ maendeea kũneena na wasya mũnene ĩ ya mũno. Yĩla Yesũ weewie kĩneene kĩu kyonthe nĩwaũngamie. Nĩweeie ala maĩ nake mete andũ asu. Ala matũmiwe nĩmaendie vala ve aũme asu na meea ũmwe woo: “Ĩthĩwa na ũkũmbaũ! Ũkĩla; nũkũkwĩta.” (Maliko 10:49) Mũndũũme ũsu waĩ kĩlalinda nĩwekisye ngũa yake ya ĩũlũ nũndũ wa ũtanu, aũngama mĩtũkĩ, na athi vala ve Yesũ.

Yesũ amakũlilye atĩĩ: “Mwĩenda nĩmwĩke ata?” Namo aũme asu elĩ mamwĩsũva maimwĩa: “Mwĩaĩi, twĩenda metho maitũ masalukw’e.” (Mathayo 20:32, 33) Nĩvo ĩndĩ Yesũ wamew’ĩie tei na akiita metho moo na eea ũmwe woo atĩĩ: “Enda. Mũĩkĩĩo waku nĩwakũvosya.” (Maliko 10:52) Aũme asu maĩ ilalinda nĩmambĩĩe kwona, na vate nzika me elĩ nĩmambĩĩie kũmũkumya Ngai. Yĩla andũ ala angĩ moonie kĩla kyeekĩka, o namo nĩmambĩĩe kũmũtaĩa Ngai. Aũme asu maĩ ilalinda nĩmatw’ĩkie aatĩĩi ma Yesũ.

Ĩvindanĩ yĩu Yesũ athyũlũlũkĩtwe nĩ andũ aingĩ esĩle ndũanĩ ya Yeliko. Kĩla mũndũ nĩwendaa kwona mũndũ ũsu waĩ anavosya aũme ilalinda. Andũ mamũthyũlũlũkĩte Yesũ kĩla ngalĩko, na kwoou amwe mayaĩ matonya kũmwona. O nake Sakayo ndaĩ atonya kũmwona. Mũndũũme ũsu aĩ mũnene wa aumĩthya ma koti ma ndũa ya Yeliko na ndee syayo. Sakayo Ndaĩ atonya kwona kĩla kĩendeee nũndũ aĩ mũkuvĩ. Kwoou nĩwasembie athi kũlĩsa mũkũyũ ũla waĩ nzĩanĩ ĩla Yesũ wesĩle. Sakayo e vau mũkũyũnĩ aĩ atonya kwona kĩla kĩndũ nesa. Yĩla Yesũ wathengeeie na amwona e mũtĩnĩ amwĩie: “Sakayo, theea mĩtũkĩ, nũndũ ũmũnthĩ nĩngũũthokea mũsyĩ kwaku.” (Luka 19:5) Sakayo nĩwakinyie nthĩ na asemba mũsyĩ kwake nĩ kana akeyũmbanĩsye mũeni wake.

Yĩla andũ moonie kĩla kyaendeea nĩmambĩĩie kũnyungunyĩsya. Moonaa ũte ũndũ waĩlĩte kwa Yesũ kũtw’ĩka mũeni wa mwĩki wa naĩ.  Sakayo athuĩtw’e nĩ kũvena andũ mbesa ayosany’a koti.

Yesũ alika mũsyĩ kwa Sakayo, andũ mambĩĩe kũnyungunyĩsya mayasya: “Athoketw’e nĩ mwĩki wa naĩ.” Ĩndĩ Yesũ asisya Sakayo nĩwamanyie kana no elile. Na ũu now’o vaendie. Sakayo nĩwaũngamie na eea Yesũ atĩĩ: “Mwĩaĩi, sisya! Nusu ya syĩndũ syakwa nĩngũnenga ngya, na kĩndũ o na kĩva kĩla navenie mũndũ kwa nzĩa ya ũkengani, nĩngũmũtũngĩa kũndũ kũna.”—Luka 19:7, 8.

Yĩla Sakayo waneenie ũu, nĩwoonanisye kana nĩweelila kuma ngoonĩ. Aĩ atonya kũmanya koti ũla woosanĩtye kuma kwa Ayuti me kĩvathũkany’o aitũmĩa lekoti ĩla waĩ nayo, na kwoou athana kũmatũngĩa kũndũ kũna. Syĩndũ isu wathanie syaĩ mbingĩ mbee wa ũndũ mĩao ya Ngai yaĩtye mũndũ eke. (Kuma 22:1; Alivai 6:2-5) O na eka ũu, Sakayo nĩwathanie kũnenga ngya nyusu ya malĩ yake.

Nzĩa ĩsu Sakayo watũmĩie kwonany’a kana nĩweelila nĩyamwendeeisye Yesũ, na nĩkyo kĩtumi wamwĩie: “Ũmũnthĩ ũtangĩĩo nĩwooka nyũmbanĩ ĩno, nũndũ o naku wĩ mwana wa Avalaamu. Nũndũ Mwana wa mũndũ ookie kũmantha na kũtangĩĩa kĩla kyaaĩte.”—Luka 19:9, 10.

Ĩvinda ĩnini ĩvĩtu, Yesũ aĩ aneenete ĩũlũ wa ‘kwaa’ aitũmĩa ĩla ngelekany’o ya mwana waaĩte. (Luka 15:11-24) Nthĩnĩ wa ngewa ĩsu, Yesũ nĩwatũmĩie ngelekany’o ya mũndũ wĩsĩkĩe waĩ mwau na ooneka. Atongoi ma ndĩni na aatĩĩi moo nĩmanyungunyĩisye na mamũneenea Yesũ naĩ nũndũ wa kũthĩnĩkĩa mũndũ ta Sakayo. Ĩndĩ Yesũ nĩwaendeeie kũmantha ana ma Avalaamu ala maaĩte.