Jesu hamwe na arĩa aratwarana nao magakinya itũũra rĩa Jeriko. Kuuma Jerusalemu nginya itũũra rĩu nĩ rũgendo rwa mũthenya ũmwe. Jeriko ĩkoragwo ĩrĩ taũni igĩrĩ, na kuuma taũni ĩrĩa ngũrũ gũthiĩ ĩrĩa njerũ yakirũo hĩndĩ ya Aroma nĩ kĩndũ kilomita ĩmwe na nuthu. Jesu o hamwe na kĩrĩndĩ, moima taũni ĩmwe merekeire ĩyo ĩngĩ, andũ erĩ atumumu makaigua inegene. Ũmwe wao etagwo Baritimayo.

Atumumu acio maigua Jesu akĩhĩtũka, makambĩrĩria kwanĩrĩra makiugaga: “Mwathani, tũiguĩre tha, Mũrũ wa Daudi!” (Mathayo 20:30) Andũ amwe thĩinĩ wa kĩrĩndĩ makamakaania makameera makire, no nao makanĩrĩra na mũgambo mũnene o na makĩria. Jesu aigua ngucanio ĩyo akarũgama. Akeera arĩa maratwarana nao mete andũ acio maranĩrĩra. Nao magathiĩ harĩ atumumu acio na makeera ũmwe wao: “Gĩa na hinya! Ũkĩra nĩ aragwĩta.” (Mariko 10:49) Nĩ ũndũ wa gũkena, mũndũ ũcio agate nguo yake ya igũrũ, agathiĩ ahiũhĩte nginya harĩ Jesu.

Jesu akoria: “Mũkwenda ndĩmwĩkĩre atĩa?” Othe erĩ makamwĩra: “Mwathani, reke maitho maitũ mahote kuona.” (Mathayo 20:​32, 33) Jesu akaringwo nĩ tha, akahutia maitho mao, na akeera ũmwe wao: “Thiĩ, wĩtĩkio waku nĩ watũma ũhone.” (Mariko 10:52) Atumumu acio erĩ makambĩrĩria kuona, na hatarĩ nganja makambĩrĩria kũgooca Ngai. Andũ arĩa angĩ mona ũrĩa gwekĩka, o nao makagooca Ngai. Andũ acio mahonio rĩu makambĩrĩria kũrũmĩrĩra Jesu.

Jesu agĩtuĩkania Jeriko, arathiĩ arigicĩirio nĩ kĩrĩndĩ kĩingĩ mũno. O mũndũ arenda kuona mũndũ ũrĩa wahonia andũ arĩa moima atumumu. Andũ marahatĩkanĩra harĩ Jesu kuuma mĩena yothe, na kwoguo amwe makaaga kamweke ga kũmuona. Ũmwe wao nĩ Zakayo. Nĩwe mũnene wa etia a mbia cia igooti thĩinĩ wa Jeriko na matũũra marĩa marigicĩirie. Tondũ nĩ mũkuhĩ, ndarona kĩrĩa kĩrathiĩ na mbere. Kwoguo agateng’era njĩra-inĩ ĩrĩa Jesu aragerera, na akahamba mũtĩ wa mũkũyũ. Arĩ hau mũtĩ-inĩ, akahota kuona wega. Jesu akuhĩrĩria akona Zakayo arĩ mũtĩ igũrũ akamwĩra: “Zakayo, harũrũka narua, nĩ gũkorũo ũmũthĩ no mũhaka njikare gwaku.” (Luka 19:5) Zakayo akaharũrũka na akahanyũka mũciĩ nĩguo aamũkĩre mũgeni wake wa gĩtĩo.

Andũ mona ũguo, makambĩrĩria gũteta. Marona atĩ ti ũndũ mwagĩrĩru Jesu gũceera kwa mũndũ monaga arĩ mwĩhia. Zakayo atuĩkĩte gĩtonga tondũ wa gũtunya andũ mbeca rĩrĩa ararĩhia magooti.

Jesu akĩingĩra mũciĩ gwa Zakayo, andũ magateta makoiga: “Aathiĩ gũceera kwa mũndũ mwĩhia.” Ĩndĩ Jesu nĩ arona atĩ Zakayo no erire. Na noguo Zakayo aracoka gwĩka. Zakayo akarũgama  akeera Jesu atĩrĩ: “Mwathani, nuthu ya indo ciakwa nĩ ngũhe athĩni, na kĩrĩa gĩothe ndunyĩte mũndũ o wothe ngũrĩha maita mana.”​—Luka 19:7, 8.

Ũndũ ũcio ũkonania wega atĩ Zakayo nĩ erirĩte kuuma ngoro. Kwahoteka arora rekondi cia magooti marĩa onganagia no ahote kũmenya nĩ mbeca cigana anongania kuuma kũrĩ Ayahudi amwe, na akehĩta atĩ nĩ ekũmacokeria maita mana. Ũndũ ũcio o na nĩ makĩria ma ũrĩa watho wa Ngai uugĩte. (Thama 22:1; Maũndũ ma Alawii 6:​2-5) Makĩria ma ũguo, Zakayo akoiga atĩ nĩ ekuoya nuthu ya indo ciake ahe athĩni.

Jesu agakenio nĩ ũrĩa Zakayo onania atĩ nĩ erirĩte akamwĩra: “Ũmũthĩ ũhonokio nĩ ũũkĩte thĩinĩ wa nyũmba ĩno, tondũ o nawe ũrĩ mũrũ wa Iburahimu. Nĩ gũkorũo Mũrũ wa mũndũ okire gũcaria na kũhonokia arĩa morĩte.”​—Luka 19:​9, 10.

Jesu nĩ erĩgĩte kũhũthĩra ngerekano ya mwanake ũrĩa worĩte kuonania ũrĩa andũ arĩa matigĩte Jehova matariĩ. (Luka 15:​11-24) Rĩu kũgerera Zakayo nĩ amahe kĩonereria kĩa mũndũ ũngĩĩrũo nĩ arorĩte no rĩu nĩ onekete. Atongoria a ndini na arĩa mamarũmagĩrĩra nĩ marateta na magokĩrĩra Jesu nĩ ũndũ wa kũrũmbũiya andũ ta Zakayo. O na kũrĩ ũguo, Jesu agathiĩ o na mbere gũcaria na gũcokia ciana iria ciũrĩte cia Iburahimu.