Yesu ne jibumba jo ayilenga najo bafikile ku Yeliko, muzhi po baendanga juba jimo kufuma ku Yelusalema. Kyamweka Yeliko wajinga na mizhi ibiji, muzhi wa kala palepele kilomita umo ne kichika kufuma ku muzhi wa katataka ye bashimikile mu kimye kya bena Loma. Yesu ne jibumba ja bantu byo batwelelenga mu muzhi wa kala ne kufika ku muzhi mukwabo, bampofu babiji balulombo baumvwine kyungwe. Umo jizhina janji wajinga Batemesa.

Byo baumvwine’mba Yesu ye ubena kupita, Batemesa ne mukwabo batatwile kubijika amba: “Nkambo, tubilai lusa, anweba Mwana wa kwa Davida!” (Mateo 20:30) Bamo mu jibumba byo bebakambizhe kuzhindamapo, abo bakizhizhemo ne kukizhamo na kubijika. Yesu byo aumvwine kino kyungye waimene. Watumine bo ajinga nabo amba bamwichile bobo bantu. Bayile ku bano balulombo ne kwambila umo amba: “Kwakamwa ne! Imana; Yesu ubena kukwita.” (Mako 10:49) Na mambo a lusekelo lukatampe, awa mpofu watayile panshi kivwalo kyanji kya peulu ne kwimana kaye kwi Yesu.

Yesu wibashikishe’mba: “Ñanyi kintu kyo mubena kukeba’mba nemubile?” Abo bamukumbwile’mba: “Nkambo, tulabishai meso.” (Mateo 20:32, 33) Byo ebobijile lusa, Yesu wibakwachile mu meso, ponkapotu waambijile umo pe abo amba: “Yanga. Lwitabilo lobe lwa kulengela kubukwa.” (Mako 10:52) Ponkapo bampofu balulombo batatwile kumona, kabiji batatwile kutumbijika Lesa. Bantu bamweneko kino kyamwekele, nabo batumbijikilenga Lesa. Bano banabalume bajinga bampofu batatwile kulondela Yesu.

Kwajinga bantu bavula bingi baishile kwi Yesu kimye kyo apichilenga mu Yeliko. Bantu bonse bakebelenga kumona muntu wabukile aba banabalume bajinga bampofu. Bantu bafuminenga konse konse ne kumubunga Yesu kya kuba bamo kechi bamumwene ne kumumonatu ne. Pa bantu babujile kukonsha kumumona pajinga ne Zakyasa mukulumpe wa basonkeshi bonse bajinga mu Yeliko ne mapunzha azhokolokeleko. Wakankelwe kumona kyamwekelenga mambo waipipile bingi. Onkao mambo, Zakyasa wanyemejile kulutwe ne kukanjila ku kichi kya mukuyu kyajinga ku jishinda mwapichilenga Yesu. Ku kino kichi ko akanjijile wakonsheshe kumona bulongo bintu byonse byamwekelenga. Yesu byo afwenyenyenga pepi watajile ku kichi ne kumona Zakyasa. Wamwambijile’mba: “Zakyasa, ikila bukiji, mambo lelo nafwainwa kwikala mu nzubo yobe.” (Luka 19:5) Zakyasa waikijileko ku kichi ne kuya ku nzubo bukiji kuba’mba akanengezhezhe bintu mwenyi wanji.

Bantu byo bamwene kyamwekelenga, batatwile kunyinyita. Bekimwene’mba kechi kyayijilemo Yesu kwikala mwenyi wa muntu ye bamonanga’mba ndengamambo ne. Zakyasa waikele nonshi na mambo a kwingijisha mashinda a bujimbijimbi pa kutambula mali a misonko.

Yesu byo atwelele mu nzubo ya kwa Zakyasa, bantu banyinyichilenga’mba: “Waya na kwikala  bwenyi mu nzubo ya ndengamambo.” Pano bino, Yesu wamwene’mba Zakyasa wakonsha kulapila. Kabiji Yesu kechi bamulengeshe bumvu ne. Zakyasa waimene ne kwamba’mba: ‘Talai! Nkambo, kichika kya nsabo yami nsakwikipana ku bayanji, kabiji kyonse kyo natambwile ku muntu mu lunkanankana, nsakumubikilapo ne bikwabo bina.’—Luka 19:7, 8.

Zakyasa wamwesheshe’mba walapila kya kine. Kyamweka wapitulukile mu bipepala byanji bya misonko kuyuka bipe byo atambwile ku Bayudea, kabiji wachipile ne kubwezha bipe ne kubikapo bikwabo kwesakana na mwayijile mizhilo ya Lesa. (Kulupuka 22:1; Bena Levi 6:2-5) Kabiji Zakyasa walayile ne kupana kichika kya bintu byanji ku bayanji.

Yesu watemenwe bingi pa lulapilo lwamwesheshe Zakyasa. Wamwambijile’mba: “Lelo jino lupulukilo lwaiya pa ino nzubo, mambo uno muntu naye mwana wa kwa Abalahama. Mambo Mwana muntu waishile na kukeba ne kupulusha balubilamo.”—Luka 19:9, 10.

Yesu waambilepo pa ‘balubilamo’ kimye kyo aambile kishimpi kya mwana waelekele. (Luka 15:11-24) Pano pa kikye kimye, Yesu waambile pa muntu wajinga nobe waeleka pano wamweka. Bantangi ba bupopweshi ne boba bebalondejilenga nangwa banyinyichilenga ne kunena Yesu pa byo atele muchima Zakyasa, bino aye watwajijile nakukeba ne kubwezha bano baana ba kwa Abalahama baelekele.