O Yesu yo nkangu balueke muna Yeriko, lumbu kiamvimba badiete tuka kuna Yerusaleme. Mbanza zizole zina muna Yeriko, Tezo kia kilometa 2 zivambulanga e mbanza yankulu ye mbanza yampa ya esi Roma. O Yesu yo nkangu baviokele mbanza imosi, wau bekuendanga, bamwene mpofo zole zilombanga madia, ziwidi e nsindu mia wantu. Mosi nkumbu andi Batimai.

Vava bawidi vo Yesu mu vioka kena, Batimai ye akwandi bayantikidi o kaza, oku vo: “E Mfumu, e Mwan’a Davidi, utufwil’e nkenda!” (Matai 20:30) E ndonga ibasimini babutama, kansi oyau basakisi o kaza. O Yesu wau kawidi o mazu mama, oningamene. Ovovese wantu bena yandi oku vo, babokela muntu una kaza. Bele kwa alombi, bavovese mosi muna yau vo: “Yangalala! Telama; yandi ubokele.” (Maku 10:49) Kuna kiese kiawonso, o mpofo okatwidi yunga kiandi kiantandu, otelamene, wele kwa Yesu.

Yesu ubayuvuidi vo: “Adieyi nuzolele yavanga kwa yeno?” Bamvutwidi vo: “E Mfumu, yambula meso meto matemoka.” (Matai 20:32, 33) Yesu ubafwididi e nkenda, osimbidi mosi muna yau muna meso, ovovele vo: “Wenda kwaku. Lukwikilu lwaku lusaswidi.” (Maku 10:52) Meso ma yau awole matemokene, bayantikidi kembelela Nzambi. O nkangu wau bamwene e sivi divangamene, bakembelele Nzambi. E mpofo ziwukilu ziyantikidi landa Yesu.

O Yesu wau keviokanga muna Yeriko, ozungilu kwa ndong’ayingi. Konso muntu ozolele mona ndiona owukidi mpofo zazi. Wau vo e ndonga isakidi, akaka ke bena lenda mona Yesu ko. Zakai mpe kalendele mona Yesu ko. Zakai yandi i mfumu muna avakulwisi a mpaku muna Yeriko ye zunga ina lukufi. Wau vo Zakai wankufi, kena mona o mambu mevangamanga ko. Muna kuma kiaki, Zakai otikwini kuna ntwala, wele manta muna nti a sikamone (yovo nsanda) una muna nzila ina Yesu kekwendelanga. Wau kamente muna nti, Zakai omwene mawonso mena vangama. O Yesu vava kafinamene, omwene Zakai kuna nti, umvovese vo: “E Zakai, kulumuka-kulumuka, kadi o unu muna nzo aku inangina.” (Luka 19:5) Zakai okulumukini, wele kubika e fulu kuna nzo andi kimana katambula Yesu.

O nkangu wau bamwene mana mevangamanga, bayantikidi yidima. Kuna kwa yau ke diansongi ko kwa Yesu katambulwa kwa muntu ona oyau bebadikilanga vo nsumuki. Zakai wakituka se mvuama mu kuma kia nzimbu kakudikilanga muna salu kia vakulwisa mpaku.

O Yesu vava kakotele muna nzo a Zakai, o nkangu uyidimini diaka, oku vo: “Okotele muna nzo a nsumuki.” Yesu kalende mana bavovele ko, kadi sinsu kia luviluku lwa ntima kamwene muna Zakai. Zakai otelamene, ovovele kwa Yesu vo: “E Mfumu, e bula-kati kia salanganu yame, se mvana kio kw’asukami, konso kina yakutumuna kwa muntu, iyá ikumvutulwila.”—Luka 19:7, 8.

Ekwe mpila yambote o Zakai kasongele vo ovilukidi kieleka o ntima! Nanga Zakai ovangidi o mbalu wa nzimbu za mpaku kakutumuna kwa Ayuda, i bosi odidi e ndofi ya vutulwila nkonso muntu nkumbu yá. Dina Zakai kavovele disundidi nkutu mana masikidiswa muna Nsiku a Nzambi. (Luvaiku 22:1; Fuka 6:2-5) Zakai odidi mpe e ndofi vo e bula-kati kwa mavua mandi ovana mo kwa asukami.

Yesu oyangalele o luviluku lwa ntima lwa Zakai, umvovese vo: “O unu luvuluku luizidi omu nzo yayi, kadi ongeye mpe u mwan’a Abarayama. O Mwan’a muntu wizidi vavi yo vuluza ana bavila.”—Luka 19:9, 10.

Muna lumbu yaviokele, Yesu wavovele o ‘wantu bavila’ muna kingana kiandi kia mwana wavila. (Luka 15:11-24) Owau ovovele nona kia muntu wavila kansi owau osolokele. Mfumu za mabundu ye alandi au nanga bayidimini Yesu yo kumvovela e mbi wau kemokenanga yo wantu nze Zakai. Kansi o Yesu wele vavi o wan’a Abaraya bavila kimana bavutuka.