A Zeezi ne neb nins sẽn tũud-a n togd sorã taa Zeriko. Be ne Zeruzalɛm zemsa daar a ye kẽnde. Zeriko yaa tẽns a yiibu. Zeriko kʋdrã, ne Zeriko a to b sẽn me Rom-dãmbã sẽn wa n so pãngã. B zãrmã ne taab kolga kilo a yiibu. A Zeezi ne neb kʋʋngã yii Zeriko a yembrẽ wã n debd a to wã. B sẽn wa n kolgdẽ wã, zoens a yiib sẽn yaa bõos-rãmb n wʋm kʋʋngã rãamde. A yembr yʋʋr la a Bartime.

A Bartime ne a tũud-n-taagã sẽn wʋm tɩ yaa a Zeezi la sẽn loogdã, b sɩngame n kelemdẽ, n yetẽ: “Zu-soaba! A Davɩɩd Bi-ribla! Zoe-y tõnd nimbãanega.” (Matye 20:30) Kʋʋngã neb kẽer tãs-b lame, n yeel tɩ b sĩndi. La b maneg n kelmame n paase. A Zeezi sẽn wʋm b kɛlengã, a yalsame. A yeela sẽn tũud-b yẽ wã tɩ b tɩ bool sẽn kelemd-a wã. Bãmb sẽn kẽng zoensã nengẽ wã, b yeel a yembr woto: “Keng f sũuri. Yik tɩ b boonda foom.” (Mark 10:49) A sũur yɩɩ noog hal t’a pidg a zugẽ fuugã, n tik n yik n kẽng a Zeezi nengẽ.

A sẽn ta wã, a Zeezi sok-a lame yaa: “Yãmb datame tɩ mam maan bõe n kõ-yã?” B yiibã fãa leokame: “Zu-soaba, d data d ninã pukri.” (Matye 20:32, 33) B nimbãaneg yõka a Zeezi, t’a sɩɩs b ninã, la a yeel b nin-yend yaa: “Kẽnge! Fo tẽeb n maag foom.” (Mark 10:52) Zoens a yiibã fãa ninã pukame, la sãmbg kae tɩ b sɩnga Wẽnnaam pẽgre. Nebã sẽn yã rẽ wã, bãmb me pẽga Wẽnnaam. Zĩig pʋgẽ wã, zoens a yiibã sẽn paam b ninã sɩnga a Zeezi tũubu.

A Zeezi sẽn dɩk sor n pɩʋʋgd Zeriko wã, neb ka tɛk n da pʋgd-a. Ned fãa ra baood n na n yãa rao ning sẽn puk zoensã ninã. Woto kɩtame tɩ nebã da rɩdgd a Zeezi goabg la rɩtgo, hal tɩ kẽer pa tõe n paam n yã-a ye. Wala makre a Zaase. Yẽ n yaa yaood-dɛɛgdb nins sẽn be Zeriko la a tẽn-kɩremsã naaba. A sẽn yaa ra-koɛɛgã, a ra pa tõe n paam n yã a Zeezi ye. Rẽ n so t’a zoe n tɩ rʋ womsɛɛg sẽn da be sorã zugu, sor ning a Zeezi sẽn na n tũ wã. A sẽn zao be wã, a nee sõma. A Zeezi sẽn kolgã, a yãa a Zaase sẽn zao tɩɩgã, t’a yeel-a yaa: “Zaase, sig tao-tao, bala mam tog n siga fo yirã rũndã.” (Luk 19:5) A Zaase siga tao-tao, n zoe n kul n na n tɩ segl n deeg a Zeezi sẽn yaa nin-kãsengã.

Nebã sẽn wʋm a Zeezi sẽn yeel a Zaase bũmb ningã, b sɩnga yẽgengo. B tagsdame tɩ pa zems t’a Zeezi sig a Zaase zakẽ wã ye. Sã n yaa ne bãmba, a Zaase yaa yel-wẽn-maanda. A sẽn yaa yaood dɛɛgdã yĩnga, a ra wẽgda nebã, hal n lebg ra-kãagre.

A Zeezi sẽn wa n kẽed a Zaase zakẽ wã, nebã yẽgmame n yeel t’a “Zeezi tɩ siga yel-wẽn-maand yiri.” La a Zeezi ra getame t’a Zaase tõe n teka yam n kos sugri. A ra bee bʋʋm me. Bala, a Zaase yik n yalsa a Zeezi taoor n yeel-a yaa: “Ade, Zu-soaba, mam na n yãka m paoongã pʋɩ-sʋk n kõ naong rãmba. La mam sã n dag n zãmba ned n deeg a bũmbu, m na n lebsa yẽnda naoor a naase.”—Luk 19:7, 8.

A Zaase sẽn maanã wilgdame t’a sɩd teka yam n kos sugr ne a sũur fãa. Wõnda yaa sɛbã pʋg la a na n ges n bãng ligdã a sẽn wẽg zʋɩf-rãmbã n deegã. Rẽ n so t’a yeel t’a na n lebsa a sẽn deegã naoor a naase. Woto yɩɩda Wẽnnaam tõogã sẽn yetã menga. (Yikri 21:37; Maan-kʋʋre 5:21-24) Sẽn paase, a Zaase pʋlmame t’a na n yãka a paoongã pʋɩ-sʋk n kõ naong rãmba.

A Zeezi sũur yɩɩ noog ne a Zaase, a sẽn wilg vẽeneg t’a teka yamã, t’a yeel-a yaa: “Fãagr waa yi-kãngã pʋg rũndã. Bala, nin-kãngã me yaa a Abrahaam yagenga. Bala Ninsaal Bi-riblã waame n na n bao la fãag bũmb nins sẽn dag n menemã.”—Luk 19:9, 10.

Sẽn pa kaoos woto, a Zeezi ra wẽe yel-bũnd n gom biig sẽn menem yelle, n na n wilg tɩ sẽn bas-b Wẽnnaamã wõnda neb sẽn meneme. (Luk 15:11-24) A Zaase kibarã sɩd wilgdame t’a ra yaa ned sẽn meneme, tɩ b lebg n yãnd-a. Tũudmã taoor dãmb ne b poorẽ dãmbã ra yẽgemdame la b sãbsd a Zeezi, a sẽn da sakd n sõngd neb wa a Zaase wã. Baa ne rẽ, a Zeezi kell n baoo nin-kãensã sẽn yaa a Abrahaam yagensã n sõng-ba.