Yesu vamoha ni yaale oreiyeno va mukwahani annaphiya o Yeriko, yoowo ori mukwaha wa nihiku nanteero ovinyerya o Yerusalemu. Mmasu makina, Yeriko imanle okhala ipooma piili, epooma yakhalai wunnuwa waya mastatiya mamoha ni emeya okhuma mu epooma evyaani yo Roma. Vaavaa Yesu ni muloko ola aneecaaya eyaaka emoha ya ipooma seiya nave yaacamelaka mu epooma ekina, achu eeli oohoona anniiwa onyakula. Mmoha a yaawo oniichaniwa Partulumewu.

Vaavaa aniiwaaya wi Yesu onnavira, Partulumewu ni nthamwene awe annakhuwela eriki: “Pwiya, mwana a Davide, onimorele ikharari!” (Mateu 20:30) Akinaku ari mmulokoni wa achu yaala annaamaaliha mwakuru wi ehinyakule, nyenya oopiili ala annakhuwela moopwaha mphimo. Vaavaa oniiweiye onyakula iwo, Yesu onneemela. Owo onnaaveka yaawo oreiyeno wi emwiichane mmoha wa yaawo anakhuwela. Awo annaya wa alipa oohoona nave annaloca ni mmoha a yaawo eriki: “Olipe, onnawitxhana, vinyà!” (Marko 10:49) Moohakalala, mulipa oohoona onnavonya malaya awe, acuphaka ni inaani sawe, nave onnaya wa Yesu.

“Ti seni munakhwelanyu wi kiwereleni?” Yesu onnakoha. Nyenya alipa oohoona oopiili annaakhula eriki: “Pwiya, wi mitho ahu ehuleye.” (Mateu 20:32, 33) Amoriwaka ikharari ntakhara yaawo, Yesu onnaphara miitho aya, xaxaxa wa mmoha a yaawo alocaka: “Hawè, ororomela wà òhopenusa.” (Marko 10:52) Alipa oohoona oopiili annapacerya woona, nave moohilekela annapacerya omvuwiha Muluku. Yoonaka yeeyo yeeren’ye, achu annamucicimihatho Muluku. Alopwana yaale yaari alipa oohoona annapacerya omuchara Yesu.

Muloko mutokweene woomurukurerya Yesu vaavaa onavireiye o Yeriko. Muchu ti muchu onachuna omoona yoowo aapenunse alopwana ale yaari oohoona. Achu aatepa omurica Yesu, mwawiihiiha, akina hanawerya naari mano omoona. Ela enneereya ni Sakeyu. Owo mutokweene a alipa musokho a epooma ni orukurerya mu Yeriko oothene. Woona wi owo tookhuveyaxa, hanawerya woona echu taani eneereya. Mwawiihiiha Sakeyu onnachimakela ohoolo nave onnawela mmwirini wa mukuukhu yoowo ori ohoolo mmuxewe weiwo Yesu anayeiyewo. Vaavaa oreiye mmwirini, Sakeyu onnawerya woona ichu soothene. Yesu aacamelaka ni amoonaka Sakeyu ori mmwirini, onnaloca: “Zakeu, akuvá, okhuruwe, wona wi ennakhweleya wi olelo kikhale vate và.” (Luka 19:5) Sakeyu onnakitha mmwirini nave onnachimakela owannyawe wi amwaakhele phaama muleco awe oocicimiheya.

Vaavaa achu anoonaaya echu eneereya, annapacerya omwaapa Yesu. Awo anoona ntoko wi tahi yoophwanelela Yesu okhala muleco a muchu yoowo awo anamoonaaya ntoko namacheka. Sakeyu ooreela nthowa nawi owo onnawiiyera achu ikhorowa elukuluku onaliviheiye musokho.

Elukuluku Yesu onavoloweiye vachokoni va Sakeyu, achu haneeliwa murima: “Yesu onaya ohaya  vate va mulipa òtxheka.” Oohiya yeeyo, Yesu onnoona mwa Sakeyu wi owo onanwerya ocharuwa. Nave Yesu hanakhala awuukhuwa. Sakeyu onneemela nave onnamuleela: “Pwiya, kinamwavaha alipa òhawa eriyari ya muhakhu aka ni, karimwi kimwiyenre mutxhu, kinammukokiherya vasese.”—Luka 19:7, 8.

Chiryene ola mukhalelo waphaama Sakeyu wooniherya wi oocharuwa moomalela! Mwawooneya owo onahaala waalakhanyerya waaca wa ikhorowa sa musokho aakhenleiye wa Ayuta oohiyanahiyana, nave oororomeliha waakookiherya vasese. Ela ennavirelela yeeyo nlamulo na Muluku nnalamulelaaya. (Mukwaha 22:1; Onamukutxho 6:2-5) Opwaha yeeyo, Sakeyu oororomeliha okusa emeya ya muhakhu awe wi aakawele alipa oohaawa.

Yesu onnahakalala ni yawooniherya ya Sakeyu orukunusa wawe murima nave onnamuleela yoowo ariki: “Olelo nivuluso nophiya vate va; wona wi olatho ori mwana a Abraau. Ti wi Mwana a mutxhu àrwele owasya ni wavulusa atxhu yarimenle.”—Luka 19:9, 10.

Hiihaanoru, Yesu ooceenyerya mwaha wa ‘orimela’ yoowo olonceiye mu niphwanaphwaniho nawe na mwaana oorimeela. (Luka 15:11-24) Vano owo onnavaha yootakiherya yeeparipari ya muchu yoowo aari aphaama nave aari ntoko oorimeela nto onooneya. Ahooleli a malapelo ni yaawo anaachara anamwaapa Yesu nave annamunyemula nthowa na waapwacha yaawo arimenle ntoko Sakeyu. Nlelo, Yesu onnatitelela owaavya ni waakhaviherya yaawo arimenle ari anamwane a Aparahamu.