Sinmabi si Jesus tan saray kaiba ton manbiabiahe diad Jerico, a satan et sakey agew ya akaren manlapud Jerusalem. Nibaga a doblin syudad so Jerico, ta walaan iya na daan a syudad a say kaarawi to et manga 1.6 kilometro ed balon syudad ya impaalagey ed panaon na saray Romano. Sanen papaway lay Jesus tan saray totoo ed sakey ed sarayan syudad pian onlad samay sakey, nadngel na duaran bulag a mipapayabol so idadalan da. Say ngaran na sakey et Bartimeo.

Sanen nadngel nen Bartimeo tan say kaiba to ya ondadalan si Jesus, inyeyag da: “Katawan, Anak nen David, kasian mo kami!” (Mateo 20:30) Binano ira na arum a totoo pian mandeen ira, balet mas inkasil day eyag da. Nadngel iya nen Jesus kanian tinmunda. Impatawag tod saray kaiba to iramay oneeyag. Nila da iray mipapayabol tan inkuan dad samay sakey: “Manpakpel ka! Alagey ka ta tatawagen to ka.” (Marcos 10:49) Manliket imay laki kanian imbantak toy latop ton kawes, inmalagey a tampol, tan linmad si Jesus.

“Antoy labay yon gawaen kod sikayo?” so intepet nen Jesus. Akikasi so duaran bulag: “Katawan, lukasan moy kamataan mi.” (Mateo 20:32, 33) Lapud akasian ira nen Jesus, diniwit toy mata ra tan imbaga tod sakey ed sikara: “La ka la. Pinaabig ka na pananisiam.” (Marcos 10:52) Akanengneng la iray duaran bulag ya mipapayabol, tan seguradon inggloria ray Dios. Anengneng iya na totoo kanian indayew da met so Dios. Saraman a datin bulag et tinmumbok la ed si Jesus.

Dakdakel so akapaliber ed si Jesus legan ton ondadalan ed Jerico. Amin da et labay dan nanengneng imay amaabig ed saray bulag a lalaki. Mumungkogen na totoo si Jesus, kanian sikatoy agnanengneng na arum. Sakey ed saratan si Zaqueo. Sikatoy pangulo na saray managsingil na buis ed Jerico tan diad kaliberliber. Lapud melag a too, agto nanengneng so nagagawa. Kanian batik lad unaan si Zaqueo tan kinmalab ed kiew a sikamoro a nadalan nen Jesus. Sankanengneng ditan nen Zaqueo so amin a nagagawa. Sanen manasingger lay Jesus tan anengneng toy Zaqueo ed tagey na kiew, inkuan to: “Zaqueo, apuram so onepas, ta ontuloy ak natan ed abung mo.” (Lucas 19:5) Inmepas si Zaqueo tan nanapuran sinmempet pian sangkailien so importantin bisita to.

Sanen anengneng na totoo so nagagawa, nanmeremere ira. Parad sikara et aliwan duga a pasangkaili si Jesus ed sakey a toon ipapasen dan makasalanan. Yinmaman si Zaqueo lapud pansasaol to no mansisingil na buis.

Sanen linmoob si Jesus ed abung nen Zaqueo, nannguronguro iray totoo: “Sikatoy papasangkaili ed abung na toon makasalanan.” Balet anengneng nen Jesus a posiblin magbabawi si Zaqueo. Tan duga so iilaloan to. Inmalagey si Zaqueo tan inkuan tod Jesus: “Nengneng mo,  Katawan! Iter kod saray mairap-bilay so kapalduay kaykayarian ko, tan antokaman a kinatkat kod siopaman et ipawil ko so mamipat a karakel.”​—Lucas 19:7, 8.

Agaylan abig a paraan pian paneknekan nen Zaqueo ya tua so pagbabawi to! Based saray rekord tod buis, sarag ton kuentaen so kantidad ya inawat tod saray Judio, tan insipan ton ipawil itan a mamipat. Sobra ni ingen itan ed say kakaukolanen na ganggan na Dios. (Exodo 22:1; Levitico 6:2-5) Sakey ni, insipan nen Zaqueo ya iter tod saray mairap-bilay so kapalduay kaykayarian to.

Aliketan si Jesus ed sayan paneknek a magbabawi si Zaqueo tan inkuan tod sikato: “Diad sayan agew et sinmabi lay kilalaban ed sayan abung, lapud sikatoy sakey met ya anak nen Abraham. Ta linma dia so Anak na too pian anapen tan isalba to so abalang.”​—Lucas 19:9, 10.

Agano nin imbaga nen Jesus so ilustrasyon nipaakar ed anak ya abalang pian ipanengneng so kipapasen na saramay tinaynan day Jehova. (Lucas 15:11-24) Natan et impaimano to so nanengneng ya alimbawa na sakey ya singa abalang balet ta aromog. Nayarin manreklamo iray relihyoson lider tan saray onsusuportad sikara nipaakar ed si Jesus tan sikatoy balawen da lapud iimanoen to iray singa si Zaqueo. Balet siansia nin aanapen nen Jesus tan papapawilen to iray abalang ya anak nen Abraham.