Jesusqa paywan risharqanku chay runaswan Jericoman chayarqanku. Chay llajtaqa Jerusalenmanta uj día puriypi jina kasharqa. Chantapis iskaypi tʼaqasqa karqa. Ujnin llajtamanta ujninkamataj, casi iskay kilómetros jina karqa. Ujnin llajtataqa Romanospa tiemponpi qhepallata ruwasqanku. Jesusqa ashkha runaswan khuska, chay ujnin llajtamanta ujninman risharqa. Ñanta rishajtinkutaj, iskay ciego runas chayninta pasashasqankuta uyarerqanku. Ujnin ciegoqa Bartimeo karqa.

Bartimeowan chay ujnin cieguitopiwanqa, qhaparerqanku: “¡Señor, Davidpa Wawan, khuyarikuwayku ari!”, nispa (Mateo 20:30). Wakin runasqa chay ciegosta chʼinyachiyta munaspa kʼamerqanku. Paykunatajrí aswan kallpawan qhaparerqanku. Jesustaj paykunata uyarispa sayaytawan nerqa: “Wajyamuychej”, nispa. Runasqa chay ciegosta wajyamuspa ujninman nerqanku: “Sonqochakuy. Sayariy, Jesús wajyashasunki”, nispa (Marcos 10:49). Paytaj qhatananta choqaytawan ujllata sayarispa, Jesusman qayllaykorqa.

Chantá Jesusqa chay iskay ciegosta nerqa: “¿Imatataj munankichej qankunapaj ruwanayta?”, nispa. Paykunataj nerqanku: “Señor, ñawisniyku rikunanta munayku”, nispa (Mateo 20:32, 33). Chantá Jesusqa mayta khuyakuspa ñawisninkuta llankharerqa, ujnin ciegomantaj nerqa: “Ripullay, creesqaykirayku sanoyasqa kanki”, nispa (Marcos 10:52). Chay iskay ciegostaj chay ratopacha rikuyta aterqanku, Jesuspa qhepantataj rerqanku Diosta jatunchaspa. Chayta rikuspa tukuy runaspis Diosta jatunchallarqankutaj.

Jesús Jericó llajtanta pasashajtin, ashkha runas qhepanta rerqanku. Paykunaqa Jesusta rikuytapuni munarqanku ciego runasta sanoyachisqanrayku. Jinapis ashkha runaspa chaupinpi kasqanrayku wakenqa mana rikuyta aterqankuchu. Chay runasmanta ujnenqa Zaqueo karqa. Payqa Jericopi kaj impuesterospata, chay qaylla llajtaspi kaj impuesterospatawan kurajninku karqa. Juchʼuy runalla kasqanraykutaj, mana Jesusta rikuyta aterqachu. Chayrayku payqa usqhay usqhayta ñauparispa uj kʼita higo sachʼaman wicharerqa, chaymanta Jesusta rikunanpaj. Jesusqa chayninta pasashaspa, Zaqueota sachʼa patapi rikorqa, nerqataj: “Zaqueo, usqhayta uraykamuy, kunan wasiykipi qhepakusaj”, nispa (Lucas 19:5). Zaqueotaj usqhayllata uraykamuytawan, Jesusta wasinman kusisqa pusarqa.

Runasqa chayta rikuspa rimayta qallarerqanku. Paykunaqa mana allinpajchu qhawarqanku Jesús Zaqueoj wasinman rishasqanta. Paykunapajqa Zaqueo juchasapa runa karqa. Chantapis Zaqueoqa wajkunamanta kurajta impuestota cobraspa qhapajyaykusqa.

 Chayrayku runasqa Jesusta Zaqueoj wasinman yaykojta rikuspa thutorqanku: “¿Imaynatá juchasapa runaj wasinman yaykonqari?”, nispa. Jesustajrí yacharqa Zaqueo juchasninmanta pesachikunanta. Ajinapunitaj karqa. Chantá Jesusman nerqa: “Señor, tukuy kapuwasqanmanta khuskanta wajchasman qopusaj. Sichus pimantapis chʼaukiyaspa qolqenta suwarqani chayqa, tawa jinastawanraj kutichipusaj”, nispa (Lucas 19:7, 8).

Zaqueoqa sonqomantapacha pesachikorqa. Payqa impuestota cobrasqan papelpisina qhawaykuyta aterqa, pikunamantachus kurajta impuestota cobrasqanta. Chantá Zaqueoqa, Jesusman nerqa chay runasman tawa jinastawanraj kutichipunanta. Chaytaj Ley nisqanmantapis aswan ashkha karqa (Éxodo 22:1; Levítico 6:2-5). Chantapis Zaqueoqa nerqa: “Tukuy kapuwasqanmanta khuskanta wajchasman qopusaj”, nispa.

Jesusqa Zaqueo pesachikusqanmanta kusikorqa. Chayrayku nerqa: “Kunan pʼunchay kay wasiman salvación chayamun, Zaqueopis Abrahanpa wawan kasqanrayku. Noqaqa chinkasqa kajta maskʼaj, salvajtaj jamuni”, nispa (Lucas 19:9, 10).

Jesusqa aswan ñaupaj kutillapi, Diosmanta karunchasqa kajkunata chinkasqa qhari wawawan kikincharqa (Lucas 15:11-24). Zaqueoqa chay chinkasqa qhari wawa jina karqa, pesachikorqataj. Jinapis judiospa religionninkuta ñaupajman apajkuna, paywan khuska kajkuna imaqa, juchasninkumanta pesachikoj runasta Jesús yanapasqanmanta phiñakorqanku. Jesustajrí, chinkasqa qhari wawa jina kajkunata maskʼallarqapuni, pesachikunankupajtaj yanapayta munarqa.