Yesu ndi ŵanthu wo wenga nawu angufika ku Yeriko. Uwu wenga ulendu wa zuŵa limoza kutuwa ku Yerusalemu kuchifika ku Yeriko. Viwoneka kuti kwenga matawuni ngaŵi ngo ngaziŵikanga ndi zina lakuti Yeriko. Tawuni yakali yenga pa mtunda wa makilomita 1.6 kutuwa po penga tawuni yinyaki yasonu yo yinguzengeka mu nyengu ya Aroma. Pa nyengu yo Yesu ndi ŵanthu wo wenga nawu atuwanga mutawuni yinyaki kuluta mutawuni yinyaki, anthulumi ŵaŵi wo ŵenga achibulumutiya kweniso akupemphesa anguvwa chiwawa cha ŵanthu wo ayendanga nayu. Yumoza mwa ŵanthu achibulumutiya ŵenaŵa wenga Batimeyu.

Batimeyu ndi munyaki yo wenga nayu ŵati ŵavwa kuti kujumpha Yesu, angwamba kudaniriza kuti: “Ambuya, tichitiyeni lisungu Mwana waku Davidi!” (Mateyu 20:30) Ŵanthu anyaki wo ŵenga pa gulu lenili, angwamba kuŵakalipiya ndi kuŵakambiya kuti aje cheti, kweni ndipu yiwu adanirizanga ukongwa. Yesu wati wavwa kudaniriza, wanguma. Ndipu wangukambiya ŵanthu wo wenga nawu kuti adani ŵanthu wo adanirizanga. Yiwu anguluta ku ŵanthu akupemphesa ŵenaŵa ndipu angukambiya yumoza kuti: “Khwima mtima! Soka; watikudana.” (Mariko 10:49) Munthu wachibulumutiya mwenuyu wangukondwa ukongwa, ndipu wanguponya pasi malaya ngaki ngakubwalu, wangusoka mwaliŵiliŵi ndi kuluta kwaku Yesu.

Sonu Yesu wangufumba kuti: “Mukhumba kuti ndikuchitiyeninji?” Achibulumutiya wosi ŵaŵi angumupempha kuti: “Ambuya, tikhumba kuti tiyambi kulereska.” (Mateyu 20:32, 33) Yesu wanguchita chitima ndipu wangukwaska masu ngawu ndipu wangukambiya yumoza mwa ŵanthu ŵenaŵa kuti: “Lutanga. Chivwanu chaku chakuchizga.” (Mariko 10:52) Ŵanthu ŵaŵi wo ŵenga achibulumutiya kweniso akupemphesa angwamba kulereska, ndipu tikayika cha kuti wosi angwamba kuthamika Chiuta. Ŵanthu ŵati awona venivi, nawu angwamba kuthamika Chiuta. Pavuli paki, ŵanthu wo kali ŵenga achibulumutiya angwamba kulondo Yesu.

Pa nyengu yo Yesu wajumphanga mutawuni ya Yeriko, ŵanthu anandi anguza kuti aziwoni munthu yo wanguchizga ŵanthu achibulumutiya. Chifukwa chakuti ŵanthu ŵenga anandi angwamba kufinyikiza Yesu, ndipu anyaki atondekanga ndi kumuwona viyo. Zakeyu nayu wenga pa gulu la ŵanthu wo atondekanga kumuwona. Iyu wenga mura wa akusonkhesa msonkhu mutawuni ya Yeriko kweniso muvigaŵa vinyaki va kufupi ndi Yeriko. Chifukwa chakuti wenga mufupi ukongwa wawonanga cha vo vachitikanga. Mwaviyo, Zakeyu wangutchimbiriya panthazi ndi kukwera muchimiti cha mkuyu cho chenga mumphepeti mwa nthowa yo Yesu wajumphanga. Pa nyengu yo wenga muchanya muchimiti, Zakeyu wawonanga chechosi. Yesu wati wafika pafupi, wangulereska muchanya ndipu wanguwona Zakeyu. Iyu wangumukambiya kuti: “Zakeyu, sika liŵi chifukwa msanawale nditenere kuja munyumba yaku.” (Luka 19:5) Zakeyu wangusika mwaliŵi ndipu wangutchimbiriya kunyumba kuti wakanozgeke mulendu wapade.

Ŵanthu ŵati awona vo vinguchitika, angwamba kung’ung’uta. Yiwu awonanga kuti kwenga kwambula kwenere kuti Yesu waluti kunyumba ya munthu yo yiwu amuwonanga kuti ngwakubuda. Zakeyu wangukhupuka chifukwa wabanga ndalama za ŵanthu mwachinyengu pakusonkhesa msonkhu.

Yesu wati wasere munyumba yaku Zakeyu, ŵanthu angukamba kuti: “Waluta kunyumba ya munthu wakubuda.”  Kweni Yesu wanguwona kuti Zakeyu wangalapa, ndipu iyu wanguguŵa cha ndi vo ŵanthu angukamba. Pavuli paki, Zakeyu wangusoka ndipu wangukambiya Yesu kuti: “Awonani! Hafu ya vinthu vangu ndiperekengi ku ŵanthu akavu, ndipu chechosi cho ndikuphanga ku munthu weyosi, ndimuweziyengi maulendu nganayi.”—Luka 19:7, 8.

Vo Zakeyu wangukamba vingulongore limu kuti iyu wangulapa ndi mtima wosi. Iyu wangulongo kuti watingi wagwiriskiyengi ntchitu mabuku nga msonkhu kuti waŵerengese ndalama zo Ayuda aperekanga, ndipu wangulayizga kuti munthu weyosi wamuweziyengi maulendu nganayi. Vo wangulayizga vinguphara vo dangu laku Chiuta lakambanga kuti munthu waperekengi asani wato chinthu cha munyaki mwachinyengu. (Chituwa 22:1; Ŵalevi 6:2-5) Zakeyu wangulayizga so kuti watongi hafu ya vinthu vaki ndipu waviperekengi ku ŵanthu akavu.

Yesu wangukondwa ukongwa ndi vo Zakeyu wangukamba vo vingulongo kuti walapa, ndipu wangumukambiya kuti: “Msanawale utaski waza munyumba iyi chifukwa nayu ndi mwana waku Abrahamu. Chifukwa Mwana wa munthu wanguza kuzipenja ndi kutaska ŵanthu akulanda.”—Luka 19:9, 10.

Yapa ndipu pajumpha waka nyengu yimanavi kutuliya po Yesu wangukambiya ntharika ya mwana yo wangusoŵa, kuti wawovyi ŵanthu kuvwisa nkhani ya ŵanthu wo atimuleka Yehova. (Luka 15:11-24) Iyu wangulongo ŵanthu ŵenaŵa chakuwoniyapu cha munthu chayiyu yo wangusoŵa, kweni wangusanirika. Alongozgi a chisopa kweniso ŵanthu wo aŵalondonga atenere kuti ang’ung’utanga ndipuso asuskanga Yesu chifukwa cha mo wachitiyanga vinthu ndi ŵanthu nge Zakeyu. Kweni Yesu wangulutirizga kupenja ŵana aku Abrahamu wo angusoŵa.