Jesu abaabo mbeenda limwi basika ku Jeriko, ikweendwa buzuba bomwe kuzwa ku Jerusalemu. Mubwini, munzi wa Jeriko upangidwe aminzi yobilo, munzi wakaindi ukkede kubusena kulampa makkilomita aasika ku 1.6 kuzwa kumunzi mupya iwakayakwa mumazuba aabana Roma. Ciindi Jesu ankamu yabantu noili mukweenda kuzwa mumunzi umwi akati kayeeyi kuya muluumbi, boofwu bobilo basikulombelela bamvwa kuyobeka. Umwi wabo ngu Bartimeyu.

Bamvwe kuti Jesu uli mukwiinda, Bartimeyu amweenzinyina batalika koongolola kuti: “Mwami, tufwide luse, O Mwana wa Davida!” (Matayo 20:30) Bamwi munkamu babakalalila akubaambila kuti baumune, pele boofwu aabo bobilo boongololesya. Amvwe koongolola ooko, Jesu waima. Waambila baabo mbali limwi kuti bamwiite kufwumbwa naa nguni ooyo woongolola. Baunka kuli basikulombelela aabo akwaambila umwi wabo kuti: “Kkazika moyo! Nyamuka; ulakwiita.” (Marko 10:49) Kakkomene, mwaalumi ooyo moofwu wasowa cisani cakwe caatala, wasotoka akuunka kuli Jesu.

Jesu wabuzya kuti: “Ncinzi ncomuyanda kuti ndimucitile?” Baalumi boofwu boonse bobilo bavwiila kuti: “Mwami, tuyanda kuti meso eesu ajaluke.” (Matayo 20:32, 33) Akaambo kakweetezyegwa, Jesu wajata meso aabo, eelyo ikujatikizya umwi wabo waamba kuti: “Koya. Lusyomo lwako lwakuponya.” (Marko 10:52) Mpoonya boofwu bobilo basikulombelela batalika kubona, alimwi cakutadooneka boonse bobilo batalika kutembaula Leza. Akaambo kakubona cacitika, bantu abalo batembaula Leza. Aabo baalumi ibali boofwu lino batalika kutobela Jesu.

Kuli makamu-makamu aabantu bamuzingulukide Jesu ciindi neenda kwiinda mu Jeriko. Boonse bayanda kubona yooyo iwaponya baalumi aabo boofwu. Bantu balimubumbide Jesu kumabazu oonse; aboobo, bamwi akati kabo tabakonzyi akumubona. Zakeyo ngumwi wabaabo ibaalilwa kumubona. Ngomupati wabasimutelo mumunzi wa Jeriko alimwi amumasena aauzingulukide. Akaambo kakuti mufwaafwi, takonzyi kubona cicitika. Aboobo, Zakeyo wabalikila kumbele akutanta mumukuyu uuli munzila mwatiiyinde Jesu. Kali mucisamu, Zakeyo lino ulakonzya kubona zyoonse zicitika. Ciindi Jesu naaswena afwaafwi akubona Zakeyo kali mucisamu, waamba kuti: “Zakeyo, fwambaana koseluka, nkaambo sunu ndeelede kukkala muŋanda yako.” (Luka 19:5) Zakeyo waseluka akulundukila kuŋanda kuyootambula mweenzu wakwe uulemekwa.

Bantu nobabona cicitika, batalika kuŋuŋuna. Balimvwa kuti Jesu tanaacita kabotu kuba mweenzu wamuntu ngobabona kuti ngusizibi. Zakeyo wavwuba kwiinda mukubelesya bumpelenge ciindi nabweza mitelo.

Ciindi Jesu naanjila muŋanda ya Zakeyo, bantu batongooka, balaamba: “Waunka kuyooswaya muntu sizibi.” Pele, walo Jesu wabona kuti Zakeyo ulakonzya kweempwa. Alimwi buya Jesu tanaausyigwa nsoni pe. Zakeyo waimikila akumwaambila  kuti: “Bona! Cisela calubono lwangu, O Mwami, ndilacipa bacete, alimwi kufwumbwa ceeco ncindakanyanga muntu kwiinda mukumubejelezya, ndilamujolela akumuyungizyila ziindi zyone.”—Luka 19:7, 8.

Eelo kaka tiiliboteli nzila eeyi Zakeyo njaatondezya kuti weempwa ncobeni! Kulangilwa kuti ulabelesya nzyaakalemba kujatikizya mitelo njaakabweza kuba Juda baindene-indene, eelyo camoyo woonse wasyomezya kubajolela ziindi ziyungizyidwe ziindi zyone. Eeci ncayanda kucita cilainda aali ceeco ncowaamba mulawo wa Leza. (Kulonga 22:1; Levitiko 6:2-5) Kuyungizya waawo, Zakeyo wasyomezya kupa bacete cisela calubono lwakwe.

Jesu wabotelwa kubona bumboni oobu bwakuti Zakeyo weempwa, aboobo wamwaambila kuti: “Sunu lufwutuko lwaboola muŋanda eeyi nkaambo ooyu awalo mwana wa Abrahamu. Nkaambo Mwanaamuntu wakaboolela kuyandaula akufwutula basweekede.”—Luka 19:9, 10.

Calino-lino, Jesu wakaambide makani aajatikizya ‘bantu basweekede’ ciindi naakapa cikozyanyo camwana wakasweekede naa mwana mutaka. (Luka 15:11-24) Lino wapa cikozyanyo cijatikizya muntu mwini-mwini buya ikutali wakweezyeezya walo wakasweekede pele iwajanwa. Basololi babukombi alimwi abasikubatobela balakonzya kutongooka akusola kumujanina mulandu Jesu akaambo kakubikkila maano kubantu bali mbuli Zakeyo. Pele walo Jesu wazumanana kuyandaula akupilusya bana aaba ba Abrahamu ibasweekede.