Ne oko atu a Iesu mo latou kolā ne faima‵laga fakatasi atu mo ia ki Ieliko, telā kāti e tasi te aso te leva mai i Ielusalema. E lua a fa‵kai o Ieliko, a te fa‵kai mua ne tu i se maila e tasi mai te fa‵kai fou o te kau Loma. I te taimi ne olo atu ei a Iesu mo te vaitino mai te fa‵kai e tasi kae olo atu ki te suā fa‵kai, ne lagona ne se avā tino ‵kivi kae akai mea a te logoa. E tokotasi mai i a lāua, ko Patimaio.

I te lagonaga ne lāua me i a Iesu ko fanatu i konā, ne kamata o paka‵laga atu a Patimaio mo tena taugasoa: “Te Aliki, te Tama a Tavita, ke alofa mai koe ki a māua!” (Mataio 20:30) A nisi tino i te vaitino, ne ‵liko atu ki a lāua ke ‵nofo filemu, kae ne momea aka eiloa ki luga te lā paka‵laga atu. I te lagonaga ne Iesu te fakalavelave, ne tu ei a ia. Ne fai atu a ia ki tino kolā ne olo mo ia ke ka‵laga atu ki te tino telā e pakalaga ke fanatu. Ne olo atu latou ki tino akai mea kae fai atu ki se tokotasi o lāua: “Fakamalosi! Tu ki luga, ko Iesu tenā e kalaga atu ki a koe.” (Maleko 10:49) Ona ko te lasi o tena fiafia, ne ‵pei keatea ei ne te tagata ‵kivi tena gatu, ne tafuke ki luga, kae fanatu ki a Iesu.

“Se a te mea e ma‵nako koulua ke fai ne au mō koulua?” ko te fesili a Iesu. Ne fakamolemole atu te avā tāgata ‵kivi konei: “Te Aliki, fai aka ke ‵kite mā mata.” (Mataio 20:32, 33) Ne fakaosofia a Iesu ne te alofa, kae fakapatele atu a ia ki lā mata, maise eiloa ki te tino e tokotasi i a lāua, kae fai atu: “Fano. Ko tou fakatuanaki ne ‵lei ei koe.” (Maleko 10:52) Ne toe ‵kite a mata o te avā tino ‵kivi kae akai mea konei, kae e mautinoa eiloa me ne kamata o tavae atu lāua ki te Atua. I te taimi ne matea atu ei ne tino a mea kolā ne ‵tupu, ne ‵viki atu foki latou ki te Atua. Ne kamata ei o tau‵tali atu a tāgata ‵kivi konei ki a Iesu.

Ne tokouke eiloa a te vaitino i tafa o Iesu i te taimi ne fanatu ei a ia i Ieliko. Ne fia lavea ne tino katoa a te tino telā ne faka‵kite ne ia a mata o tino ‵kivi. Ne fakatau teke atu a tino ki a Iesu mai feitu katoa; tela la, ne seki mafai o lavea ne nisi tino a ia. Tenā loa te mea ne tupu ki a Sakaio. A ia ko te pule o tino ‵tae lafoga i Ieliko mo kogā fenua i tafa i ei. Ona ko tena toetoe, ne seki lavea ei ne ia a mea kolā ne ‵tupu. Tela la, ne tele atu a Sakaio o kake ki luga i te lakau ko te sukamolo (io me ko te mati) telā ne tu i te auala ne fanatu ei a Iesu. Mai i luga i konā, ne mafai ei o lavea ne Sakaio a mea katoa ne ‵tupu. I te taimi ko pili atu ei a Iesu kae lavea ne ia a Sakaio, ne fai atu a ia: “Sakaio, ke vave ifo ki lalo, me e ‵tau au o nofo i tou fale i te aso nei.” (Luka 19:5) Ne fanaifo a Sakaio kae tele fakavave atu ki tena fale ke fakafetaui atu ki tena mālō sili.

I te taimi ne matea atu ei ne tino a mea kolā ne ‵tupu, ne kamata o mui‵mui latou. Ne mafau‵fau latou me e se ‵tau o fai a Iesu mo fai se mālō a te vaegā tagata penā, telā ne ‵kilo atu latou ki ei e pelā me se tino agasala. Ne maumea a Sakaio ona ko te kaisoa sāle ne ia o tupe i te taimi e ‵tae ei ne ia a lafoga.

I te taimi ne ulu atu ei a Iesu ki te fale o Sakaio, ne mui‵mui a tino: “Ne fai a ia e pelā me se mālō i te fale  o se tagata agasala.” Kae ne matea ne Iesu me e mafai o salamō a Sakaio. Kae ne seki fanoanoa a Iesu i ei. Ne tu a Sakaio ki luga kae ne fai atu: “Kiloke! Ka tuku atu ne au te āfa o aku mea ki tino ma‵tiva, e te Aliki, kae ko so se mea ne puke ne au mai so se tino, ka toe fakafoki atu ne au ki ei e fakafa taimi.”—Luka 19:7, 8.

Ko oko eiloa i te ‵lei o te auala ne fakamaoni atu ei ne Sakaio a tena salamō tonu! Ne mafai eiloa o fakagalue aka ne ia mai ana tusi lafoga me e pefea te uke o tupe ne ‵tau o maua ne ia mai i tino Iutaia kese‵kese, kae tauto atu ke fakafoki ne ia fakafa taimi a tupe konā. E sili atu eiloa i lō te mea telā e manakogina i te Tulafono a te Atua. (Esoto 22:1; Levitiko 6:2-5) Kae sili atu i ei, ne tauto eiloa a Sakaio ke tuku atu te āfa o ana kope ki tino ma‵tiva.

Ne fiafia a Iesu ki te fakamaoniga tenei o te loto salamō o Sakaio kae fai atu: “Ko oti ne oko mai te fakaolataga ki te fale tenei i te aso nei, me i a ia foki se tama a Apelaamo. Me i te Tama a te tagata ne vau o ‵sala kae faka‵sao a tino kolā ne ‵galo.”—Luka 19:9, 10.

Fakamuli nei, ne saga malosi atu a Iesu ki te tulaga o te ‘tino telā ne galo’ i tena tala fakatusa e uiga ki te tama tagata ne galo. (Luka 15:11-24) Nei la, ne fai eiloa a ia mo fai se fakaakoakoga tonu o se tino telā ne galo kae ne toe maua mai. Ne mafai o fāmeo a takitaki lotu mo olotou soko e uiga ki a Iesu, kae fakamasei ne latou a ia mō te saga atu ki vaegā tino pelā mo Sakaio. Kae ne tumau eiloa a Iesu i te ‵sala atu ki tama a Apelaamo kolā ne ‵galo ke toe faka‵foki mai.