Yesu ni atthu ale yaamutthara yaahiphiya muttetthe wa oYerikho, mukwaha wa nihiku nimosa okhumaka oYerusalemu. Vanikhala ntoko wira epooma ya oYerikho yaahikhalana mipantta miili. Mpantta mmosa waari wa khalai waarakamenle ekiloomo 1.6, masi mpantta mukina waari wa niinaano yoowo waatekiwe ni aRoma. Vaavo Yesu ni muttitthi ole waamutthara yaakhuma aya mmosa wa mittetthe iye, anaattamela muttetthe mukina, anasimola anli yaahiiwa onyakula wa atthu. Mmosa aalipa-oohoona ale, aari Bari-Timeyo.

Okathi yaiwale aya wira Yesu anvira, Bari-Timeyo ni mukhwaawe yaahipacerya okhuwela ariki: “Pwiya, Mwana a Davidi, munimorele ikharari!” (Matheyo 20:30) Atthu akina a muttitthi ole yaahiruma wira amaalihiwe, masi awo yaamutepa okhuwela. Nuumala Yesu wiiwa okhuwela waya, aaheemela. Vano aahaavekela atthu ale aarina awe wira yaarowele. Nto yaahirowa, khumuleela nasimola mmosa wira: “Mulipihe murima! Nvenyé! Onowihanani!” (Marko 10:49) Ohakalanle ene vanceene, mulopwana ole ahoona aahirula nlaya na vasulu, onarowa aari Yesu.

Vano Yesu aahimukoha wira: “Mumphavela wira kiwìriheni exeni?” Vano alopwana ale anli yahoona yaahimuxonttela wira: “Pwiya, maitho ahu etthukuwe!” (Matheyo 20:32, 33) Owoonelaka othunku, Yesu aahivara maitho aya ni aahimuleela mmosa wira: “Muroke! Wamini wanyu wowòpolani!” (Marko 10:52) Anasimola ale anli yahoona, yaahipacerya woona ananvuwiha Muluku. Yoonaka ele yiiraneyale, atthu ale yaahipacerya-tho onvuwiha Muluku. Okhala wira anasimola ale yaanoona, awo yaahipacerya omutthara Yesu.

Oviraka oYerikho, muttitthi muulupale wa atthu waahimurukurerya Yesu. Maana khula mutthu aaphavela onweha ole aapenunxe alopwana ale yahoona. Okhala wira atthu anceene yaahimurukurerya, nto akina khiyaawerya ophiya aari Yesu. Eyo ti etthu yiiraneyale ni Zakeyo, yoowo aari mukhulupale aalipa-ooliviha mpoosito muttetthe wa oYerikho. Okhala wira aari ookhuveya, owo khaawerya woona etthu yiiraneya. Tivonto, Zakeyo aahiwela mmwirini, niire so, mwiri wa sicômoro (aahiiso figueira-brava), yoowo aari ephiro Yesu aavira awe. Ori ene mmwirini, Zakeyo aaniwerya oweha khula etthu. Nto vaavo Yesu aattamela awe ni anwenhe awe Zakeyo ori ene mmwirini, aahimuleela wira: “Zakeyo nyu! Mwakuveke okhuruwa! Olelo va kihana omaka owannyu”. (Luka 19:5) Vano Zakeyo aahikhuruwa onatthimakela owannyawe wira omwaakhele saana.

Vaavo atthu ale yaaweha aya ele yiiraneya, yaahipacerya waapa. Awo yoona wira khivaaloka Yesu omaka etthoko ya mulopwana yaamoona aya okhala natampi. Zakeyo aahithaaciri mwaha wa wiiya musurukhu okathi aaliviha awe mpoosito.

 Vaavo Yesu aakenle awe etthoko ya Zakeyo, atthu ale yaanaapa ariki: “Owo oronwe omaka owanyawe natampi!” Masi Yesu aahoona wira Zakeyo anwerya ottharuwa itampi sawe. Tivonto, Yesu khaanyoonyiwe. Vano Zakeyo aaheemela onamuleela Yesu wira: “Mwixuttihi, kinokawanya muhakhu aka eriyari: mpantte mukina kavahe alipa-òhawa. Kamwiyenrye mutthu, kinomutthikiherya kivikanihaka vaxexé”.​—Luka 19:7, 8.

Tthiri, Zakeyo aahooniherya wira aahittharuwa ni murima wotheene! Woonasa wene, Zakeyo aahiwerya osuwela musurukhu aakhenle awe wa aYuda anceene, nto aahileiherya waattikiherya ovikanihaka ikwaha xexe. Eyo yaanivikana ele Nlamulo na Muluku naavekela aya. (Okhuma 22:1; Onamukuttho 6:2-5) Ohiya-vo, Zakeyo aahileiherya okuxa eriyari ya muhakhu awe wira aavahe amasikhini.

Yesu aahisiveliwa moota Zakeyo aattharunwe awe itampi sawe ni aahimuleela wira: “Wopowa wophiya olelo etthoko ela, okhala wira n’ula-tho mwaná Àbrahamu. Vekekhai, Mwana a mutthu orwenle waphavela atthu arimenle, wira awopole”.—Luka 19:9, 10.

Moohipisa, Yesu aahilavula mukhalelo wa ale ‘arimenle’ okathi aapanke awe nlikanyiho na mwaana aarimenle. (Luka 15:11-24) Vano aahilavula nlikanyiho niiraneyale na mutthu aarimenle, yoowo aaphwanyiwe. Ahooleli a itiini ni atthu aya, yaanimwaapa ni onvaanyiha Yesu mwaha woowaathokorerya saana atthu ntoko Zakeyo. Tthiri Yesu aahivikaniha owaavya anamwane a Abrahamu yaarimenle.