Yesu ubecidho i Yerusalem, re copere fodi asu gini pacu pa Zakayo ku julubne. Julub gibegeno nia ing’ei nindo ma nok, “Ker pa Mungu” bicaku bimo, ma Rwoth mi Kerne ke utie Yesu. (Luka 19:11) Re gibenyang’ rac, calu ma gilar ginyang’ ungo bende nia Yesu ucikere nitho. Pieno, Yesu umio lapor moko pi nikonyogi kara ging’ei nia fodi Ker pa Mungu ni bor.

Eyero kumae: “Jadit acel ucidho i ng’om ma bor, nigamu ker ire gire, kan edwogo.” (Luka 19:12) Wotho maeno copo ting’o nindo ma dupa. Andha, Yesu re ma tie “jadit” m’ucidho i “ng’om ma bor,” niwacu i polo, kuca re ma Won biwok mio ire Ker.

I lapor ma Yesu umio, ekoro nia ma fodi jadit eno ucoko ngo woth, elwong’o jumiru pare apar man emio mola ma tar ni ng’atuman, eyero kumae: “Wulok maeni cil m’abino.” (Luka 19:13) Mola ma tar, ka juwilo ko sente, ewodho sente ma lee dit, ma acel kende ci tie cul ma jumio ni jarafur pi dwi adek.

Julub gicopo nyang’ nia gin re ma gitie calu jumiru apar mi lapor maeno, pilembe iwang’e de, Yesu ular uporogi ku jurutic m’ubekayu mwoka. (Matayo 9:35-38) I andha, Yesu uwacu ngo nia gicidh gikai mwaka mi cam. Re, kayu mwoka m’eweco pire utie niyenyo julub mange ma gibibimo i Ker pa Mungu. Julub gicikiri nitio ku saa migi, kero migi man jamcing’gi, pi niyenyo dhanu dupa ma gibicamu Ker pa Mungu.

Yesu umedo lembang’o mange i lapor maeno? Ewacu nia jupagi jaditne “gidage, gioro kwenda i toke, m’uwacu kamae, wayenyo ngo nia ng’atu maeni bim wiwa.” (Luka 19:14) Julub ging’eyo nia Juyahudi giyio ngo Yesu, man Juyahudi moko gibemito ginege cen. Ing’ei ma Yesu utho man ecer eidho i polo, Juyahudi mapol ginyutho adegi migi kinde ma gicaku nyayu ragedo i kum julub. Eno unyutho kamaleng’ nia gimito ngo Yesu ubed Ubimo.​—Yohana 19:15, 16; Tic mi Jukwenda 4:13-18; 5:40.

Jumiru apar ke gitio nenedi ku mola migi nitundo ma “jadit” ucidh ‘ugamu ire ker’ man elok edwogo? Yesu ukoro kumae: “Man etimbre, kan edwogo kendo, ma nwang’u emaku ker, nia eng’olo ya julwong’ jumiru maeni i bang’e, m’emio igi sente, kara eng’ei piny ma giloko. Ma kwong’ane bino i bang’e, ewacu kumae, rwoth, nyol mola peri tundo nyol mola apar mange. Man ewacu ire kumae, itimo dre, in i jamiru ma ber: kum junwang’u ibedo mandha i lem ma nyathigi, ibed ku ng’ol wi adhura apar. E mir arionde bino, ewacu kumae, nyol mola peri, rwoth, utundo nyol mola abic mange. Ewacu ire bende kumae, in bende ibed wi adhura abic.”​—Luka 19:15-19.

Ka julub gitimo calu jumiru maeno ma cuu, niwacu ka gitio ku kero, saa, man jamcing’gi pi niketho dhanu mange dupa udok julub, m’umbe jiji cwinygi copo bedo tek nia lembe ma gitimo ufoyo i Yesu. Gicopo bende nibedo ku genogen nia gibinwag’u sukulia pi miiri migi. I andha, julub pa Yesu ceke gitie ngo ku kit kwo marom, man jamcing’ kunoke copo migi de romrom ungo. Re kinde ma Yesu bicamu “Ker,” ebipoi pigi man ebimio igi mugisa pi kero ma gitimo, ma giketho ko dhanu mange de udoko julub.​—Matayo 28:19, 20.

Pi nidolo dhu lapor, Yesu ulund ukoro lembe moko m’ukoc, ewacu kumae: “E mange bino, ewacu kumae, rwoth, nen, nyol mola peri eni, m’akanu aboyo ku kitambala: kum alwori, kum in i ng’atu ma tek: iting’o gin m’iketho piny in ungo, ikayu de gin m’icoyo in ungo. Ewacu ire kumae: abipoko lembe peri ku lembe m’uai i dhogi, in i jamiru ma rac. Ing’eyo nia an a  dhanu ma tek, m’ating’o gin m’aketho piny an ungo, akayu de gin m’acoyo an ungo; ka kumeno itero sente para i kakanpiny ungo nedi, man i bino para alwong’e ku kulokane de? E ewacu ni ju m’ucungo ceng’ni kumae, wugam nyol mola woko kud i bang’e, wumi ni won nyol mola apar.”​—Luka 19:20-24.

Calu ma jamiru maeno unyayu ngo sente pa rwoth pare, enwang’u ngo sukulia moko acel de. Jukwenda gibekuro kud ava mandha bimobim pa Yesu i Ker pa Mungu. Pieno wec ma Yesu uyero pi jamiru ma tokcen, copo ketho ginyang’ nia ka gimiiri ngo i tic pa Mungu, gibinwang’u ngo kaka i Ker pa Mungu.

Andhandha wec pa Yesu ucikere niketho julub pare mandha gimed amora nisagu. E edolo dhu wec kumae: “Awacu iwu kumae, nia ku ba dhanu ceke m’ubedo ko jubimio ire; ento ng’atu m’ubedo ko ngo re, e ma jubimaye cil ku gin m’ebedo ko.” Emedo nia judhoge ma gimito ngo ‘ebim wigi,’ jubinyothogi cen. E Yesu gimediri ku woth pi nicidho i Yerusalem.​—Luka 19:26-28.