Jesusajj Jerusalenar sarañwa amtaskäna, ukañkamajja discipulonakapampejj Zaqueon utapankasipkpachänwa. Discipulonakapajja, Jesusajj niyaw ‘Diosan Reinopan’ Reyjam apnaqañ qalltjjani sasaw amuyapjjpachäna (Lucas 19:11). Janiw kunapachas Jesusajj apnaqjjani uk sum amuyapkänti, janirakiw jiwañapatsa sumpach amuyapkänti. Ukatwa Jesusajj Reinon uttʼayasiñapatakejj walja tiempo faltaskatap amuyapjjañapatakejj mä uñachtʼäwit parläna.

Jupajj sänwa: “Reyin mä yoqapaw reyit uttʼayatäñatakejj yaqha jaya markar saräna, ukatjja kuttʼanjjarakïnwa” sasa (Lucas 19:12). Jaya markarojj walja tiempow sarañapäna. ‘Reyin yoqapajj’ Jesusänwa, jupaw “jaya markar”, mä arunjja alajjpachar sarañapäna, ukanwa Awkipajj Reyit uttʼayañapäna.

Uñachtʼäwirjamajja, ‘Reyin yoqapajj’ janïr sarkäna ukhajja, tunka esclavonakaparuw jawsthapiyäna, ukatjja sapa mayniruw mina qolIqenak akham sasin churawayäna: “Kuttʼaniñajkamajj negocionakwa uka qollqempejj lurapjjäta” sasa (Lucas 19:13). Mina sat qollqenakajja qollqe metalat luratänwa, wali valorani qollqerakïnwa. Mä jaqejj yapun kimsa phajjsi trabajkäna ukaruw mä mina pagapjjerïna.

Esclavonaka sasajj jupanakat parlaskatapjja discipulonakajj amuyasipjjpachänwa, Jesusajj ‘jumanakaw cosecha apthapirinakäpjjtajja’ sasaw jupanakar säna (Mateo 9:35-38). Ukampis janiw granonak apthapisin apanipjjam sañ munkänti, jan ukasti yaqha discipulonak jikjjatañaw cosechar uñtasitänjja, uka discipulonakaw Diosan Reinopan apnaqapjjarakispäna. Uk lurañatakejja, discipulonakajj tiempo apstʼasipjjäna, qollqe irtapjjäna, walpun chʼamachasipjjäna.

Jesusajj ¿kunanakampsa uka uñachtʼäwipan qhanañchäna? Jupajj sänwa: “Markachirinakapajj wal [Reyin yoqapar] uñisipjjäna, jupan qhepapwa mä qhawqha jaqenak khitapjjäna, akham sapjjañapataki: ‘Janiw nanakajj juman apnaqatäñ munapkti’ sasa” (Lucas 19:14). Judionakajj janiw Jesusar sum katoqapkänti, yaqhepajj jiwayañ munapjjäna, uk discipulonakajj sum yatipjjäna. Jesusajj jiwasin alajjpachar sarjjañapäna uka qhepatjja, judionakajj discipulonakarojj uñisiñatwa arknaqapjjañapäna. Ukham lurasajja, Jesusar Reyipjam jan munapjjatapwa uñachtʼayapjjäna (Juan 19:15, 16; Hechos 4:13-18; 5:40).

‘Reyin yoqap’ kuttʼaniñapkamajj ¿kunjamsa esclavonakajj mina qollqempejj negocio lurapjjañapäna? Jesusajj saskakïnwa: “Jupajj reyit uttʼayatäsin kuttʼanjjäna ukhajja, qollqenak jaytawayki uka esclavonakaruw jawsayäna, ukhamat qhawqsa negocionak lurasajj ganapjjatayna uk yatiñataki. Ukhamasti akham sasaw nayrïrejj jupan ukar purinïna: ‘Tata, churkista uka mina qollqempejj tunka mina qollqenakwa ganta’ sasa. Jupasti sarakïnwa: ‘Suma esclavo, ¡walik ukham lurtajja! Mä jukʼa katoqasas suma phoqerïtamwa uñachtʼaytajja, ukhamajj tunka markanakjjaruw jumajj apnaqäta’ sasa. Ukjjarusti akham sasaw payïrejj jutarakïna: ‘Tata, churkista uka mina qollqempejj phesqa mina qollqenakwa ganta’ sasa. Juparusti sarakïnwa: ‘Jumajj ukhamarakiw phesqa markanakjjar apnaqäta’ sasa” (Lucas 19:15-19).

Discipulonakatï wal chʼamachasiri uka esclavonakar uñtasitäpjjatap amuyasipjjchïna ukhajja, luratanakapajj kunjamsa Jesusar kusisiyani uk yatisajj kusisipjjpachänwa. Wal trabajipjjatapatjja, jan pächasisaw bendición katoqañ suyapjjpachäna. Cheqas janiw taqpach discipulonakajj igualäpkänti, sapa mayniw kunaymanin jakasipjjäna, yaqhepajj mä kunsa wali sum lurtʼañ yatipjjäna, yaqhepasti janiraki. Ukampis Jesusajj Reyit uttʼayatäjjasajja, discipulonakan luratanakaparojj wali askitwa uñjañapäna, kunjamsa discipulonak jikjjatañatakejj chʼamachasipjjäna uk uñjasas bendisiñaparakïnwa (Mateo 28:19, 20).

 Jesusajj jan chʼamachasir esclavot akham sarakïnwa: “Yaqha esclavow jutarakïna, akham sasaw jupar säna: ‘Tata, akäskiw churawaykista uka mina qollqemajja, mä pañor chintʼasaw imarapsma. Cheqansa jumar ajjsarañatwa ukham lurta, jumajj wali qhoru jaqëtawa. Kuntï jumajj jan uchkta ukwa apthaptajja, kuntï jan phawkta ukwa yawthapiraktajja’ sasa. Ukjjarusti jupajj sarakïnwa: ‘Jan wali esclavo, arsutamarjamaw nayajj juchañchsma. Nayan qhoru jaqëtajsa, kuntï nayajj jan uchkta uk apthapitajsa, kuntï jan phawkta uk yawthapitajsa, ¿sumti jumajj yatiskayäta? Ukhamajj ¿kunatsa qollqej mä bancor jan ucharapkista? Purinisajj interesampwa apsusiriskayätjja’ sasa”. Ukatjja uka jakʼan saytʼatäsipkäna ukanakarojj akham sasaw jupajj säna: “Uka mina qollqe jupat aparapjjam, kawkïritejj tunka mina qollqenïki ukar churapjjam” sasa (Lucas 19:20-24).

Reyin qollqep jan jiltayatapatjja, uka esclavojj mina qollqjja aparayasïnwa. Apostolonakajj Jesusajj Diosan Reinopan Reyjam apnaqaspa ukwa suyasipkäna. Ukhamajj kuntï Jesusajj qhepa esclavot siskäna uk istʼasajja, jan jayrasis trabajiñatakiw amtapjjpachäna, ukhamat Reinor mantañataki.

Jesusan arunakapajja, jan jitheqtir discipulonakaparojj jukʼamp lurañatakejj wal chʼamañchpachäna. Tukuyañatakejj Jesusajj sänwa: “Nayajj sapjjsmawa, khitintejj utjki ukarojj jukʼampiw churasini. Khitintejj jan utjki ukarojja, jupan utjki ukas aparatäniwa” sasa. “Nayar uñisipkitu, janirak jupanakjjar reyïñajsa munapki” ukanakajj jiwarayatäpjjaniwa sasaw sarakïna. Ukatjja, Jesusajj Jerusalenar saraskakïnwa (Lucas 19:26-28).