Bebek Yésu ni banigil bé ba ngi yii i ndap Sakiô het a ntelep mu liké jé i Yérusalem. Banigil ba Yésu ba nhoñol le ndék ngéda “Ane Djob” i ga tééba Yésu a bak Kiñe. (Lukas 19:11) Ba ntibil bé nok jam Yésu a niiga inyu Ane, nlélém, ba bi tibil bé nok inyuki Yésu a nlama wo. Jon a ngwélél hihéga inyu hôla bo i tehe le Ane i ga tééba bé ha ngéda i.

A nkal le: “Bañga mut yada i bé bebee ni ke liké i loñ i i yé haa le a yila kiñe ndi a témb.” (Lukas 19:12) Liké jé li bé lama yoñ ngandak ngéda. Ibabé pééna “bañga mut” a yé Yésu nu a nke liké i “loñ i i yé haa” hala wee i ngii, het Isañ a ga téé nye Kiñe.

Mu hihéga hi, ilole “bañga mut” i nke, i nsébél jôm li minkol nwé, i ti hiki wada wap mina i silba yada, i kal bo le: “Boña nyuñga ni nwo letee me lo.” (Lukas 19:13) Mina i silba i gwé mahee ngandak; mina yada i yé nsaa nsalwom a nkôs i mbus sôñ aa.

Banigil ba nla yimbe le bon Yésu a yé hégha ni jôm li minkol mu hihéga hié, inyule Yésu a ma hégha bo ni basalnwom. (Matéô 9:35-38) I pot maliga, Yésu a ta bé bat bo le ba bumbul blé. Ndi bôlô libumbul i yé le ba kot bet ba ga kôdôl Ane Djob. Banigil ba ngwélél pôla yosôna ba gwé inyu bulus bakôdôl Ane Djob.

Kii Yésu a nkônde yelel mu hihéga hini? A nkal le bôt ba loñ i bañga mut ba “oo nye, ba ep bakenwin mbus yé inyu kal le: ‘Di ngwés bé le i mut nunu a yila kiñe i ngii yés.’” (Lukas 19:14) Banigil ba nyi le Lôk Yuda i nhémle bé Yésu; bape ba nyéñ yak nol nye. I mbus nyemb Yésu ni maké mé i ngii, libim ikété Lôk Yuda li ga unda le li gwé bé ngôñ ni Yésu kiki Kiñe i ngéda ba ga kolba banigil bé.​—Yôhanes 19:15, 16; Minson mi baôma 4:13-18; 5:40.

Lelaa jôm li minkol mi ngwélél mina nwap mu kiki ba mbem le “bañga mut” i “yoñ ane” ndi i temb? Yésu a ntimbhe le: “Sôk i nsôk, i ngéda a bi témb, a ma mal yila kiñe, a sébél minkol a bi ti moni inyu yi umbe nseñ ba bi kôhna mu nyuñga yap. Ha nyen nu bisu a bi lo, a kal le: ‘A Nwet, mina woñ u nti jôm li mina. A kal nye le: ‘Bôlô ilam, a loñge nkol! Kiki u ñunda le u yé maliga ikété hisiina jam, w’a ane jôm li bitison.’ I mbus, nkol u nyônôs ima u lo, u kal le: ‘A Nwet, mina woñ u nti mina mintan.’ A kal ki wo le: ‘Yak we me ntéé we i ngii bitison bitan.’”​—Lukas 19:15-19.

Ibale banigil ba nhoñol le ba yé kiki minkol mi mi ngwélél ngui yap inyu yilha ngandak bôt banigil, ba nla ba nkwoog nkaa le Yésu a ga kônôl bo maséé. Ba nla ki ba nkwoog nkaa le a ga mbom biliya gwap. Ntiik, banigil bobasôna ba gwé bé nlélém ngap, ba mboma bé to minlélém mi mam. Ndi, Yésu nu a “yoñ ane” a ga yimbe bo, a sayap ki bo inyu biliya gwap i yilha bôt bape banigil.​—Matéô 28:19, 20.

Yimbe maselna ma yé ngéda Yésu a mélés hihéga hié, a nkal le: “Ndi umpe u lo, u kal le: ‘A Nwet, mina woñ unu, me bi sôô wo ikété libadô; U nyi to? Ngo me bi kon we woñi inyule u yé mut nledek ñem, u mbada yom u mbii bé, u bumblak i homa u nwes bé mbôô.’ A kal nye le: ‘A we béba nkol unu, me ngwélél bibañga gwoñ inyu kéés we. Baa  wee u yik le me yé mut nledek ñem nu a mbada yom a mbii bé, a bumblak i homa a nwes bé mbôô? Ndi inyuki ni u mbii bé moni nwem i ndap ba ntéédana moni? Inyu boñ le ngéda me nlo, me yoñ nwo ni yéñe.’ Ha nyen a bi kal i bôt ba bé ba téé ha le: ‘Yoña nye mina wé, ni ti wo nu a gwé jôm li mina.’”​—Lukas 19:20-24.

Inyule a nsal bé inyu boñ le nkus u kiñe u hol, nkol unu u nimis. Baôma ba nyamnda ni ngôñ i tehe Yésu a nyoñ Ane. I yom Yésu a nkal inyu nkol unu, i nhôla bo i nok le ibale bomede ba nsal bé ni ngui, ba ga bana bé yééne i Ane i ngii.

Bibuk bi Yésu, bi nti banigil bé makénd i kônde boñ biliya. A mélés ni bini bibuk le: “Me nkal bé le: Nu a gwé, b’a kônde ki nye; ndi nu a gwé bé, yak ndék a gwé, b’a yoñ nye yo.” A nkônde le baoo bé ba ba gwé bé ngôñ le a “ane bo,” ba ga tjiba. I mbus ha, Yésu a nyoñ njel inyu ke i Yérusalem.​—Lukas 19:26-28.