Tingki laho Jesus dohot angka siseanna tu Jerusalem, laho ma nasida tu jabu ni si Sakeus. Dirimpu angka sisean i do di tingki i Jesus mamarenta di “Harajaon ni Debata”. (Lukas 19:11) Ndang diantusi nasida na ingkon mate do Jesus. Alani i, dipaboa Jesus ma sada tudosan asa diboto nasida di ari na naeng ro do Harajaon i mamarenta.

Didok ibana ma, “Adong ma sahalak anak ni raja na borhat tu huta na dao laho manjalo huaso harajaon, dung pe i asa mulak ibana muse.” (Lukas 19:12) Tontu piga-piga leleng do ibana di pardalanan. Di tudosan i, Jesus do “anak ni raja” i. Tingki borhat ibana tu “huta na dao”, i ma tingki tu surgo Jesus manjalo huaso gabe raja.

Tingki so laho anak ni raja i, dijou ibana ma sampulu hatobanna jala dilehon ma sada mina tu ganup halak. Didok ma, “Pangke ma hepeng on martiga-tiga sahat tu na mulak ahu.” (Lukas 19:13) Sada mina, dos do tu upa ni parkarejo di ladang saleleng tolu bulan.

Boi do diantusi angka sisean i, nasida do sampulu hatoban na dipaboa Jesus di tudosan i. Ai hea do dipaboa Jesus di tudosan na asing, nasida do parkarejo na laho marpanen. (Mateus 9:35-38) Ndang eme na laho dipanen nasida, alai angka halak na laho mamarenta di Harajaon ni Debata do. Dilehon angka sisean do tingki, gogo dohot arta ni nasida laho mangulahon ulaon Harajaon.

Didok Jesus ma muse, “Alai, sogo do roha ni pangisi ni hutana i tu ibana jala disuru ma sapunguan suruan tu ibana mandok, ‘Ndang lomo rohanami ho gabe rajanami.’” (Lukas 19:14) Diboto angka sisean i do na sogo roha ni halak Jahudi tu Jesus, gariada naeng dipamate do ibana. Jala dung mate Jesus, dibahen nasida do na hansit tu angka siseanna. Tangkas ma ndang lomo roha ni nasida Jesus gabe Raja.​—Johannes 19:15, 16; Ulaon ni Apostel 4:13-18; 5:40.

Songon dia do hatoban i mamangke hepeng mina sahat tu na mulak anak ni Raja i? Dipatorang Jesus ma, “Dung dapotna huaso harajaon i mulak ma ibana. Dijou ibana ma angka hatoban na manjalo hepeng i laho mamboto sadia godang dapot ni nasida sian partiga-tigaan ni nasida i. Ro ma hatoban na parjolo, ninna ma, ‘Tuan, maruntung do ahu sampulu mina sian sada mina na nilehonmi.’ Didok tuanna i ma, ‘Denggan ma i, hatoban na burju do ho! Ala haposan do ho di na otik, marhuaso ma ho tu sampulu kota.’ Dung i ro ma hatoban na paduahon, ninna ma, ‘Tuan, maruntung do ahu lima mina sian hepeng sada mina na nilehonmi.’ Didok tuanna ma muse tu ibana, ‘Marhuaso ma ho tu lima kota.’”​—Lukas 19:15-19.

Molo diulahon angka sisean i ulaon ni nasida sian nasa gogona songon hatoban na ringgas i, las ma roha ni Jesus jala lehononna ma pasu-pasu tu nasida. Nang pe ndang sarupa gogo dohot situasi ni ganup angka siseanna i, lehonon ni Jesus do pasu-pasu tu nasida molo tongtong nasida ringgas mangurupi angka halak gabe siseanna. Lehonon ni Jesus ma i dung dijalo ibana “huaso harajaon”.​—Mateus 28:19, 20.

Alai adong do hatoban na so ringgas. Didok Jesus ma muse, “Alai ro ma hatoban na asing ninna ma, ‘Tuan, on do hepeng sada mina na nilehonmi. Hutabunihon do i di abit-abit. Ai mabiar do ahu tu ho ala halak na kejam do  ho. Dibuat ho do na so sinimpanmu. Jala dipanen ho do na so sinaburmu.’ Didok tuanna i ma, ‘Hatoban na jahat do ho, uhumonku ma ho marhite hatami. Diboto ho do ahu halak na kejam, hubuat do na so husimpan. Jala hupanen do na so husabur. Alani i, boasa ndang bahenonmu hepengki di bank? Asa tingki ro ahu boi ma jaloonku i rap dohot bungana.’ Dung i dohonon ni tuanna i ma tu angka halak na jongjong disi, ‘Buat ma hepeng na sada mina i sian ibana jala lehon ma tu hatoban nampuna hepeng sampulu mina i.’”​—Lukas 19:20-24.

Ndang mandapot upa hatoban i ala ndang olo karejo manambai hamoraon ni tuanna. Alani i diantusi angka sisean i ma, molo ndang ringgas nasida songon hatoban i, ndang boi nasida mamarenta rap dohot Jesus di Harajaon ni Debata. Hape on do na dipaima-ima nasida.

Dung dibege nasida na nidok ni Jesus i, gabe taronjar ma roha ni angka sisean asa lam ringgas. Didok Jesus ma muse, “Hudok ma tu hamu, tu ganup halak na adong di ibana, lehonon do gumodang. Alai sian halak na so adong di ibana, buaton ma sian ibana molo tung adong. Jala boan ma tuson angka musungki na so mangkalomohon ahu gabe raja ni nasida. Pamate ma nasida di jolongku.” Dung dipaboa Jesus sudena i, borhat ma ibana tu Jerusalem.​—Lukas 19:26-28.