Akusa bo Yésus a ke Jérusalem, a ngenan a yiane bo be Zachée a beyé’é bé. Beyé’é bé ba buni na “Éjôé Zambe” é mbeme téléban a Yésus ane Njôô. (Luc 19:11) Be nji kôme wô’ô mam ma lat a éjôé éte, fo’o v’ane ba kate wô’ô na Yésus a yiane wu. Nde a kane be nkana na a volô be na be yeme na, sa ke éyoñe ji nje Éjôé Zambe ja ye tebe.

A jô na: “Éwôlô môt éziñ é nga ke si é ne ôyap asu ya nyoñ éjôé a bulane fe.” (Luc 19:12, Mfefé Nkôñelan) Avale dulu ete ja nyoñ abui éyoñ. É ne fo’o été na Yésus a ne “éwôlô môt” a ke dulu “si é ne ôyap,” e yôb été, vôm Ésa wé a ye ve nye éjôé.

Nkana ôte, ôsusua na “éwôlô môt” ja ke, a loone bebo bisaé bé awôm a ve môt ase ya be be mine wua a jô be na: “Bo’one be na be bo abui akekui ma ye so.” (Luc 19:13, Mfefé Nkôñelan) Bemin be ne nkôman a argent a be bili beta tañ. Min ase a ve tañe moné ba ya’ane mbé afup asu bengon bela.

Beyé’é ba yiane yemelane na, be ne ane bebo bisaé awôme ya nkana wu, amu Yésus a ve’eya be éyoñe jia a bebo bisaé ba kôane bidi. (Matthieu 9:35-38) E n’été na, a nji jô be na be kôane bidi. Ve, nkôane bidi te wo viane tinane na be bo beyé’é befe ba ye bi éto Éjôé Zambe. Beyé’é ba belane biôm be bili na be ve bôte befe fane ya bi éto Éjôé.

Jé Yésus a beta liti a nkana wu? A jô na bôte ya si môt ate be mbe be “vini nye [éwôlô môt], a be nga lôme bôt e mvuse jé be jô’ô na: bi nji kômbô na nyôlé ate a jôô bia.” (Luc 19:14, Mfefé Nkôñelan) Beyé’é ba yeme na, Bejuif be nji nye’e Yésus, a ba bevo’o ba kômbô nye wôé wôé. Éyoñe Yésus a ye wu a na a ye ke yôb été, bebé Bejuif bese ba ye liti na be nji yi nye ane Njôô wop éyoñe ba ye tibili beyé’é bé.​—Jean 19:15, 16; Mam Minlôman 4:13-18; 5:40.

Bebo bisaé awôm ba belane bemine baba aya nté ba yange na “éwôlô môt” é “nyoñ éjôé” a bulan? Yésus a jô na: “Éyoñ a nga bulan, mvuse nyoñan éjôé, a nga bo na be loone nye e bôt a nga ve moné, asu ya na a yem aval avé môt ase a nga bo na moné a bo abui. Nyô ôsu a nga zu a jô na: A Masa, e mine wôé a biaéya bemin awôm. A nga jô nye na: Mvo’é, mbamba mbo ésaé; ô nga bo zôsôô a biôme tyôtyoé, nyoñe éjôé bitison awôm. Nyô baa a nga zu a jô na: A Masa, mine wôé a biaéya betan. A nga jô nye na: wo fe, jô’ô bitisone bitan.”​—Luc 19:15-19, Mfefé Nkôñelan.

Nge beyé’é ba belane biôme bi mo biap ane mbamba bebo bisaé na ba bo beyé’é befe, be ne tabe ndi na Yésus a ye wô’ô be mvaé. A be ne fe tabe ndi na, a ye ve be ma’an asu ésaé jap. É ne été na, beyé’é be Yésus bese be nji tebe été jia, be nji bi abime ngule da nge biôm avale da. Ve Yésus, nnye ate a te “nyoñ éjôé,” a ye yen a botane ngul ése ba ve na be bo bôte beyé’é.​—Matthieu 28:19, 20.

Yésus a ke nkana wé ôsu a liti’i mboon ôfe: “E mfe a nga zu a jô na: A Masa, e mine wôé me nga ba’ale mvulekan éfus éyé été e nye nyô, amu me nga ko woñ, amu ô ne e môt a ne teke bo fianga; wo nyoñ jôm ô nji ke bôôé, wo kôan e jôm ô nji ke bé. A nga jô nye na: Ma ye kobô wo ajô, me bela’ane bifia biôé, a mbia mbo ésaé; ô mbe ô yeme na me ne teke bo fianga; na ma nyoñ e jôm me nji ke bôôé, a kôan e jôme me nji ke bé; amu jé ñhe ô nji ke futi moné wom e bañ, e mebulane mam, me nga ye vaa nye a nseñge? Wôna a nga jô e ba be mbe valé na: Nyoñane nye min a ve nye e  môt a bili bemin awôm.”​—Luc 19:20-24, Mfefé Nkôñelan.

Mbôl a nji ful akume y’éjôé masa wé, mbo ésaé ate a mane jañele mam mese. Minlôman mi ne ôjeja’a ya yen ane Yésus a jôé Éjôé Zambe. E jam Yésus a jô asu mbo ésaé a su’ulan da yiane tindi be na be yeme na, nge be nji ke ôsu a kañete a ayo’o ése, ba ye ke kui na be bi éto éziñ Éjôé Zambe.

Mejô me Yésus ma yiane ve beyé’é bé ngule nyul a bo be na be ke ôsu a saé abui. Nde a su’ulane jô na: “Me ajô mia na, môt ase a bili, nnye be aye beta ve; ve nyô a ne momo, be aye va nye jôm a bili.” A kô’ôlane na, besiñe bé be nji kômbô na a “jôô be” ba ye wu. Ane Yésus a ke dulu dé ôsu mfa’a ya Jérusalem.​—Luc 19:26-28.