Ma Iesu pala kö me itretre dreng thei Zakaio. Hnei angatr hna pane cil e cili ngöne lo tronge i angatr a tro Ierusalema. Ka mejiun angatr laka, easenyi hë matre cile pi la “Baselaia i Akötresie,” nge Iesu la Joxu. (Luka 19:11) Ngo tha nyipi trotrohnine kö angatr, nge goi tha trotrohnine fe angatr laka, nyipiewekë tro Iesu a pane mec. Haawe, nyidrëti a hamë angatre jë la ketre ceitun, matre xatua angatr troa trotrohnine laka, tha koi enehila kö la Baselaia.

Öni nyidrë: “Hnene la ketre nekö i joxu hna tro gaa nanyi matre troa acili joxu angeic, me bëeke hmaca.” (Luka 19:12) Qea pi hë la hnei hna pane patr. Iesu la “nekö i joxu” ka tro “gaa nanyi,” e hnengödrai, matre tro la Keme i nyidrë a acili Joxu nyidrë.

Ngöne la ceitun, qëmekene tro la “neköi joxu” a tro, hnei angeic hna pane hëne la treene lao hlu, me isa hamë angatr la ca mina. Öni angeic: “Huliwane jë uti hë la tro ni a bëeke hmaca.” (Luka 19:13) Ka tru la manie cili, ke thupen ne la köni treu ne eëny.

Ma trotrohnine hi la itretre dreng ka hape, angatr la itre ka eëny, ke ase hë Iesu qeje angatre tun. (Mataio 9:35-38) Ngo tha Iesu kö a upi angatr troa menuë hlapa. Ngo kolo pe a upi angatr troa thele la itre xa atre dreng, matre ce musi me angatr ngöne la Baselaia i Akötresie. Tro la itretre dreng a huliwane la itre ewekë i angatr, matre nyixane la itre ka kepe edröne la Baselaia.

Nemene hmaca la hna amaman hnei Iesu ngöne la ceitune celë? Öni nyidrë ka hape, tro la itre atrene la nöj a “methinë angeic [lo nekö i joxu], matre angatr a upe jë la itre qeneqaja koi angeic, troa qaja ka hape: ‘Xele huni ma tro eö a joxu hun.’ ” (Luka 19:14) Atre hi itretre dreng ka hape, xele kö angetre Iudra ma kepe Iesu—nge goi hetre ka pi humuthi nyidrë. Nge thupene la Iesu a mec me elë hnengödrai, tro la angetre Iudra a xelene la musi nyidrë, me axösisine la itretre drei nyidrë. Tro ha mama cile ka hape, xele kö angatr ma tro Iesu a Joxu.—Ioane 19:15, 16; Itre Huliwa 4:13-18; 5:40.

Nge tune kaa lo treen lao hlu? Hnei angatr hna uëne la treene lao mina lo kola bëek hnene la “nekö i Joxu”? Öni Iesu: “Ame hë la angeic a bëeke hmaca thupene la hna acili joxu angeic, angeic a hëne jë lo itre hlue hna ahni mani kow, me hnyingë angatr la aqane huliwan angatr la mani. Ame hna traqa pi la hnaapan, me hape, ‘Joxu qa ngöne lo 1 mina i nyipë, hetrenyi hmaca kö ni la 10.’ Önine la Maseta koi angeic: ‘Ka lolo catr, eö hi la ketre hlue ka lolo! Ke ame ngöne la itre hnëqa ka co, hnei eö hna amamane la aqane mele nyipici i eö, nga tro hë eö a musi kowe la treene lao traon.’ Ame hna traqa pi la hnaaluen, me hape, ‘Joxu qa ngöne lo 1 mina i nyipë, hetrenyi hmaca kö ni la 5.’ Önine jë hi la Maseta koi angeic ka hape, ‘Eö fe, tro eö a hane musi kowe la faifi lao traon.’ ”—Luka 19:15-19.

Haawe, e tro la itretre dreng a tune la itre hlue ka lolo, me huliwane la itre ewekë i angatr troa thele la itre xa atre dreng, tro hë angatr a amadrinë Iesu. Nge tro kö nyidrëti a nyithupe i angatr. Ngo eje hi laka, isapengöi angatr kö, ke tha ceitu kö la aqane mele, me atrein i angatr. Ngo tro kö Iesu, lo hna “acili joxu,” a kapa me amanathithine la huliwa i angatr troa thele itre xa atre dreng.—Mataio 28:19, 20.

Ngo tha angatr asë kö la ka catre huliwa, öni nyidrë: “Ngo traqa pi hi la ketre, me hape, ‘Joxu hane hi lo la mina i nyipë, hnenge hna juetrën hnine la sine imaano. Ke öhne hi nyipë,  xounge nyipë, ke ka ngazo thiina nyipë, nge nyipëti a kapa la mani ngo tha hnei nyipëti kö hna amë ngöne baak. Nge ketre, nyipëti a menuëne la itre götrane tha hnei nyipëti kö hna tran.’ Önine jë hi lai Maseta ka hape, ‘Tro kö ni a ameköti eö thenge la trengewekë i eö, hlue ka ngazo! Atre hnyawa hi eö lo ka hape, ka ngazo catre la thiinang, nge eni a kapa la mani tha hnenge kö hna amë ngöne baak, me menuëne la itre götrane tha hnenge kö hna tran? Nga hnauëne hö laka, tha amë kö eö la manieng ngöne baak? Matre e traqa pi ni, tro ni a kapa atrune hmaca kö.’ Qa ngöne lai, önine jë hi la Maseta kowe la itre ka cil ezin ka hape, ‘Xome jë la mani qaathei angeic, nge hamëne pi kowe lo ka hetrenyi la treen.’ ”—Luka 19:20-24.

Pine laka, tha hnene kö la la hlue hna huliwa catr troa nyixane la itre ewekë i maseta, luzi pë hë angeic. Ketre tun, itre aposetolo a lapa treqene tro Iesu a mus ngöne la Baselaia i Akötresie. Matre angatr a trotrohnine laka, e ka genyi angatr tune lo hlue tixenuë, luzi hë la göhnë i angatr ngöne la Baselaia.

Iesu a ithuecatre jë koi itretre dreng troa huliwa catr, öni nyidrë: “Eni a qaja hnyawa koi nyipunie laka, ame la ka trene ewekë, tro hmaca kö a nyixane koi angeic, ngo ame la atre pë ewekë, tro fe a xome qaathei angeic la hnepe hnei angeic hna hetreny.” Nge ame pë hë koi itre ithupëjia, itre ka ‘xelene la musi nyidrë,’ tro ha apatrenyi angatr. Thupene lai, Iesu a xome hmaca jë la gojenyi ne tro Ierusalema.—Luka 19:26-28.