E ngae ngke tokini kawain Iesu Ierutarem, ma e a bae ni mena ngkai ma taan rimwina ni mwengan Takaio. A kakoauaa bwa e na waekoa ni kateaki “ana Tautaeka n Uea te Atua” ao e na Uea iai Iesu. (Ruka 19:11) A bon aki ota raoi n aei, n aron naba ae a aki ota n ae e riai ni mate Iesu. E taekina te kaikonaki bwa a aonga n ota bwa e rangi ni kiriaria n tei te Tautaeka n Uea.

E taku: “Iai te aomata temanna ae te bwaanuea ae e mwananga nakon te aba ae raroa, bwa e na karekea mwaakana n uea iai ao e na manga oki.” (Ruka 19:12) E kainnanoaki te tai ae maan n te aeka ni mwananga aei. E teretere bwa Iesu bon te “aomata temanna ae te bwaanuea” are e mwananga nakon “te aba ae raroa,” ae karawa, ike e na anganaki iai mwaakana n uea iroun Tamana.

E oti n te kaikonaki bwa imwain nakon te “aomata temanna ae te bwaanuea” e boni weteia tooro aika tengaun ao e bane n angania kaka teuana te mina ae te tirewa ao e tuangia ni kangai: “Kam na karikirake ni baikai ni karokoa rokou.” (Ruka 19:13) A kakawaki mwakorokoro ni mwane aika tirewa aikai. Ao teuana te mina e botau ma mwaitin ana bwakabwai te tia ununiki n te maan ae raka i aon tenua namwakaina.

A bae n ataia taan rimwin Iesu ae a kabotauaki ma tooro aika tengaun n te kaikonaki aei, bwa e a tia naba Iesu ni kabotauia ma taan tai. (Mataio 9:35-​38) E bon tuai n tuangia bwa a na uotii uita aika taiaki, ma te mwakuri n tai aei e bon irekereke ma taan rimwin Iesu ake tabeman riki ake a kona n reke aia tabo n ana Tautaeka n Uea te Atua. A kabonganai aia bwai taan rimwin Iesu ibukini karekeaia riki naake a na bwaibwai n te Tautaeka n Uea.

Tera riki ae e kaotia Iesu n te kaikonaki aei? E taekinia taan ababa bwa “a [ribaa te aomata are te bwaanuea] ao a kanakoia aia tia tei tabeman n rimwina, ma ni kangai, ‘Ti aki tangira te aomata aei bwa e na uea i aora.’” (Ruka 19:14) A ataia taan rimwina ae a ribaa Iesu I-Iutaia ao tabeman a boni kan tiringnga naba. Imwini maten Iesu ao nakona nako karawa, e a otara aia iango I-Iutaia ni kabane ibukin Iesu ngke a a bwainikirinia taan rimwina. A a boni katerea raoi taani kakaaitara aikai bwa a aki tangira Iesu bwa e na Uea.​—Ioane 19:15, 16; Mwakuri 4:13-​18; 5:40.

Ao tera aroia tooro ake tengaun ni kabonganai aia mina ni karokoa reken te ‘mwaaka n uea iroun teuare te bwaanuea’ ao okina? E taku Iesu: “Ngke e a oki imwini karekeani mwaakana n uea, ao e tua bwa a na weteaki nakoina tooro ake e a tia n angania te mwane, bwa e na nori mwini baike a karakai n aia karikirake. Ngaia are e keerake moa are te moan, ao e taku, ‘Te Uea, e raka am mina tebwina riki.’ E taku nakoina, ‘E tamaroa am mwakuri, te toro ngkoe ae ko raoiroi! Ibukina bwa ko a tia ni kaotia bwa ko kakaonimaki n te bae uarereke, ko na mataniwi i aoni kaawa aika tebwina.’ Ao e roko are te kauoman ao e kangai, ‘Te Uea, e raka am mina nimaua riki.’ Ao e taku naba nakon teuaei, ‘Ngkoe naba ko na mataniwi i aoni kaawa aika nimaua.’”​—Ruka 19:15-​19.

Ngkana a ataia taan rimwin Iesu bwa a kabotauaki ma tooro ake a kabonganai raoi aia bwai ibukini karekeaia riki taan rimwin Iesu, a a kona ni kakoauaa iai bwa e na boni kukurei Iesu. Ao a onimakinna bwa e na karekea kaniwangaia ibukin aia mwakuri korakora anne. A boni kakaokoro baika a aitara ma ngaai taan rimwin Iesu ni maiuia ao ai uana naba ma kakabwaiaaia ke aia konabwai. Ma ngkana e a anganaki Iesu “mwaakana n uea,” e na bon ataiia ao ni kakabwaiaa kakaonimakia n aia mwakuri ni karekeia taan rimwina.​—Mataio 28:19, 20.

Nora te kaokoro ngke e a motika ana kaikonaki Iesu ni kangai: “Ma e roko [te toro] are temanna ao e kangai, ‘Te Uea, aio am mina, ae I kawakinna ni karabaa n te moti ni kunnikai. Bwa noria, I maakuko ibukina bwa te aomata ngkoe ae ko matoatoa, ae ko buuta te mwane ae ko aki karinna, ao ko rikoi uaa n taabo ake ko aki ununiki iai.’ E taku nakoina, ‘N na motika taekam man am taeka, ngkoe ae te toro ae ko buakaka. Ko bon ataia kee ae te aomata ngai ae I matoatoa, ae I buuta te mwane ae I aki karinna, ao I rikoi uaa n taabo ake I aki ununiki iai? Ao e aera ngkanne bwa ko aki karina au mwane n te bangke? Bwa n rokou ao I a anaia ma rakana.’ Mangaia are e taku nakoia ake a teitei ikekei, ‘Anaa te mina mairouna ao angan teuare tebwina ana mina.’”​—Ruka 19:20-24.

Ibukina bwa e kabwaka te toro aei ni karikirakea kaubwain ana tautaeka n uea ana toka, ai bon akea ana bwai. A a tabe ngkai abotoro ni kantaningaa ana tai ni kairiri Iesu n ana Tautaeka n Uea te Atua. Ngaia are man ana taeka ibukin te kabanea n toro, a a bae n ataia ae ngkana a aki mwakuri korakora, a na bon aki reke naba nneia n te Tautaeka n Uea anne.

A riai ni kaungaaki nanoia taan rimwina aika kakaonimaki bwa a na kabatiai riki aia mwakuri man ana taeka Iesu. E motika ana taeka ni kangai: “I tuangingkami bwa ane iai irouna ao e na anganaki riki, ma ane akea irouna ao e na anaaki are irouna.” E taekinna naba bwa a na tiringaki naake a riribaia ake a aki tangiria bwa e “na uea i aoia.” Imwina ao e a reita mwanangana Iesu nako Ierutarem.​—Ruka 19:26-28.