Dile etlẹ yindọ Jelusalẹm wẹ Jesu jei, e sọgan gbẹ́ pò to owhé Zaṣe tọn gbè po devi etọn lẹ po. Yé deji dọ “Ahọluduta Jiwheyẹwhe tọn” na yin didoai to madẹnmẹ bọ Jesu na yin Ahọlu. (Luku 19:11) Yé ma mọnukunnujẹ whẹho ehe mẹ, kẹdẹdile yé ma mọnukunnujẹemẹ dọ Jesu dona kú do. Enẹwutu, e na apajlẹ de nado gọalọna yé nado mọdọ wiwá Ahọluduta lọ tọn na gbẹ́ dẹn.

E dọmọ: “Dawe de he tọ́n sọn whẹndo he diyin de mẹ jlo na tọ́nwhẹ̀n yì otò dindẹn de mẹ nado mọ aṣẹpipa ahọlu-yinyin tọn yí, bo nasọ lẹkọ.” (Luku 19:12) Gbejizọnlin mọnkọ na dẹn. E họnwun dọ Jesu wẹ yin “dawe . . . he tọ́n sọn whẹndo he diyin de mẹ” lọ bo tọ́nwhẹ̀n jei “otò dindẹn de mẹ,” yèdọ olọn mẹ fie Otọ́ etọn na na ẹn aṣẹpipa ahọlu-yinyin tọn te.

To apajlẹ lọ mẹ, whẹpo “dawe . . . he tọ́n sọn whẹndo he diyin de mẹ” lọ na tọ́nwhẹ̀n, e ylọ afanumẹ ao bo na dopodopo yetọn mina fataka tọn dopo bo dọna yé dọ: “Mì yí yé do wàjọ kaka yẹn nado wá.” (Luku 19:13) Mina fataka tọn lẹ họakuẹ taun. Mina dopo sọ̀ azọ́nkuẹ he glesi de nọ mọ to osun atọ̀n linlán mẹ.

E sọgan họnwun na devi lẹ dọ yewlẹ wẹ taidi afanumẹ ao apajlẹ lọ tọn lẹ, na Jesu ko yí yé jlẹdo azọ́nwatọ jibẹwawhé whenu tọn lẹ go dai. (Matiu 9:35-38) Na nugbo tọn, e ma yin jinukun jọnun lẹ wẹ e biọ dọ yé ni bẹ wá whé. Kakatimọ, devi devo he sọgan mọ otẹn de to Ahọluduta Jiwheyẹwhe tọn mẹ lẹ wẹ nọtena jinukun lọ lẹ. Devi lẹ yí nutindo yetọn lẹ zan nado wleawuna whédutọgbẹ́ Ahọluduta lọ tọn devo lẹ.

Nudevo tẹwẹ Jesu sọ dehia to apajlẹ ehe mẹ? E dọ dọ tòvi lẹ “gbẹwanna [dawe he tọ́n sọn whẹndo he diyin de mẹ lọ] bo do pipli afọzedaitọ lẹ tọn de hlan jẹgodona ẹn, nado dọ, ‘Mí ma jlo dọ dawe ehe ni lẹzun ahọlu do mí ji.’” (Luku 19:14) Devi lẹ yọnẹn dọ Ju lẹ ma kẹalọyi Jesu—yèdọ mẹdelẹ tlẹ jlo na hù i. To okú po olọn mẹ yìyì Jesu tọn po godo, Ju lẹ to paa mẹ do nukun he yé nọ yí do pọ́n ẹn hia gbọn homẹkẹndido devi etọn lẹ dali. Nukundiọsọmẹtọ ehelẹ dohia hezeheze dọ yé ma jlo dọ Jesu ni yin Ahọlu yetọn.—Johanu 19:15, 16; Owalọ lẹ 4:13-18; 5:40.

Na nuhe dù afanumẹ ao lọ lẹ, nawẹ yé zan mina yetọn lẹ kakajẹ whenue “dawe . . . he tọ́n sọn whẹndo he diyin de mẹ” lọ mọ “aṣẹpipa ahọlu-yinyin” tọn yí bo lẹkọwa gbọn? Jesu dọmọ: “To godo mẹ, to whenue e ko mọ aṣẹpipa ahọlu-yinyin tọn lọ yí bo lẹkọ, e ylọ afanumẹ he e ko na fataka-kuẹ lọ lẹ pli nado sọgan yọ́n ale he yé ko dù sọn ajọwiwa lọ mẹ. To whenẹnu, tintan lọ wá bo dọmọ, ‘Oklunọ, mina towe ko duale mina ao tọn.’ Enẹwutu, e dọna ẹn dọmọ, ‘A basi do ganji, hiẹ afanumẹ dagbe! Na hiẹ ko do dewe hia nado yin nugbonọ to onú pẹvi tlala de mẹ wutu, paṣẹ do tòdaho ao ji.’ Todin, awetọ lọ wá bo dọmọ, ‘Oklunọ, mina towe ji mina atọ́n.’ E dọna ehe lọsu dọ, ‘Hiẹ lọsu ni paṣẹ do tòdaho atọ́n ji.’”—Luku 19:15-19.

Eyin devi lẹ mọnukunnujẹemẹ dọ yé taidi afanumẹ he nọ zan nutindo yetọn lẹ to gigọ́ mẹ nado hẹn mẹsusu zun devi, be yé sọgan kudeji dọ homẹ Jesu tọn na hùn. Podọ yé sọgan deji dọ e na suahọ yé na vivẹnudido mọnkọtọn. Nugbo wẹ dọ e ma yin devi Jesu tọn lẹpo wẹ to ninọmẹ dopolọ mẹ, kavi tindo dotẹnmẹ hundote po nugopipe dopolọ lẹ po. Etomọṣo, Jesu he mọ “aṣẹpipa ahọlu-yinyin” tọn yí na mọ vivẹnudido ahundopo tọn yetọn to azọ́n mẹhẹnzun devi tọn lọ mẹ bo nasọ dona yé.—Matiu 28:19, 20.

Ṣigba, pọ́n lehe Jesu dotana apajlẹ etọn do dọmọ: “Ṣigba, [afanumẹ] devo wá bo dọmọ, ‘Oklunọ, mina towe die, he yẹn whlá do avọ̀ de mẹ. Pọ́n, yẹn dibusi we, na gbẹtọ fifiẹtọ de wẹ hiẹ; hiẹ nọ yí nuhe hiẹ ma zedai podọ hiẹ nọ gbẹ̀n nuhe hiẹ ma do.’ E dọna ẹn dọ, ‘Sọn ohó onù towe tọn  mẹ wẹ yẹn na dawhẹna we, hiẹ afanumẹ ylankan. A yọnẹn domọ, dọ yẹn yin gbẹtọ fifiẹtọ de, he nọ yí nuhe yẹn ma zedai bo nọ gbẹ̀n nuhe yẹn ma do, kavi e ma yin mọ wẹ? To whelọnu lo, naegbọn hiẹ ma ze fataka-kuẹ ṣie do akuẹsẹdotẹn? To whenẹnu, whenue yẹn wá, yẹn na ko yí i po akuẹvi po.’ Enẹwutu, e dọna mẹhe to ote to finẹ lẹ dọ, ‘Mì yí mina lọ sọn e si bo yí i na mẹhe tindo mina ao lọ.’”—Luku 19:20-24.

Na afanumẹ ehe ma dovivẹnu nado hẹn adọkun ahọluduta oklunọ etọn tọn jideji wutu, onú gú i. Apọsteli lẹ to nukundo gandudu Jesu tọn to Ahọluduta Jiwheyẹwhe tọn mẹ. Enẹwutu, yé na ko mọnukunnujẹemẹ to nuhe e dọ gando afanumẹ godo tọn ehe go mẹ dọ, eyin yé ma dovivẹnu, yé ma na mọtẹn to Ahọluduta enẹ mẹ.

Hogbe Jesu tọn lẹ dona whàn devi nugbonọ lẹ nado dovivẹnu dogọ. Jesu dotana dọmọ: “Yẹn dọna mì dọ: Mẹdepope he tindo, e na yin nina ẹn dogọ, ṣigba, ewọ he ma tindo, yèdọ nuhe e tlẹ tindo na yin yíyí sọn e si.” E yidogọ dọ kẹntọ etọn he ma jlo dọ e “ni lẹzun ahọlu do yé ji” lẹ na yin hùhù. Enẹgodo, Jesu zindonukọn to gbejizọnlin etọn mẹ bo hẹji jei Jelusalẹm.—Luku 19:26-28.