Ena be Iesu be Ierusalema dekenai ia ura lao, to ia bona ena hahediba taudia be Sakaio ena ruma dekenai idia do noho. Idia abia dae “Dirava ena Basileia” be kahirakahira do ia gini bona Iesu be do ia King. (Luka 19:11) Idia be Iesu ena hereva idia lalopararalaia lasi, do ia mase herevana idia lalopararalaia lasi hegeregerena. Unai dainai parabole ta ia gwauraia, unai amo do idia laloparara Basileia be gabeai do ia gini.

Ia gwau: “King ta ena natuna be king siahuna abia totona gabu daudau ta dekenai ia lao gwauraia, bena do ia giroa mai.” (Luka 19:12) Unai laolao be nega daudau lalonai do ia karaia. Iesu be unai ‘king ena natuna’ bona ia be “gabu daudau,” guba, dekenai do ia lao, unuseniai ena Tamana ese king siahuna do ia henia.

Unai parabole ai, unai ‘king ena natuna’ ia do lao lasi neganai, ia ese hesiai taudia 10 ia boiria bona idia ta ta dekenai siliva mina ta ia henia, bona ia hamaorodia: “Bisinesi do umui karaia ela bona lau giroa mai.” (Luka 19:13) Siliva mina be dava bada monina. Mina ta be hua toi mai kahana lalonai uma gabu ai ia gaukara tauna ese ia abia davana.

Reana hahediba taudia idia mamia idia be Iesu ese parabole ai ia gwauraia hesiai taudia 10 bamona, badina guna Iesu ese idia be aniani gogoa taudia ida ia hahegeregerea. (Mataio 9:35-38) Ia noidia lasi witi do idia gogoa. To ia ura idia ese hahediba taudia ma haida do idia gogoa, Dirava ena Basileia lalonai idia lohia totona. Hahediba taudia be edia nega, goada, bona kohu idia gaukaralaia Basileia lalonai do idia lohia taudia ma haida idia durua totona.

Unai parabole ai Iesu ese dahaka gaudia ma haida ia hahedinaraia? Ia gwau tano taudia be “[king ena natuna] idia inai henia bona ia murinai gwaukau taudia idia siaia, do idia gwau, ‘Ai ura lasi inai tauna be emai king ai do ia lao.’” (Luka 19:14) Hahediba taudia idia diba Iuda taudia be Iesu idia abia dae lasi, bona idia haida idia ura ia idia hamasea. Iesu ia mase, ia toreisi lou, bona guba dekenai ia daekau murinai, Iuda taudia ese ena hahediba taudia idia dagedage henia matamaia, unai amo idia hahedinaraia idia ura lasi Iesu be King ai ia lao.​—Ioane 19:15, 16; Kara 4:13-18; 5:40.

To unai hesiai taudia 10 ese edia mina be edena bamona idia gaukaralaia ela bona ‘king ena natuna’ ese “king siahuna” ia abia bona ia giroa? Iesu ia gwau: “King siahuna ia abia bona ia giroa lou neganai, moni ia henia hesiai taudia ia boiridia, unai amo do ia diba edia bisinesi karana amo moni hida idia abia. Vadaeni ginigunana ia mai bona ia gwau, ‘Lohiabada e, emu mina amo mina 10 lau abia.’ Ia dekenai ia gwau, ‘Namo herea, oi be hesiai tauna namona! Gau maragina dekenai oi kara maoromaoro dainai, siti 10 do oi lohiaia.’ Vadaeni iharuana ia mai, ia gwau, ‘Lohiabada e, emu mina amo mina 5 lau abia.’ Ia dekenai danu ia gwau, ‘Oi danu be siti 5 do oi lohiaia.’”​—Luka 19:15-19.

Bema hahediba taudia idia laloparara idia be unai hesiai taudia 9 bamona, edia nega, goada, bona kohu idia gaukaralaia hahediba taudia ma haida idia durua totona, do idia abia dae Iesu be idia dekenai ia moale. Bona edia gaukara namona dainai davana namona do ia henidia. Momokani, Iesu ena hahediba taudia ibounai edia noho dalana, kara, eiava diba be idauidau. To Iesu ese “king siahuna” ia abia, bona ia ese idia karaia hahediba taudia halaoa gaukarana do ia hanamoa.​—Mataio 28:19, 20.

To Iesu ena parabole dokonai ia gwauraia herevana mani oi laloa, ia gwau: “To [hesiai tauna] ma ta ia mai, bona ia gwau, ‘Lohiabada e, emu  mina be inai, dabua dekenai lau kumia bona lau hunia. Lau be oi dekenai lau gari, badina oi be kara auka tauna. Oi atoa lasi monina oi kokia, bona oi hadoa lasi gauna oi gogoa.’ Ia dekenai ia gwau, ‘Hesiai tauna dikana e, emu hereva amo oi lau hahemaoro henia. Oi diba lau be kara auka tauna, ani? Lau atoa lasi monina lau kokia bona lau hadoa lasi gauna lau gogoa. Vadaeni dahaka dainai egu moni be banika dekenai oi atoa lasi? Bena lau ginidae neganai, atoa kau monina ida do lau abia.’ Vadaeni ia badinai idia gini taudia dekenai ia gwau, ‘Ia amo unai mina umui kokia bona mina 10 ia abia tauna dekenai umui henia.’”​—Luka 19:20-24.

Unai hesiai tauna be ia gaukara goada lasi ena biaguna ena basileia ena kohu ia habadaia totona, unai dainai gau ibounai ia haboioa. Aposetolo taudia idia diba gabeai Iesu be Dirava ena Basileia lalonai do ia lohia. Unai dainai inai hesiai tauna dokona dekenai ia gwauraia herevana idia lalopararalaia, idia diba bema idia gaukara goada lasi, unai Basileia lalonai do idia lohia lasi.

Iesu ena hereva ese ena abidadama hesiai taudia ia hagoadaia edia gaukara idia habadaia totona. Ia gwau: “Umui lau hamaoroa, mai ena gau tauna dekenai ma gau momo do idia henia. To gau lasi tauna dekenai ia noho gauna danu be do idia kokia.” Ma ia gwau ia idia inai henia bona idia ura lasi ia be ‘edia king ai do ia lao’ taudia be do idia hamasedia. Bena Iesu be Ierusalema dekenai ia daekau.​—Luka 19:26-28.