Jesus ba pejalai iya ngagai Jerusalem, lalu diatu iya enggau bala murid iya engka agi ba rumah Sakius. Bala murid Jesus ngumbai “Perintah Petara” deka jampat datai lalu Jesus deka nyadi Raja enda lama da agi. (Luke 19:11) Sida enda entu meretika pekara tu, baka sida ke enda faham Jesus patut mati. Nya alai Jesus madahka siti sempama ngambika sida ulih faham Perintah Petara enda datai ba maya nya.

Ku Jesus bejaku: “Siku orang ke ari ruang bilik raja mupuk ngagai endur ti jauh, laban iya deka nyadi raja lalu udah nya, iya deka pulai baru.” (Luke 19:12) Pejalai nya begunaka mayuh awak. Jesus nya “orang ke ari ruang bilik raja” ke mupuk ngagai “endur ti jauh,” reti iya ngagai serega, alai Apai iya deka meri iya kuasa nyadi raja.

Dalam jaku sempama nya, sebedau “orang ke ari ruang bilik raja” mupuk, iya ngangauka sepuluh iku ulun iya lalu meri sesingkap duit mina ngagai tiap iku sida, lalu madah ngagai sida: “Alai kita bedagang ngena duit tu nyentukka aku pulai.” (Luke 19:13) Sesingkap duit pirak mina amat berega, laban rega nya sama enggau gaji tiga bulan ke diulih siku orang ke gawa ba ladang.

Bala murid Jesus engka nemu sida nya sepuluh iku ulun dalam jaku sempama nya laban Jesus kala nyemaka sida baka orang ke ngetau. (Matthew 9:35-38) Kebendar iya, Jesus ukai ngasuh sida amat-amat ngetau gandum. Tang, jaku sempama nya ngambarka sida patut nulung orang bukai tama Perintah Petara. Bala murid Jesus patut ngena utai dikemisi sida nulung mayuh agi orang ngambika sida nerima Perintah Petara.

Nama penerang bukai ke diberi Jesus dalam jaku sempama nya? Iya madahka orang ba nengeri nya “begedika [orang ke ari ruang bilik raja]. Sida nganjung bala pengari ngambika madah ngagai iya, ‘Kami enggai nuan nyadi raja kami.’” (Luke 19:14) Bala murid nemu mayuh orang Judah nulak Jesus, indah sekeda ari sida deka munuh iya. Pengudah Jesus mati lalu pulai ke serega, orang Judah nunjukka sida begedika Jesus lalu merinsaka bala murid iya. Utai ti dikereja sida endang terang nunjukka sida enggai Jesus nyadi Raja sida.—John 19:15, 16; Surat Kereja Rasul 4:13-18; 5:40.

Baka ni sepuluh iku ulun ngena duit mina sida nyentukka “orang ke ari ruang bilik raja” nerima kuasa “nyadi raja” lalu pulai baru? Jesus madahka: “Pengudah nyadi raja, iya pan pulai. Iya ngangauka bala ulun ke udah diberi iya duit pirak nya, laban iya deka nemu untung ke diulih sida ari bedagang. Ulun ti keterubah datai lalu madahka, ‘Tuan, aku bulih untung 10 mina ari satu mina ke diberi nuan.’ Ku iya madah ngagai ulun iya, ‘Manah nya. Nuan ulun ti manah! Laban nuan tetap ati ba pekara ti mit amat, aku deka ngasuh nuan merintah 10 iti nengeri.’ Ulun ti kedua datai lalu madahka, ‘Tuan, aku bulih untung lima mina ari satu mina ke diberi nuan.’ Iya mega madah ngagai ulun nya, ‘Aku deka ngasuh nuan merintah lima iti nengeri.’”—Luke 19:15-19.

Bala murid nemu enti sida nunda ulun nya lalu bebendar ngena utai ke dikemisi sida ngaga mayuh agi orang nyadi murid Jesus, tu tentu ngasuh Jesus gaga ati. Sida ulih yakin Jesus tentu merekatka sida laban sida bagas gawa. Iya ke amat, gaya pengidup, penau, sereta utai ke ulih digaga bala murid Jesus enda sama enggau pangan diri. Tang, Jesus ke deka “nyadi raja,” nemu situasi siku-siku sida lalu iya deka merekatka usaha sida ti bebendar ngaga orang nyadi murid iya.—Matthew 28:19, 20.

Udah nya, Jesus ngujungka sempama lalu madahka: “Tang udah nya, siku da agi ulun datai  lalu madahka, ‘Tuan, tu duit mina nuan. Aku udah ngelalaika iya dalam kain. Nuan nemu, aku takutka nuan laban nuan orang ke amat terit. Nuan ngambi duit ari bank taja pan nuan enda nyimpan iya, lalu nuan ngetau taja pan nuan enda nanam.’ Iya bejaku ngagai ulun nya, ‘Nuan tu ulun ke jai. Aku deka ngakim nuan nitihka utai ke disebut nuan. Nuan nemu aku tu orang ke amat terit. Aku ngambi duit ari bank taja pan aku enda nyimpan iya, lalu aku ngetau taja pan aku enda nanam. Nya alai, nama kebuah nuan enda nyimpan duit pirak aku dalam bank, ngambika lebuh aku datai, aku ulih nerima duit nya enggau bungai iya?’ Udah nya, iya bejaku ngagai sida ke bediri ba dia, ‘Ambi duit mina nya ari iya, lalu beri ngagai ulun ke bisi 10 mina.’”—Luke 19:20-24.

Ketegal ulun nya enggai gawa nambahka pengaya ke tuan iya, nya alai iya rugi. Bala rasul Jesus enda sabar nganti iya nyadi raja ba Perintah Petara. Nyadi ari utai ke dipadahka Jesus pasal ulun nya, sida nemu enti sida enda bagas gawa, sida enda ulih tama ngagai Perintah Petara.

Jaku ke disebut Jesus tentu meransang bala murid ti setia bebendar agi gawa. Jesus lalu madahka: “Aku madah ngagai kita: Genap iku orang ke bisi utai, deka diberi mayuh agi. Tang orang ke nadai utai, indah utai ke dikemisi iya deh, deka diambi ari iya.” Lalu Jesus madah, bala munsuh iya ke enggai nerima iya “nyadi raja sida,” deka dibunuh. Udah nya, Jesus neruska pejalai iya ngagai Jerusalem.—Luke 19:26-28.