Nangwa kya kuba Yesu wayilenga ku Yelusalema, bino kyamweka waikeleko ku nzubo ya kwa Zakyasa pamo na baana ba bwanga. Baketekejile’mba Yesu katatakatu ekale Mfumu wa “Bufumu bwa Lesa.” (Luka 19:11) Byonka byo babujile kumvwisha kishinka kya kuba’mba Yesu ukafwa, baana ba bwanga kechi bakwatankenye kino kishinka ne. Onkao mambo, wibelele kishimpi kibakwashishe kuyuka’mba Bufumu bwakijinga kwalepa.

Wibambijile’mba: “Muntu umo wa mu kisemi kya bufumu, wayile ku kyalo kingi kwalepa amba akatambule bufumu ne kubwela.” (Luka 19:12) Uno muntu kechi wabwelele bukiji ne. Yesu ye muntu “wa mu kisemi kya bufumu” wayile ku “kyalo kingi kwalepa,” ko kuba’mba mwiulu mo bakamupele bufumu kwi Bashanji.

Mu kino kishimpi, awa muntu “wa mu kisemi kya bufumu” saka akyangye kuya, waichile bakalume jikumi ne kwibapa mali a mpondo ne kwibambila’mba: “Ubainga busulu poso nkabwele.” (Luka 19:13) Mali a mpondo a siliva ke mali anema bingi. Mali a mpondo o o bafwetanga muntu inge waingila mu bujimi kukila pa bañondo basatu.

Baana ba bwanga kampe balangulukilenga’mba abo bajinga nobe bakalume jikumi ba mu kino kishimpi, mambo Yesu mu kishimpi kikwabo wibesakenye ku ba mingilo. (Mateo 9:35-38) Bino, Yesu kechi waambilenga mwingilo wa kunowa kajo konkake ne. Waambilenga pa mwingilo wa kufunjisha bantu kwikala baana ba bwanga bakekala mu Bufumu bwa Lesa. Baana ba bwanga baingijishe bintu byo bajinga nabyo pa kukwasha bantu kwikala banswanyi ba Bufumu.

Ñanyi bintu bikwabo Yesu byo asolwele mu kishimpi kyanji? Waambile’mba bano bangikazhi “bamushikilwe [wa mu kisemi kya bufumu] ne kutumako jibumba ja bantomesha kwi aye na kwamba’mba, ‘Kechi tubena kukeba uno muntu kwikala mfumu wetu ne.’” (Luka 19:14) Baana ba bwanga bayukile kuba’mba Bayudea kechi baitabijile Yesu ne, mambo bamo bakebelenga ne ku mwipaya. Panyuma ya lufu lwa kwa Yesu ne kuya mwiulu, Bayudea bavula bamwesheshe byo bamushikilwe kupichila mu kumanyika baana banji ba bwanga. Bano balwanyi bamwesheshe patoka kuba’mba kechi bamukebelenga’mba ekala Mfumu ne.—Yoano 19:15, 16; Byubilo 4:13-18; 5:40

Aba bakalume jikumi baingijishe byepi mali a mpondo o batambwile kufika ne kimye kyaishile muntu “wa mu kisemi kya bufumu” saka “aikala kala mfumu” ne kimye kyo abwelele? Yesu waambile’mba: “Byo abwelele saka aikala kala mfumu, waichile bakalume bo apele mali, kuba’mba ayuke byo bamwenejilemo mu busulu bwabo. Mutanshi waishile ne kwamba’mba, ‘Nkambo mu lupondo wenu umo namwenejilemo mpondo jikumi.’ Aye wamwambijile’mba, ‘Wauba bulongo, obewa kalume wawama! Na mambo a kuba waikala wa kishinka mu bintu bichechetu, usakwikala na luusa pa mizhi jikumi.’ Wa bubiji naye waishile, ne kwamba’mba, ‘Nkambo mu lupondo wenu umo namwenejilemo mpondo itanu.’ Ne uno naye wamwambijile’mba, ‘Ne obewa usakwikala na luusa pa mizhi itanu.’”—Luka 19:15-19.

Inge baana ba bwanga bayuka’mba baji nobe bakalume bengijisha bulongo bipe byabo mu mwingilo wa kufunjisha bantu kwikala baana ba bwanga, bafwainwa kuketekela’mba Yesu ukomvwa bingi bulongo. Kabiji bakonsha kuketekela’mba bakebapa mfweto pa mingilo yabo. Pano bino, baana ba bwanga ba kwa Yesu bonse kechi bengila mingilo imo nangwa kwikala bwikalo bumo ne. Bino, Yesu ‘waikele kala mfumu’ ukayuka ne kupesha byo babena kwibikako mu mwingilo wa kufunjisha bantu.—Mateo 28:19, 20.

Monai lupusano lwajingapo kimye Yesu kyo apwishishe kishimpi. Waambile’mba: “Bino kwaishile [kalume] mukwabo ne kwamba’mba, ‘Nkambo, lupondo wenu awe ye nafile mu kisapi. Nemuchiine bingi, mambo mwashinta; kabiji mushikula kyo mwabujile kutula, ne kunowa kyo mwabujile kubyala.’ Aye wamwambijile’mba, ‘Nakuzhachisha monka mwayila byambo byobe, obewa kalume mubi. Nanchi kechi wayukile’mba nashinta, kabiji nshikula kyo nabujile kutula ne kunowa  kyo nabujile kubyala nenyi? Pano mambo ka o wabujile kutwala mali ami ku kipao? Pa kwiya umvwe natambwilapo nsubu.’ Na mambo a kino, waambijile boba baimene amba, ‘Mwangatai lupondo ne kupa yewa uji na mpondo jikumi.’”—Luka 19:20-24.

Na mambo a kukankalwa kwingila ne kuvuzha bunonshi bwa mu bufumu bwa nkambo yanji, uno kalume bamwangachile lupondo ye bamupele. Batumwa baketekejile’mba Yesu ukalamanga mu Bufumu bwa Lesa. Onkao mambo, byambo byaambile Yesu pa kalume wapeleleko kyamweka bibakwashishe kuyuka’mba bamo kechi bakengilanga na mukoyo ne, kabiji kechi bakekala mu Bufumu ne.

Byambo bya kwa Yesu byafwainwa kutundaika baana ba bwanga ba kishinka kwingila na ngovu. Wapezhezheko’mba: “Nemwambila namba, yense uji na bintu, bakamubikilapo ne bikwabo, pakuba awa wabulabyo, bakamwangata ne kyo aji nakyo.” Kabiji wanungilepo’mba balwanyi banji babula kukeba kuba’mba ekale “mfumu wabo” bakebepaya. Kepo Yesu atwajijile na lwendo lwanji kuya ku Yelusalema.—Luka 19:26-28.