Nansha Yesu byaenda ku Yelusalema, ino ukidi bidi kwa Zakiasa pamo na bandi bana pa bwanga. Betabije amba “Bulopwe bwa Leza” ke busa kushimikwa, kadi Yesu ye Mulopwe wabo. (Luka 19:11) Abakomenwa kwivwanija uno mwanda na mobakomeninwe kwivwana wa amba Yesu ufwaninwe kufwa. O mwanda waleta kyelekejo kibakwasha bamone amba Bulopwe bukīya kumeso.

Wanena’mba: “Muntu umo wa ku kisaka kilēme waendele lwendo ku ntanda ya kulampe kukakimba bamupe lupusa lwa kubikala ebiya kajoka.” (Luka 19:12) Luno lwendo i lwa mafuku. Na bubine Yesu ye “muntu umo wa ku kisaka kilēme” wenda ku “ntanda ya kulampe,” ke mūlu kadi, mwine mukamupa Shandi lupusa lwa kubikala.

Mu kino kyelekejo, kumeso kwa “muntu umo wa ku kisaka kilēme” kwenda, waite bapika dikumi ne kupa muntu ne muntu ndalama ya mina, kaebanena’mba: “Sungululai’yo enka ne ponkāya.” (Luka 19:13) Ndalama mine ya mina i kityele kya lupeto lwa bulēme. Mina imo i mfutwa ifutwa kidimye wingila mu myeji isatu.

Padi bana ba bwanga abemone bu bapika dikumi ba mu kyelekejo, mwanda Yesu webadingakenye kala bu bengidi ba mu mwangulo. (Mateo 9:35-38) Shako, kebanenenepo bamuletele byangulwa bya miseke. Ino i mwangulo wa bana ba bwanga bakwabo ba kutwela mu Bulopwe bwa Leza. Bana ba bwanga bafwaninwe kwingidija byonso byobadi nabyo mwanda wa kulupula bampyana bavule ba Bulopwe.

Le i bika bikwabo byanena Yesu mu kino kyelekejo? Wanena’mba bana ba kibundi “bamushikilwe, [muntu umo wa ku kisaka kilēme] batuma kitango kya mikendi kukamulonda ne kunena’mba, ‘Ketusakilepo uno muntu etubikale bu mulopwe.’” (Luka 19:14) Bana ba bwanga bayukile amba Bayuda kebetabijepo Yesu​—bakwabo bakimba’nka ne kumwipaya. Yesu pa kupwa kufwa ne kwenda mūlu, Bayuda mu kikonge balombwele mobamumwena na kupangapanga bandi bana ba bwanga. Bano balwana i balombole patōka’mba kebasakilepo Yesu bu Mulopwe.​—Yoano 19:15, 16; Bilongwa 4:13-18; 5:40.

Le bakengidija namani mina yabo bwa bano bapika dikumi kufika ne bitambula “muntu umo wa ku kisaka kilēme,” “lupusa lwa kubikala” ne kujoka? Yesu unena’mba: “Mwenda mafuku pa kupwa kupebwa lupusa lwa kubikala, wajoka ebiya waityija bapika baapele lupeto, mwa kuyukila byobasokwele mu busunga. Ebiya mubajinji waiya kanena’mba, ‘A Mfumwami, mina yobe ibasokola mina dikumi.’ Nandi wamunena’mba, ‘Ubalonga biyampe, umpika muyampe! Mwanda wadi mukōkele mu mwanda mutyetye bininge, yata lupusa lwa pa bibundi dikumi.’ Kupwa wa bubidi nandi waiya’mba, ‘A Mfumwami, mina yobe ibalupula mina itano.’ Wanena ne uno nandi amba, ‘Abe nobe tala bibundi bitano.’”​—Luka 19:15-19.

Shi bana ba bwanga nabo bengidije byonso byobadi nabyo, pamo bwa bano bapika, mwanda wa kulonga bana ba bwanga bavule, nabya i biyampe bakulupile amba Yesu ukebasangela. Kadi bayuke amba bakapalwa mpalo pa kininga kyabo. Shako, bana ba bwanga bonso kebadipo na būmi bwa muswelo umo nansha mikenga ne bwino bwa muswelo umo. Ino Yesu watambula “lupusa lwa kubikala,” uketabija ne kwesela boba beelela’ko na kikōkeji kulonga bana ba bwanga.​—Mateo 28:19, 20.

Tala kwishila kumo pavuya Yesu kyelekejo kyandi amba: “Ino [umpika] ungi nandi waiya’mba, ‘A Mfumwami, mina yobe yoi yonafile mu kisandi. Umwene, nakutyinine mwanda abe wi muntu mudimbakane; utekunanga kyokutūdilepo, kadi wangulanga kyokukushilepo.’ Nandi wamunena’mba,  ‘Nakutyibila mambo na binenwa byobe, abe umpika mubi. Wadi uyukile amba ne muntu mudimbakane, ntekunanga kyonkitūdilepo kadi ñangulanga kyonkikushilepo, mwene i amo? Penepo i kika kyokwakatūdilepo lupeto lwami ku banki? Longa ami pa kwiya, nadi wa kusela’lo ne kamweno ponka.’ Ebiya wanena boba badi bemene’po amba, ‘Muyatei mina’yo, pai’yo yewa udi na mina dikumi.’”​—Luka 19:20-24.

Uno umpika wajimija byonso, mwanda kavudijepo bupeta bwa bulopwe bwa mfumwandi. Batumibwa abamone kala Yesu uludika mu Bulopwe bwa Leza. O mwanda bino byaanena pa umpika wa mfulo, bibebalombola’mba shi kebengilepo na kininga, kebakatwelapo mu Bulopwe.

Binenwa bya Yesu bibakankamika bana ba bwanga ba kikōkeji babweje’ko bukomo. Wafule na kunena’mba: “Nemunena’mba, ense udi na kintu, ukapebwa ne bikwabo, ino yewa kadipo na kintu, ne kyokya kyadi nakyo kine kikamuyatwa.” Wabweja’ko amba balwana nandi, boba “bampelele ami kwibabikala bu mulopwe,” bakepaibwa. Yesu ne kufika wafika ku Yelusalema.​—Luka 19:26-28.