Numba tuhu Yesu apwile nakuya kuYelusalema, oloze apwile lika nakutwama muzuvo yaZakeu hamwe natumbaji twenyi. Tumbaji vafwelelele ngwavo “Wangana waKalunga” kalinwomu vauzamise, kaha Yesu mwapwa Mwangana. (Luka 19:11) Chihande kanechi kachavalumbunukilileko ngana muze chahonene kuvalumbunukila chihande chakuvuluka kufwa chaYesu. Ngocho Yesu avalwezele chifwanyisa chakuvakafwa vatachikize ngwavo Wangana wapwile kulutwe.

Kaha ambile ngwenyi: “Mutu umwe wamulemu ayile kulifuchi lyapwile kwakusuku mangana akatambule ngolo jawangana nakukinduluka cheka.” (Luka 19:12) Ungeji kana wambachile lwola lwalusuku. Chikupu vene, Yesu ikiye apwile ‘mutu wamulemu’ uze ayile “kulifuchi lyapwile kwakusuku” mwilu, muze Ise mwakamuhana ngolo jawangana.

Muchifwanyisa kanechi, shimbu kanda ‘mutu wamulemu’ ayenga, asanyikile vandungo jenyi likumi nakuvahana mutu himutu mina yimwe yapalata, kaha avalwezele ngwenyi: “Sekasanenunga palanga nomu nangukeza.” (Luka 19:13) Jimina japalata japwile jimbongo jachichele jajilemu. Mina yimwe yapwile fweto yize atambwilenga mutu uze azachilenga muwande hatukweji vatatu nakuzombokaho.

Tumbaji atela vashinganyekele ngwavo vapwile nge vaze vandungo likumi vamuchifwanyisa, mwomwo Yesu avafwanyishile kuli vaka-kwaha. (Mateu 9:35-38) Chipwe ngocho, kavalwezele mangana vanehe jimbuto vahilengako. Oloze mulimo wakwaha wasakiwile natumbaji vakwavo vaze vapwile nachihela chavo muWangana waKalunga. Tumbaji vazachishile vyuma vize vapwile navyo mangana vanehe vaswana vaWangana vavavulu.

Vyuma muka vyeka vize Yesu alumbunwine muchifwanyisa kana? Ambile ngwenyi vatu “vamuhungile [mutu wamulemu], kaha vatumine lizavu lyavaluwa vamukave vakambe ngwavo, ‘Etu katwasakile ou mutu apwenga mwangana wetuko.’” (Luka 19:14) Tumbaji vatachikijile ngwavo vaYuleya kavetavilile Yesuko, kaha vamwe vasakile nakumujiha. Omu alingile Yesu hanasanguka lyehi nakuya mwilu, vaYuleya vavavulu vasolwele muchima waupi vapwile nawo hali Yesu hakuyanjisa tumbaji twenyi. Ava vaka-kole vasolwele hatoma nge kavazangile Yesu apwenga Mwanganako.—Yowano 19:15, 16; Vilinga 4:13-18; 5:40.

Uno vaze vandungo likumi vazachishile ngachilihi jize jimina palanga nakukwiza ‘chamutu wamulemu’ uze ayile nakutambula “ngolo jawangana”? Yesu ambile ngwenyi: “Jino omu akindulukile, oku hanatambula lyehi ngolo jawangana, ambile ngwenyi vamusanyikile vandungo vaze ahanyine jimbongo mangana atachikize jingahi vanawanyinaho hakusekasana chavo. Jino watete ejile, kaha ambile ngwenyi, ‘Ove mwata, mina yove yinaseme jimina jikwavo 10.’ Ngocho ambile kuli ikiye ngwenyi, ‘Wazachila, ove ndungo wamwaza! Hakuwana nge unalisolola kupwa uwakushishika hachuma chachindende chikuma, pwako nawata hajinganda 10.’ Jino wamuchivali nawa ejile nakwamba ngwenyi, ‘Ove mwata, mina yove yinaseme jimina jikwavo jitanu.’ Ikiye ambile kuli ou nawa ngwenyi, ‘Nayove nawa pwako nawata hajinganda jitanu.’”—Luka 19:15-19.

Nge tumbaji vanyingililile nakutachikiza ngwavo vanapu vandungo vaze vazachishile vyuma vyavo mangana vanehe tumbaji vavavulu, kaha vatelele kufwelela ngwavo Yesu mwavevwila kuwaha. Vatelelele kufwelela nawa ngwavo mwakavafweta hakukilikita chavo. Chipwe ngocho, tumbaji twaYesu vakwechi chiyoyelo chakulisezaseza nauhashi navyuma vyeka nawa. Oloze Yesu hakupwa mutu uze atambula “ngolo jawangana” mwakatachikiza hakumina ngolo jamutu nakuvafweta hakushishika chavo mumulimo wakunangula vatu vapwenga tumbaji.—Mateu 28:19, 20.

Oloze jino talenu chihandwa chili mumazu aYesu havyuma akukulwile muchifwanyisa chize ahanjikile, ambile ngwenyi: “[Ndungo] mukwavo nawa ejile nakwamba ngwenyi, ‘Ove mwata, waha mina yove, ngwayikashililile halihina nakuyisweka. Ami ngunapunga nakukwivwa woma, mwomwo umutu wamukalu, weji kutambulanga ovyo wazenekele kutulika, kaha weji kwahanga ovyo wazenekele kukuva.’ Kaha ambile kuli ikiye ngwenyi, ‘Ove ndungo wakuhuka, hamazu amukanwa kove hakiko vene nangukusopesela.  Kumana watachikijile ngwove ngwapwa ngumutu wamukalu, ngwove ngweji kutambulanga ovyo ngwazenekele kutulika, nakwahanga ovyo ngwazenekele kukuva? Nyi ika wahonenene kutwala lumbongo lwami kunyambaulu? Omu nguneza kachi ngunalutambula nasaku yalwo hamwe.’ Ngocho ambile jino kuli vaze vemanyine kuze ngwenyi, ‘Mutambulenu oyo mina, yihanenu kuli ou ali najimina 10.’”—Luka 19:20-24.

Uze ndungo avindamine mwomwo ahonene kuzata nangolo mangana avulise luheto lwawangana wakaka yenyi. Vaposetolo vapwile nakutalilila kuyula chaYesu muWangana waKalunga. Ngocho hakutala hamazu ahanjikile Yesu kutalisa kuli uze ndungo wakukuminyina, atela tumbaji vanyingililile ngwavo nge kaveshi kuzata nangolo mumulimo wakunangula vatu vapwenga tumbaji, kaha kaveshi kukapwa nachihela muWangana waKalungako.

Mazu ahanjikile Yesu atelele kukafwa tumbaji vakushishika vazate nangolo mumulimo kanou. Yesu akukulwile ngwenyi: “Nangwamba kuli enu ngwami, weshowo ali navyo, navamuwezelako vikwavo, oloze uze keshi navyoko, nachize ali nacho navamutambulacho.” Atwalileho ngwenyi vaka-kole jenyi vaze kavamuzangile ‘apwenga mwangana wavoko,’ navakavanongesa. Yesu jino atwalileho ungeji wenyi wakuya kuYelusalema.—Luka 19:26-28.