Hela chakwila Yesu nakuya kuYerusalema, watela wuchidi mwitala daZakewu. Atumbanji anakutoñojoka nawu “Wanta waNzambi” keña winzi nawa Yesu diyi wukwikala Mwanta. (Luka 19:11) Anatiyishishi wanyi iyi nsañu, neyi chochina chabuliliwu kwiluka nawu Yesu watela kufwa. Dichi nayinki chakutalilahu chikuyikwasha kwiluka nawu Wanta wuchidi kanda winzi, wakenza kumbidi.

Nahoshi nindi: “Muntu wumu wamuchisaka chawanta wayili kwituña dakwakulehi nakutambula ñovu jawanta kulonda akafunti cheñi.” (Luka 19:12) Ilu lwendu lwadiña lwalulehi nankashi. Chakadi nikujina, Yesu diyi “muntu wumu wamuchisaka chawanta” wunayi “kwituña dakwakulehi,” mwiwulu, mwakamwinkelawu ñovu yawanta kudi Tata yindi.

Muchakutalilahu, henohu “muntu wumu wamuchisaka chawanta” kanda ayi, natambiki anduñu 10 nakuyinka mina yasiliva, nakuyileja nindi: “Yizatishenuña mumudimu wakulanda nakulandulula sampu nichinakenza.” (Luka 19:13) Mamina asiliva adiña himali alema nankashi. Mina yimu hiwufwetu wunateli kumwinkawu muntu wadimaña hadi tukweji tusatu nikubadikahu.

Hadaha atumbanji anamoni nawu adi neyi anduñu 10 amuchakutalilahu, muloña Yesu wadiña wayesekeja dehi nawakakumuna mwitempa. (Matewu 9:35-38) Hela chochu, hanakuyileja nindi amuni tidikuku. Ilaña kumuna kwawatumbanji amakwawu anateli kuwana iluña muWanta waNzambi. Atumbanji anazatishi yuma yawu hakwila akwashi antu amakwawu kwikala answana aWanta.

Chumanyi chikwawu chinasololiyi Yesu munichi chakutalilahu? Nahoshi nindi antu jindi “amuheleli [muntu wumu wamuchisaka chawanta] nawa atemesheli izanvu dawañimeni kudi yena nakumuleja nawu, ‘Hitunakukeña iwu muntu kwikala mwanta wetuku.’” (Luka 19:14) Atumbanji eluka nawu aYudeya amutambwilaña wanyi Yesu, amakwawu akeñaña nikumujaha. Hanyima yakwila Yesu nafwi dehi nawa nayi dehi mwiwulu, aYudeya amwekesheli chamuheleliwu nanochu chakabishiliwu atumbanji twindi. Awa akakudikaña amwekesheli hatooka to-o nawu hiyakeñeleña Yesu kwikala Mwanta wawuku.—Yowanu 19:15, 16; Yilwilu 4:13-18; 5:40.

Indi anduñu 10 azatishili ñahi mamina awu kushika nimpinji “muntu wumu wamuchisaka chawanta” yatambwililiyi “ñovu jawanta” nakufunta? Yesu nahoshi nindi: “Chafuntiliyi hanyima yakutambula ñovu jawanta, watambikili anduñu owu enkeliyi mali kulonda amoni mali awanininihu mumudimu wawu wakulanda nakulandulula. Dichi watachi wenjili hambidi nawa wahosheli nindi, ‘Mwanta, mina yeyi yinasemunwinihu mamina 10.’ Yena wamulejeli nindi, ‘Wuzataña, eyi nduñu wamuwahi! Chineli wunamwekeshi kushinshika muyuma yantesha, yuulaña nyisumba 10.’ Dichi wamuchiyedi wenjili nakuhosha nindi, ‘Mina yeyi Mwanta, yinasemunwinihu mamina atanu.’ Wamulejeli niyena nindi, ‘Nineyi yuulaña nyisumba yitanu.’”—Luka 19:15-19.

Neyi atumbanji eluka nawu adi neyi ana anduñu azatishili yuma yawu kulonda avulishiliku atumbanji, atela kwiluka nawu Yesu wakazañalala namudimu wawu. Nawa atela kwiluka nawu akayisomwena hakuzatisha maana awu. Hela chochu, atumbanji twaYesu ahandaña chihandilu chochimuku, nawa hiyakweti wuswa niñovu yoyimuku. Dichi, Yesu wunatambwili “ñovu jawanta,” wakayikiswila ejima akuzata nañovu kulonda elishi atumbanji.—Matewu 28:19, 20.

Ilaña, talenu chaambu chidihu, chinakukunkululayi Yesu chakutalilahu chindi nindi: “Ilaña [nduñu] mukwawu wenjili nakuhosha nindi, ‘Mwanta, mina yeyi iyi yinaswekeli mwihina. Tiyaña, nakutiyili woma, muloña wudi muntu wakalisha; wasendaña mali iwabulili kusha mubanki, nawa wamunaña yiwabulili kukuwa.’ Yena wamulejeli nindi, ‘Nakusompeshi namazu eyi, eyi nduñu watama. Welukili neyi ami nidi muntu wakalisha, nasendaña mali inabulili  kusha mubanki nawa namunaña yinabulili kukuwa, netu? Hanu dinu wabulililidi kusha mali ami mubanki? Ichi chinnenzi nadi kuwana ananshilihu ngalanyi.’ “Hamuloña wachumichi, walejeli antu emeni kwakwihi nindi, ‘Mutambulenu mina mwinki owu wukweti mamina 10.’”—Luka 19:20-24.

Ilaña chineli wakañenyi kuvulisha maheta awanta wankaaka yindi, iwu nduñu amutambwili, nakushala makasakasa. Apostolu akuhweleleli Yesu kutachika kuyuula muWanta waNzambi. Dichi chinahoshiyi haniwu nduñu wakukumishaku, hadaha chinayikwashi kwiluka nawu neyi abula kuzata nañovu hiyakekala muniwu Wantaku.

Mazu anahoshiyi Yesu atela anayisañumuni atumbanji ashinshika kuzata nañovu. Nakunkululi nindi: “Inakuyileja nami, muntu wejima wukweti, akamwinkelahu jikwawu, ilaña muntu wunabuli, nichikwetiyi akachitambula.” Nabombelihu nindi ayilumbu jindi anakubula kukeña yena “kwikala mwanta wawu,” akayijaha. Kuhiñahu Yesu natwalekihu cheñi kuya kuYerusalema.—Luka 19:26-28.