Kata obedo ni Jerusalem e ma Yesu dhiye, nyalo bedo ni pod en e od Zakayo ka en gi jopuonjrene. Jopuonjrenego nigi yie ni kinde okayo ma “Pinyruodh Nyasaye” biro locho ka Yesu e Ruoth. (Luka 19:11) Winjo tiend wachno chandogi mana kaka ng’eyo ni Yesu nyaka tho bende osebedonegi matek. Omiyo, ogoyonegi ngero ma nyalo konyogi ng’eyo ni ndalo ma Pinyruodhno biro chako lochoe pod ni mabor.

Yesu wacho kama: “Ng’at moro moa e anyuola ma nigi huma nodhi wuoth e piny moro mabor mondo okete kaka ruoth eka oduog.” (Luka 19:12) Wuoth ma kamano nyalo kawo kinde malach. Adiera en ni, Yesu e ‘ng’at moa e anyuola ma nigi huma’ modhi wuoth e ‘piny mabor’ ma en polo, kuma Wuon mare biro ketee kaka ruoth.

E ngerono, ka ‘ng’at moa e anyuola ma nigi humano’ pok owuok, oluongo wasumbnine apar kae to omiyo moro ka moro kuomgi mina mar fedha konyisogi niya: “Timuru ohala nyaka chop aduog.” (Luka 19:13) Mina mar fedha gin pesa ma ni malo ahinya. Mina achiel en pesa michulo ng’ato bang’ tiyo e puodho kuom dweche adek.

Jopuonjre nyalo fwenyo ni gin e ma gichal gi wasumbni apar miwuoyoe e ngerono, nimar Yesu osegapimogi gi jokeyo. (Mathayo 9:35-38) En adier ni pok onyisogiga ni gikel cham ma gikayo. Kar mano, tich monego giti ma chalo gi tij keyo en konyo ji mondo obed jopuonjre ma nyalo donjo e Pinyruodh Nyasaye. Jopuonjrego tiyo gi mwandu ma gin-go mondo gikonygo joma nyalo yudo pok mar Pinyruoth.

En wach mane kendo ma Yesu medo lero e ngerono? Owacho ni jopiny ne osin gi ng’at moa e anyuola ma nigi humano “mi ne gioro joote moko oluw bang’e mondo giwach ni, ‘Ok wadwar ni ng’atni obed ruoth e wiwa.’” (Luka 19:14) Jopuonjre ong’eyo ni Jo-Yahudi ok ohero Yesu kendo ni moko kuomgi dwaro kata mana nege. Bang’ ka Yesu osetho mi odok e polo, thoth Jo-Yahudi biro sando jopuonjrene ka ginyisogo ni ok gihere. Jo akwedego timo gik ma nyiso maler ni ok gidwar ni Yesu obed Ruodhgi.​—Johana 19:15, 16; Tich Joote 4:13-18; 5:40.

To ere kaka wasumbni aparka tiyo gi mina momigi nyaka chop kama ‘ng’at moa e anyuola ma nigi humano’ ‘oseket mondo obed ruoth’ kae to oduog? Yesu lero kama: “Gikone, ka noduogo bang’ bedo ruoth, noluongo wasumbni ma nosemiyo pesago mondo ong’e yuto ma ne gisenwang’o bang’ timo ohala. Omiyo, mokwongo nobiro ire mowacho ni, ‘Ruodha, mina ma ne imiya osenyuolo mina apar.’ Nokone ni, ‘Itimo maber, in misumba maber! Nikech isenyiso ni in ng’at migeno e wach matin ahinya, bed gi loch e wi taonde apar.’ Koro mar ariyo nobiro ka wacho ni, ‘Ruodha, mina ma ne imiya ne onyuolo mina abich.’ Nowacho bende ne misumbano ni, ‘In bende bed gi loch e wi taonde abich.’”​—Luka 19:15-19.

Ka jopuonjre nyalo fwenyo ni gin e ma gichal gi wasumbni mosetiyo maber gi mwandugi ka gimiyo jomamoko bedo jopuonjre, ginyalo bedo gadier ni Yesu biro mor kodgi. Kendo ginyalo bedo gadier ni Yesu biro guedho kinda ma kamano. En adier ni ngima jopuonjre Yesu ok chalre, kendo nyalo kod thuolo ma gin-go bende opogore. To e ma pod Yesu midhi ket mondo ‘obed ruoth,’ biro fwenyo kendo guedho kinda ma ginyiso e loko ji obed jopuonjrene.​—Mathayo 28:19, 20.

Kata kamano, ne ane gima Yesu wacho kotieko goyo ngerono. Owacho kama: “To [misumba] machielo nobiro ka wacho ni, ‘Ruodha, eri mina mari ma napando ei nanga. Nimar ne aluori, nikech in ng’at ma koch; ijakawo gik ma ne ok ikano, kendo ijakayo gik ma ne ok ichuoyo.’  Nowachone ni, ‘Misumba marachni, ang’adoni bura kuom weche moa e dhogi iwuon. Donge ne ing’eyo ni an ng’at ma koch, ni ajakawo gik ma ne ok akano, kendo ni ajakayo gik ma ne ok achuoyo? Kare ang’o momiyo ne ok iketo pesana e bengi? Eka ka abiro dine ayudogo kosenyuolo ohala moro e wiye.’ Eka nowacho ne joma ne ochung’ machiegni ni, ‘Kawuru mina ma en-gono kendo umi jal ma nigi mina apar.’”​—Luka 19:20-24.

Misumbano ne ong’adne bura marach nikech ne ok otimo ohala mondo omed mwandu mag ruodhe. Joote geno neno ka Yesu locho e Pinyruodh Nyasaye. Omiyo, nenore ni ginyalo fwenyo ni wach mowacho e wi misumba mogikno nyiso ni ka ok ginyiso kinda ma dwarore, mano biro monogi donjo e Pinyruoth.

Nyaka bed ni weche ma Yesu wacho e ngerono jiwo jopuonjre momakore kode mondo gitim kinda moloyo. Yesu tieko kowacho kama: “Awachonu ni, ng’ato ang’ata ma nigo, ibiro miye momedore, to ng’at ma ongego, kata mana ma en-gono ibiro maye.” Omedo wacho ni jowasike ma ok dwar ni ‘obed ruoth e wigi’ ibiro keth. Kae to Yesu dhi nyime gi wuodhe mochomo Jerusalem.​—Luka 19:26-28.