Zeruzalɛm la a Zeezi rabda, la a tog n keta a Zaase zakẽ wã ne a karen-biisã. Bãmb ra tẽedame tɩ keta bilf tɩ Wẽnnaam lugl a Rĩungã, n kɩt t’a Zeezi lebg Rĩma. (Luk 19:11) Wa b sẽn da pa wʋmd a Zeezi sẽn tog n ki wã võorã, b ra pa mi Wẽnnaam Rĩungã luglg sẽn na n yɩ to-to wã ye. Rẽ n so t’a Zeezi wẽ yel-bũndi, n na n sõng-b tɩ b bãng tɩ Rĩungã luglg wakat ket n zãrame.

Ad a Zeezi sẽn yeele: “Na-biig a yembr n da yi n kẽng tẽng sẽn zãr n na n tɩ reeg naam la a wa.” (Luk 19:12) So-toak a woto kaoosdame. D mii vẽeneg t’a Zeezi n yaa ‘na-biigã’ sẽn tog sor n kẽng ‘tẽng sẽn zãrã.’ Tẽn-kãng yaa saasẽ. Beenẽ la a Ba wã na n kõ-a naamã.

Yel-bũndã pʋgẽ, nand tɩ na-biigã looge, a boola a tʋm-tʋmdb piiga, n kõ ned kam fãa min piiga, n yeel-b tɩ b “yõdg n leeb n paam yõod hal tɩ yẽnda lebg n wa.” (Luk 19:13) Min-dãmbã yaa wanzuri ligd-koeemse, la b yõodã waoogame. Min a ye taa pʋʋg tʋm-tʋmd kiis a tãab yaoodo.

Wõnda karen-biisã bãngame t’a Zeezi yel-bũndã pʋgẽ, bãmb la tʋm-tʋmdb piigã. Bala vugri a Zeezi mak-b-la ne tigsdb bɩ pʋʋg tʋm-tʋmdba. (Matye 9:35-38) A pa yeel tɩ karen-biisã kẽng n tɩ kẽeb bɩ n tigs kood n wa ye. A ra gomda b sẽn na n moon koɛɛgã, n tigs neb tɩ b lebg yẽ karen-biisi, n wa paam n kẽ Wẽnnaam soolmẽ wã. Karen-biig fãa tog n dɩka a paoongã n sõng neb a taab tɩ b wa paam n kẽ Wẽnnaam soolmẽ wã.

Bũmb a to me la a Zeezi vẽneg n togs yel-bũndã pʋgẽ. A yeelame tɩ soolmã nebã “rag n kisa [na-biigã], la b tʋma neb tɩ b pʋgl-a n tɩ yeel yaa: ‘Tõnd ka rat tɩ rao-kãngã soog tõnd ye.’ ” (Luk 19:14) Karen-biisã miime tɩ zʋɩf-rãmbã pa tẽed a Zeezi ye. Kẽer meng ra baood-a lame n na n kʋ. A Zeezi sẽn wa n ki tɩ Wẽnnaam vʋʋg-a t’a leb saasẽ wã, zʋɩf-rãmb wʋsg namsa a karen-biisã, tɩ wilgdẽ tɩ b sɩd ra kis-a lame. Woto wilga vẽeneg tɩ b yaa bɛɛba, n pa rat t’a Zeezi yɩ b Rĩm ye.—Zã 19:15, 16; Tʋʋmã 4:13-18; 5:40.

La bõe la tʋm-tʋmdb piigã tall b min-dãmbã n maane, n tãag “na-biigã” sẽn tɩ reeg “naam” n lebg n wa wã? A Zeezi yeela woto: “La yẽnda sẽn deeg naamã n lebg n wa, a kɩtame tɩ b bool tʋmtʋmdb nins yẽnda sẽn da kõ ligdã tɩ b wa, tɩ yẽnda bãng ned kam fãa sẽn leeb n paam yõod to-to. Pipi soabã waa n yeelame yaa: ‘Zu-soaba yãmb minnã paama yõod min piiga.’ A yeela yẽnda yaa: ‘Be neere, tʋmtʋmd-sõngo, fo sẽn maan sɩd ne bũmb bilfã yĩnga, bɩ f soog tẽms piiga.’ La yiib soabã waame n yeele: ‘Zu-soaba, yãmb minnã doga min a nu.’ A yeela yẽnda yaa: ‘Fo me soog tẽms a nu.’ ”—Luk 19:15-19.

A Zeezi karen-biisã sã n bãng tɩ b yaa wa tʋm-tʋmdb nins sẽn dɩk b paoongã n sõng neb tɩ b lebg a Zeezi karen-biisã, b tõe n kɩsa sɩd t’a Zeezi sũur na n yɩɩ noog ne-ba. A leb n tõe n kɩsa sɩd t’a Zeezi na n wa keo-a lame, a modgrã yĩnga. Sẽn tũud-b a Zeezi wã yɛl pa taaba, b tarmã la b minimã me pa yembr ye. La a Zeezi sẽn tɩ “reeg naam” masã wã na n keo-b lame, bala a nee b sẽn modgd n na n sõng neb a taab tɩ b lebg yẽ karen-biisã.—Matye 28:19, 20.

La yel-bũndã baasgẽ, a Zeezi goma tʋm-tʋmd a to yelle. Yẽ soabã sẽn maanã yaa toore. A wa n yeela a zu-soabã yaa: “ ‘Zu-soaba, ad yãmb minnã! Mam dag n vil-a-la ne peend n bĩngi, bala, mam dag n zoeta yãmba, yãmb sẽn yaa nin-toaagã yĩnga. Yãmb dɩkda bũmb ning y sẽn ka rɩgle, la y tigsd bũmb ning yãmb sẽn ka bʋd ye.’ Naabã yeela tʋmtʋmd-kãng yaa: ‘Tʋmtʋmd-wẽnga, mam na n dɩka fo mengã goam n kao fo bʋʋdo. Fo rag n miime tɩ mam yaa nin-toaaga, tɩ mam dɩkda bũmb ning mam sẽn ka rɩgle, la m tigsd bũmb ning mam sẽn ka bʋd ye, dẽ, bõe yĩng tɩ fo ka bĩng mam ligdã bãnkẽ tɩ mam sã n lebg n wa bɩ m deeg-a ne yõodo?’ La a yeela neb nins sẽn da be be wã tɩ b reeg min a yembrã a sẽn tarã n kõ ned ning sẽn tar-a min piigã.”—Luk 19:20-24.

Tʋm-tʋmdã bõna wʋsgo, a sẽn pa tall a minnã n leeb sẽn na yɩl n paas a zu-soabã paoongã. A Zeezi tʋm-tʋmdbã ra gũuda wakat ning a sẽn na n sɩng naam rɩɩb Wẽnnaam soolmã pʋgẽ. Dẽnd tõe tɩ bũmb ning a Zeezi sẽn yeel tʋm-tʋm-kãngã zugã kɩtame tɩ b bãng tɩ b sã n pa modge, b pa na n paam n kẽ Wẽnnaam soolmẽ wã ye.

A Zeezi sẽn baas a yel-bũndã ne goam ninsã segd n kɩtame tɩ sẽn tũud-b yẽ ne b sũy fãa wã modg n paase. A yeelame: “Mam yeta yãmb tɩ b na n kõo ned ning sẽn tara, la ned ning sẽn ka tarã, b na n deega baa bũmb bilf ning yẽnda sẽn tarã.” A paasame tɩ b na n kʋʋ sẽn kis-b yẽ n pa rat t’a lebg rĩm n “soog-bã.” Rẽ poore, a Zeezi rɩka sor n dabd Zeruzalɛm.—Luk 19:26-28.