KAPITLU 100
It-tixbiha tiegħu tal-għaxar miniet
-
IT-TIXBIHA TAʼ ĠESÙ TAL-GĦAXAR MINIET
Għalkemm id-destinazzjoni taʼ Ġesù hi Ġerusalemm, jistaʼ jkun li għadu fid-dar taʼ Żakkew mad-dixxipli tiegħu. Huma jemmnu li “s-saltna t’Alla” se tiġi stabbilita dalwaqt b’Ġesù bħala s-Sultan tagħha. (Luqa 19:11) Huma ma jifhmux din il-kwistjoni, bħalma ma fehmux li Ġesù għandu jmut. Allura Ġesù jirrakkonta tixbiha biex jgħinhom jaraw li s-Saltna għad fadlilha mhux ħażin.
Hu jgħid: “Wieħed raġel nobbli minn twelidu vvjaġġa lejn art imbiegħda biex jikseb poter bħala sultan u mbagħad jerġaʼ lura.” (Luqa 19:12) Vjaġġ bħal dan jieħu ż-żmien. Ġesù b’mod ċar hu r-“raġel nobbli minn twelidu” li jivvjaġġa lejn “art imbiegħda,” jiġifieri lejn is-sema, fejn Missieru se jagħtih il-poter bħala sultan.
Fit-tixbiha, qabel ma jitlaq ir-“raġel nobbli minn twelidu,” hu jsejjaħ għandu għaxart ilsiera u jagħti lil kull wieħed minnhom mina tal-fidda u jgħidilhom: “Innegozjawhom sakemm niġi.” (Luqa 19:13) Miniet tal-fidda letterali huma muniti taʼ valur għoli. Bidwi jrid jaħdem tliet xhur biex jaqlaʼ mina waħda.
Id-dixxipli għandhom mnejn jifhmu li huma bħall-għaxart ilsiera fit-tixbiha, għax Ġesù diġà kien qabbilhom maʼ ħaddiema fil-ħsad. (Mattew 9:35-38) M’għandniex xi ngħidu, hu ma talabhomx jiġbru l-qamħ letterali. Minflok, il-ħsad tagħhom jikkonsisti mill-ġbir taʼ dixxipli oħrajn li jistaʼ jkollhom post fis-“saltna t’Alla.” Id-dixxipli jużaw kulma għandhom biex jipproduċu iktar werrieta tas-Saltna.
Ġesù xi jsemmi iktar fit-tixbiha tiegħu? Hu jgħid li ċ-ċittadini “kienu jobogħduh [lir-raġel nobbli minn twelidu] u bagħtu warajh ġemgħa t’ambaxxaturi jgħidu, ‘Lil dan ma rriduhx isir sultan fuqna.’” (Luqa 19:14) Id-dixxipli jafu li l-Lhud ma jaċċettawx lil Ġesù—xi wħud saħansitra jridu joqtluh. Wara li Ġesù jmut u jitlaʼ fis-sema, il-Lhud inġenerali juru kif iħossuhom dwaru billi jippersegwitaw lid-dixxipli tiegħu. Dawn l-opponenti jagħmluha ċara li ma jridux lil Ġesù bħala s-Sultan tagħhom.—Ġwanni 19:15, 16; Atti 4:13-18; 5:40.
L-għaxart ilsiera kif jużaw il-miniet tagħhom sakemm ir-“raġel nobbli minn twelidu” jikseb “poter bħala sultan” u jerġaʼ lura? Ġesù jirrakkonta: “Meta ġie lura, wara li kiseb il-poter bħala sultan, ordna li jissejħu quddiemu l-ilsiera li lilhom kien ta l-flus tal-fidda, sabiex ikun jaf x’kienu qalgħu bin-negozju li kienu għamlu. Imbagħad, ġie quddiemu l-ewwel wieħed u qallu, ‘Sidi, il-mina tiegħek qalgħet għaxar miniet.’ Għalhekk, qallu, ‘Prosit, ilsir tajjeb! Peress li wrejt fedeltà f’ħaġa żgħira ħafna, ħu l-awtorità fuq għaxart ibliet.’ Issa ġie t-tieni wieħed u qal, ‘Il-mina tiegħek, Sidi, għamlet ħames miniet.’ Lil dan ukoll qallu, ‘Int, ukoll, ħu taħt idejk ħamest ibliet.’”—Luqa 19:15-19.
Jekk id-dixxipli jifhmu li huma bħall-ilsiera li jużaw kulma għandhom biex jagħmlu iktar dixxipli, huma jistgħu jkunu ċerti li Ġesù se jkun kuntent bihom. U jistgħu jkunu żguri li hu se jippremja x-xogħol iebes tagħhom. Naturalment, mhux id-dixxipli kollha taʼ Ġesù għandhom l-istess ċirkustanzi fil-ħajja u lanqas m’għandhom l-istess opportunitajiet jew abbiltajiet. Iżda Ġesù, li jikseb “poter bħala sultan,” se jirrikonoxxi u jbierek l-isforzi leali tagħhom biex jagħmlu dixxipli.—Mattew 28:19, 20.
Imma nnota l-kuntrast li jagħmel Ġesù minn kif jispiċċa t-tixbiha tiegħu: “Imma ġie [lsir] ieħor u qal, ‘Sidi, hawn hi l-mina tiegħek, li jien żammejt merfugħa f’biċċa drapp. Għax ara, bżajt minnek, peress li int raġel aħrax; tiġbor Luqa 19:20-24.
dak li ma ddepożitajtx u taħsad dak li ma żrajtx.’ Qallu, ‘Minn fommok stess niġġudikak, ilsir mill-agħar. Kont taf, hux hekk, li jien raġel aħrax, li niġbor dak li ma ddepożitajtx u naħsad dak li ma żrajtx? Allura, għala ma poġġejtx il-flus tal-fidda tiegħi l-bank? Imbagħad, meta nasal, kont niġborhom bl-imgħax.’ Imbagħad qal lil dawk li kienu ħdejh, ‘Ħudulu l-mina u agħtuha lil dak li għandu l-għaxar miniet.’”—Peress li ma jagħmel xejn biex ikabbar il-ġid tas-saltna taʼ sidu, dan l-ilsir imur minn taħt. L-appostli qed jistennew b’ħerqa r-renju taʼ Ġesù fis-Saltna t’Alla. Allura minn dak li jgħid dwar dan l-ilsir tal-aħħar, x’aktarx li jifhmu li jekk ma jkunux ħabrieka, mhux se jkollhom post f’din is-Saltna.
Kliem Ġesù jrid iqanqal lid-dixxipli leali biex iżidu l-isforzi tagħhom. Hu jikkonkludi: “Ngħidilkom, Kulmin għandu, jingħatalu iktar; imma min m’għandux, jittiħidlu saħansitra dak li għandu.” Hu jżid jgħid li l-għedewwa tiegħu, li ‘ma jriduhx isir sultan fuqhom,’ se jinqatlu. Imbagħad Ġesù jkompli l-vjaġġ tiegħu lejn Ġerusalemm.—Luqa 19:26-28.