Le ge Jesu a eya Jerusalema, a ka ba a sa dutše a le ntlong ya Sakeo a na le barutiwa ba gagwe. Ba dumela gore “Mmušo wa Modimo” o kgauswi le go hlongwa gomme Kgoši ya wona e le Jesu. (Luka 19:11) Ga ba kwešiše taba ye, feela bjalo ka ge ba sa kwešiše gore Jesu o swanetše go hwa. Ka gona o bolela ka seswantšho go ba thuša go bona gore Mmušo o sa le kgole.

O re: “Motho yo mongwe wa go tswalelwa bogošing o ile a ya nageng ya kgole go yo tšea matla a bogoši gomme a boa.” (Luka 19:12) Leeto le bjalo le be le tla tšea nako e telele. Go molaleng gore Jesu ke yena “motho yo mongwe wa go tswalelwa bogošing” yo a yago “nageng ya kgole,” e lego legodimong, moo Tatagwe a tlago go mo nea matla a bogoši.

Seswantšhong se, pele “motho yo mongwe wa go tswalelwa bogošing” a ka sepela, o bitša bahlanka ba lesome gomme a nea yo mongwe le yo mongwe mina ya silifera, a ba botša a re: “Gwebang go fihla ke etla.” (Luka 19:13) Dimina tša silifera tša kgonthe ke tšhelete e bohlokwa. Mina e lekana le mogolo wa mošomi wa mašemong wa lebaka la ka godimo ga dikgwedi tše tharo.

Barutiwa ba ka ba ba kwešiša gore ba swana le bahlanka ba lesome seswantšhong se, ka ge Jesu a šetše a ba swantšhitše le bašomi ba punong. (Mateo 9:35-38) Ke therešo gore ga se a ba kgopela gore ba tle le puno ya mabele. Go e na le moo, puno e akaretša barutiwa ba bangwe bao ba ka hwetšago sebaka Mmušong wa Modimo. Barutiwa ba diriša dilo tšeo ba nago le tšona go hwetša bajabohwa ba oketšegilego ba Mmušo.

Ke’ng se sengwe gape seo Jesu a se utollago seswantšhong sa gagwe? O bolela gore baagi “ba be ba . . . hloile [motho yo mongwe wa go tswalelwa bogošing] gomme ba romela sehlopha sa batseta ka morago ga gagwe, gore se yo re: ‘Ga re nyake motho yo e eba kgoši ya rena.’” (Luka 19:14) Barutiwa ba a tseba gore Bajuda ga ba amogele Jesu—ba bangwe ba bile ba nyaka go mmolaya. Ka morago ga ge Jesu a hwile e bile a ile legodimong, Bajuda ka kakaretšo ba bontšha kamoo ba mo lebelelago ka gona ka go tlaiša barutiwa ba gagwe. Baganetši ba ba bontšha gore ga ba nyake Jesu e le Kgoši.—Johane 19:15, 16; Ditiro 4:13-18; 5:40.

Ge e le bahlanka ba lesome, ba diriša bjang dimina tša bona go fihlela “motho yo mongwe wa go tswalelwa bogošing” a amogela “matla a bogoši” gomme a boa? Jesu o anega ka gore: “Mafelelong ge a boile ka morago ga go tšea matla a bogoši, o ile a bitša bahlanka bao a bego a ba neile tšhelete ya silifera, e le gore a tle a kgonthiše seo ba se hweditšego ka modiro wa kgwebo. Ke moka wa pele a itšweletša, a re: ‘Morena, mina ya gago e tswetše dimina tše lesome.’ Ka gona a re go yena: ‘O dirile gabotse, wena mohlanka yo botse! Gobane o itlhatsetše o botega tabeng e nyenyane, laola metse e lesome.’ Bjale wa bobedi a tla, a re: ‘Morena, mina ya gago e tswetše dimina tše hlano.’ A re le go yena yo: ‘Le wena, laola metse e mehlano.’”—Luka 19:15-19.

Ge e ba barutiwa ba nagana gore ba tla swana le bahlanka bao ba dirišago dilo tša bona ka botlalo go dira barutiwa ba oketšegilego, ba ka kgodišega gore Jesu o tla thabišwa ke seo. Le gona ba ka kgodišega gore o tla putsa phišego e bjalo. Ke therešo gore ga se barutiwa ka moka ba Jesu bao ba nago le maemo a swanago bophelong gaešita le dibaka tše swanago goba bokgoni. Le gona Jesu, yoo a amogelago “matla a bogoši,” o tla lemoga le go šegofatša maiteko a bona a go dira barutiwa, ao ba a dirago ka potego.—Mateo 28:19, 20.

Lega go le bjalo, bona phapano ge Jesu a phetha seswantšho sa gagwe ka gore: “Eupša [mohlanka] yo mongwe yo a fapanego le bona a tla, a re: ‘Morena, mina ya gago še, yeo ke e lotilego e le ka lešeleng. Nna ke be ke go boifa, gobane o motho yo bogale; o tšea seo o sa kago wa se bea gomme o buna seo o sa kago wa se bjala.’ A re go yena: ‘Wena mohlanka yo kgopo, ke go ahlola ka mantšu a molomo wa gago. A ke re o tsebile ge ke le motho yo bogale, yo a tšeago seo a sa kago a se bea le yo a bunago seo a sa kago a se bjala? Ka gona, ke ka baka la’ng o sa ka wa bea tšhelete ya ka ya silifera pankeng? Ke moka ge ke fihlile ke be ke tla e lata e na le tswalo.’ “Ge a fetša go re’alo, a re go bao ba emego moo: ‘Mo amogeng mina le e nee yo a nago le dimina tše lesome.’”—Luka 19:20-24.

Mohlanka yo o a loba ka baka la go palelwa ke go oketša lehumo la mmušo wa mong wa gagwe. Baapostola ba fagahletše gore Jesu a buše Mmušong wa Modimo. Ka gona go ya ka seo a se bolelago ka mohlanka yo wa mafelelo, mohlomongwe ba lemoga gore ge e ba ba sa fišege, ba ka se hwetše sebaka Mmušong wa Modimo.

Mantšu a Jesu a swanetše go tutuetša barutiwa ba botegago gore ba oketše maiteko a bona. O a phetha o re: “Ke re go lena: Mang le mang yo a nago le selo, o tla newa mo go oketšegilego, eupša yo a se nago selo, o tla amogwa gaešita le seo a nago le sona.” O oketša ka go bolela gore manaba a gagwe, ao a sa nyakego a “eba kgoši ya ona,” a tla fedišwa. Ke moka Jesu o tšwela pele ka leeto la gagwe la go ya Jerusalema.—Luka 19:26-28.