Jesuspa yachachisqasnenqa, yuyarqanku pisimantawan “Diospa Gobiernon” sayarichisqa kananta, Jesustaj chaypi rey kananta (Lucas 19:11). Paykunaqa mana entienderqankuchu Diospa Gobiernon mana kay jallpʼapichu sayachisqa kananta, nitaj Jesús wañuchisqa kanantapis. Chayrayku Jesusqa sutʼincharqa Diospa Gobiernon aswan qhepamanraj sayarichisqa kananta. Chaytataj Jesús sutʼincharqa Jerusalenman rishajtinku, ichapis Zaqueoj wasinpi.

Jesús nerqa: “Uj reypa wawan karu llajtaman risqa, rey churasqa kananpaj. Chantá rey kaspaña kutinpunan kasqa”, nispa (Lucas 19:12). Jesusqa ‘reypa wawanmanta’ parlaspa, pay kikillanmantataj parlasharqa. “Karu llajtaman risqa” nispataj, pay cieloman rinanmanta parlasharqa. Cielopitaj Tatan payta Rey kananpaj churarqa. Tukuy chay imas kananpajtaj mana pisi tiempollachu pasanan karqa.

‘Reypa wawanqa’ niraj ripushaspa chunka kamachisninta wajyaytawan “ashkha qolqeta” qosqa. Chantá nisqa: “Kay qolqeta mirachimuychej kutimunaykama”, nispa (Lucas 19:13). Chay kamachis japʼerqanku chay qolqeta uj runa ganananpajqa, kinsa killa kurajta trabajanan karqa.

Jesuspa yachachisqasnenqa, ichapis repararqanku paykuna chay chunka kamachis kasqankuta. Imajtinchus Jesusqa aswan ñaupajtaña paykunata cosechata oqharejkunawan kikincharqa (Mateo 9:35-38). Jesusqa mana nisharqachu yachachisqasnin chajrapipuni trabajanankuta. Astawanpis payqa nisharqa runasta yachachisqasninman tukuchimunankuta, ajinamanta chay runaspis Diospa Gobiernonman yaykunankupaj. Chayrayku Jesuspa yachachisqasnenqa tukuy tiemponkuta, kallpankuta, kapuyninkutawan churarqanku, runasta Jesuspa yachachisqasninman tukuchimunankupaj.

Chantá Jesusqa ‘reypa wawanmanta’ nillarqataj: “Llajta masisnintajrí payta chejnikuspa runasta qhepanta kachasqanku nimunankupaj: ‘Mana munaykuchu reyniyku kanaykita’, nispa” (Lucas 19:14). Jesuspa yachachisqasnenqa, yacharqanku judíos Jesusta qhesachasqankuta, wakintaj wañuchiyta munasqankuta. Jesús wañuchisqa kasqanmanta, cielomantaj ripusqanmanta qhepamanqa, ashkha judíos paykunata qhatiykacharqanku. Ajinamanta Jesusta nisharqanku “mana munaykuchu reyniyku kanaykita”, nispa (Juan 19:15, 16; Hechos 4:13-18; 5:40).

“Reypa wawanpa” chunka kamachisnin, ¿imatataj ruwarqanku japʼisqanku qolqewan? Jesusqa willarqa patronninku reyña kutimojtin imachus kasqanta. Pay nerqa: “Tiemponmantaj rey kaspaña kutimusqa, chantá pikunamanchus qolqeta qosqa, chay kamachista wajyachimusqa, yachananpaj mashkhatachus qolqeta mirachisqankuta. Ujnin kamachintaj jamuspa nisqa: ‘Señor, qolqeykitaqa chunka jinastawanraj mirachini’, nispa. Reytaj kutichisqa: ‘Sumajta ruwanki allin kamachi. Pisi kajpi allinta juntʼasqaykirayku, chunka llajtasta kamachinki’, nispa. Wajñataj jamuspa nisqa: ‘Señor, qolqeykitaqa phishqa jinastawanraj mirachini’, nispa. Reytaj payta nisqa: ‘Qanpis phishqa llajtasta kamachinki’, nispa” (Lucas 19:15-19).

Jesuspa yachachisqasnenqa ichapis repararqanku qolqeta mirachej kamachis jina ruwashasqankuta. Imajtinchus kapuyninkuwan yanapachikuspa runasta Jesuspa yachachisqasninman tukuchisharqanku. Chayrayku mana iskayrayanankuchu karqa, Jesús paykunawan kusisqa kashasqanmanta, bendecinanmanta ima. Chantapis paykunaqa  tukuy atisqankuta runasman yachachisharqanku. Chayrayku Jesusqa ‘reyña kaspa’ kutimuytawan paykunata bendicenqa (Mateo 28:19, 20).

Chantá Jesús nerqa: “Chantá wajñataj jamuspa nisqa: ‘Señor, kayqa qolqeyki, uj pañuelopi waqaychaporqayki. Manchay sajra runa kasqaykirayku manchachikorqayki. Qanqa bancomanta orqhonki mana churasqayki qolqeta, oqharinkitaj mana tarpusqaykita’, nispa. Reytaj kutichisqa: ‘Sajra kamachi, parlasqaykiman jina juchachasqayki. Yachasqanki sajra runa kasqayta, bancoman mana churasqay qolqeta orqhosqayta, mana tarpusqaytataj oqharisqayta. Chantá, ¿imaraykutaj mana bancoman qolqeyta churarqankichuri? Noqaqa chayamuspa interesniyojta orqhokapuyman karqa’, nispa. Chantá chaypi kajkunaman nisqa: ‘Qhechuychej chay qolqeta. Chunkaman mirachejmantaj qopuychej’, nispa” (Lucas 19:20-24).

Chay kamacheqa japʼisqan qolqeta mana mirachisqanrayku pierderqa. Apostolesqa suyakusharqanku Diospa Gobiernonpi Jesús rey kananta. Chayrayku Jesús ‘sajra kamachimanta’ parlajtin, paykunaqa ichapis repararqanku Diospa Gobiernonman yaykunankupaj mayta kallpachakunanku kasqanta.

Jesuspa yachachisqasnenqa chayta uyarispa, astawanchá kallpachakorqanku runasman yachachinankupaj. Chanta Jesús nerqa: “Kapuyniyojmanqa astawan qosqa kanqa, mana kapuyniyojmantataj kapusqanpis qhechusqa kanqa”, nispa. Chantá Jesús sutʼincharqa enemigosnin chinkachisqa kanankuta. Paykunaqa mana munarqankuchu Jesús ‘reyninku kananta’. Chayta sutʼinchaytawan Jesusqa Jerusalenman purirerqa (Lucas 19:26-28).